Мұқтаж жандарға қол ұшын созып, мүмкіндігі шектеулі азаматтарға демеу болып, жақсылық жасасаң, жаныңды жадыратып, жақсы істерге жол ашылатыны анық. Бүгінгі шығарылымының кейіпкері дәл осы ұранмен талай жыл игі істердің басы-қасында жүрген ізгілікті азамат.
Джумадилаев Мурат Алімбайұлы 2006 жылы, яғни 19 жыл бұрын негізін қалаған «Жігер» Қызылорда облысы мүгедектерінің қоғамдық бірлестігінің төрағасы. Қоғамдық бірлестік халыққа әлеуметтік қызметтер көрсету бағытында, мүмкіндігі шектеулі жандар мен өмірлік қиын жағдайлардағы азаматтар және пробация есебінде тұрған азаматтарға әлеуметтік, құқықтық, психологиялық, қайырымдылық көмектер және оңалту кезеңдерінде қолдаулар көрсетіп, түрлі акциялар, оқыту курстарын, психологиялық-құқықтық кеңестер, семинар-тренингтер, дөңгелек үстелдер мен кездесулер ұйымдастырып келеді.
Сонымен қатар, инновациялық тәсілдерді үйрету мен әлеуметтік өмір сүру жағдайларын, үйлесімді және жан-жақты дамуына ықпал жасау және оларға қажетті әлеуметтік, мәдени-рухани, экологиялық, құқықтық бағыттар беру бойынша жұмыстар атқаруда.
2024 жылдың қорытындысы бойынша Қызылорда облысының жұмыспен қамтуды үйлестіру және әлеуметтік бағдарламалар басқармасының мемлекеттік әлеуметтік тапсырысы негізінде 2 әлеуметтік жобаны жүзеге асырған. Біріншісі, «Бас бостандығынан айыру орындарынан босатылатындар және босатылғандарды, сонымен қатар пробация қызметінде есепте тұрғандарды қайта әлеуметтендіру және қайта оңалту жұмысын ұйымдастыру» мемлекеттік әлеуметтік жобасын жүзеге асырды. Мақсаты: нысаналы топтағы азаматтарды әлеуметтік қолдау бағытында бас бостандығынан айыру орындарынан босатылатындар және босатылғандардың, сонымен қатар пробация қызметінің есебіндегі тұрғандардың жоғалтқан әлеуметтік-қажетті байланыстарды қалпына келтіру, олардың тарапынан қылмыстың қайталануын алдын алу, оларды қайта әлеуметтендіру және қайта оңалту жұмыстарын жүргізу.
Әлеуметтік жоба нәтижелі болу үшін Қызылорда облысы бойынша қылмыстық-атқару жүйесі департаментімен «Ынтымақтастық» туралы меморандум жасалып, әлеуметтік жобаға Қызылорда облысы бойынша қылмыстық-атқару жүйесі департаментінің Пробация қызметінде (барлық аудандармен қоса), №37, 60, 68 мекемелерінде, Қызылорда облысы полиция департаментінде есепте тұрған 1088 азаматтар тартылды. Жоба аясында заңгер Мұрат Жұмаділаев, психолог Қарлығаш Қойшыбаева және «Мансап» орталықтарының, «Атамекен» палатасының мамандары «Көшбасшылық қасиеттерді қалыптастыру», «Жетістікке жету жолдары», «Дағдарыстан шығу жолдары» тақырыптарында психологиялық тренигтер және жеке психологиялық қабылдаулар өткізілді.
Жұмыспен қамту орталығының маманының, кәсіпкерлер палатасының өкілінің қатысуымен «Жұмыспен қамту. Әңгімелесуден қалай өту керек», «Бас бостандығынан айыру орындарынан босатылған тұлғаларды әлеуметтендіру және олардың құқықтарын қорғауды іске асыру», «Жеке кәсіпкерлікті қалай ашу керек?», «Кәсіпкерлік қызметті жүзеге асыруға несие алу шарттары» тақырыптарда кездесулер мен кеңес беру ұйымдастырылды. Оларға, бас бостандығынан айыру орындарынан босатылатындар және босатылғандардың, сонымен қатар пробация қызметінде есепте тұрған азаматтардың құқықтары туралы ақпараттық-танымдық брошюралар таратылды.
Сонымен қатар, жоба аясында түрлі спорттық іс-шаралар ұйымдастырылып, оған 399 есепте тұрған азамат қатысты. Жеңімпаздарға арнайы дипломдар мен ақшалай сыйлықтар табысталып отырды. Сондай-ақ, 16 желтоқсан Қазақстан Республикасының Тәуелсіздік күніне арналған «Тәуелсіздік деп соғады жүрегіміз» атты мерекелік концерт ұйымдастырылып, қатысушыларға мерекелік көңіл-күй сыйлады.
Әлеуметтік жоба аясында 225 есепте тұрған азаматтан сауалнама алынып, олардың әлеуметтік тұрмыстық жағдайлары зерделеніп, нәтижесінде бас бостандығынан айыру орындарынан босатылатындар және босатылғандар, сонымен қатар пробация қызметінде есепте тұрған азаматтардың әлеуметтік портреттері әзірленіп, пробациялық есепте тұрған екі азамат «Жігер» Қызылорда облысы мүгедектер қоғамдық бірлестігіне жұмысқа қабылданды. Сондай-ақ, әлеуметтік нәтижелік көрсеткіші бойынша есепте тұрған азаматтар арасында қылмыстың қайталануы азайып, есепте тұрған азаматтардың арасында психологиялық ахуал жақсарған.
Екінші әлеуметтік жобаға тоқталатын болсақ, «Мүгедектігі бар адамдар мен жеке көмекшілер үшін компьютерлік сауаттылыққа оқытуды ұйымдастыру» мемлекеттік әлеуметтік тапсырысы аясында 171 мүгедектігі бар адам және мүгедектердің жеке көмекшілері «http://xn--leumet-2nf.egov.kz/» порталы арқылы өтінім беріп, есептері толтырылды. 74 адамға ЭЦҚ алу өтінімдері бойынша жұмыстар жүргізілді және 149 адам Е-Gov порталы арқылы түрлі қызметтерді алды. Сондай-ақ, 152 адамға SKILLS Endek.kz сайты арқылы сертификаттар берілді. Сонымен қатар, 2024 жылы 953 жеке көмекші ай сайынғы есептерін тапсырды.
Әлеуметтік жоба өз нәтижесін беріп, мүгедектігі бар адамдардың және олардың көмекшілерінің компьютерлік сауаттылығы артып, электронды есептер тапсыру дағдылары қалыптастырылды. Олай болса, қоғамда әлеуметтік көмектерді қажет ететін жастар мен мүмкіндігі шектеулі азаматтардың өмірге құштарлығын оята біліп, тұлға ретінде қалыптасуына жол сілтеп келе жатқан «Жігер» Қызылорда облысы мүгедектерінің қоғамдық бірлестігі өкілдеріне алғысымызды айта отырып, еңбектеріне сәттілік, мол табыс тілейміз. Әрдайым нәтижелі жобаларды жүзеге асырып, қоғам үшін қызмет ете беріңіздер демекпіз!
Облыстық үкіметтік емес ұйымдарға арналған ресурстық орталығы
