«Өткен бейсенбіде облыс әкімі Нұрлыбек Нәлібаевтың төрағалығымен облыс әкімдігі жанындағы Сыбайлас жемқорлыққа қарсы іс-қимыл мәселелеріне арналған комиссия отырысы өтті. Басқосуға құқық қорғау органдарының басшылары, селекторлық режимде аудан әкімдері қатысты» деп ақпарат таратты облыс әкімінің баспасөз қызметі.
Күн тәртібінде екі мәселе қаралған. Бірінші Қызылорда облысының мәдениет және спорт басқармасының сыбайлас жемқорлық сипатындағы құқық бұзушылықтың профилактикалық шаралары туралы болыпты. Қарайтындай-ақ бар. Өткен жылы дәл осы екі саланың: мәдениет пен спорт басқармалары басшылары сыбайластық жемқорлыққа қатысты істі болған еді. Содан бері маза қашты. Жаңа әкім коррупциямен аты шыққан екі саланы біріктіріп, жаңа басшы тағайындады. Жаңа басқарма басшысы Руслан Рүстемов өткен жылдың ІІ жартыжылдығында мәдениет саласында 2 қызметкердің және спорт саласында 5 қызметкердің тарапынан сыбайлас жемқорлық сипатындағы құқық бұзушылық орын алғанын жасырмай айтты. Салада мұндай келеңсіздіктерге жол бермес үшін түрлі профилактикалық шаралар ұйымдастырылып келеді екен. Сонымен бірге, сыбайлас жемқорлықтың алдын алуға бағытталған жұмыстарды өз деңгейінде жүргізу мақсатында басқарманың жұмыс жоспары қайта қаралып, пысықталған.
Аймақ басшысы сыбайлас жемқорлық тәуекелдеріне ішкі талдаудың сапасы мен алдын алу тиімділігіне аса назар аудару қажет екенін баса айтты. Сондай-ақ, жасөспірімдер арасында тегін үйірмелер мәселесіне қатысты мүдделі салалық құрылымдарды жұмылдыра отырып, бағдарламаның тиімді іске асуына бағытталған ұсыныстар енгізуді жүктеді.
Расында, бүгінгі күні тегін үйірмелердің жайы үлкен мәселеге айналды. Ашылған қаншама үйірмелер осы күні жабық тұр. Мәселен, «Кемел» оқыту орталығы мамандары үйірмеге келуші оқушыларға орталықтың уақытша жабылғанын қатысушылар дабыл қағып сұрағаннан кейін айтқан. Және қашан ашылатыны жайында мәлімет бермеген. Осындай «балалар жылына орай жасалып жатқан жұмыстарда көзбояушылық болғаны ма?» деген сұрақ әрбір ата-ананы мазалайды.
Отырыста қаралған тағы бір мәселе — кіші және орта кәсіпкерлікті дамытуға бөлінген қаражаттың тиімді пайдаланылуы. Облыстық кәсіпкерлік және өнеркәсіп басқармасының басшысы Муса Қалдарбеков 2021 жылы жеке кәсіпкерлікті қолдау мақсатында республикалық және облыстық бюджеттен 6 млрд. 400 млн. теңге бөлініпті. Мемлекеттік гранттар беру аясында 68 жоба қолдау тапқан.
«Жалпы бөлінген қаражат аясында өңірдің 2 342 кәсіпкерлік субъектісі 33 млрд. 437 млн. теңгеге жеңілдетілген несие түрінде қаржылай қолдау тапқан. Нәтижесінде жаңадан 817 кәсіпкерлік субъектісі ашылып, шағын және орта кәсіпкерлікте жұмыспен қамтылғандардың саны 1110 адаммен толықты, сондай-ақ қосымша 21,3 млрд. теңгеге өнім өндірілді» дейді облыс әкімінің баспасөз қызметі таратқан мәліметте.
— Барлық аудан және қала әкімдері мен басқарма басшылары мемлекеттік көрсетілетін қызметтердің сапалы, заңмен белгіленген мерзімінде орындалуын қамтамасыз етіп, қызметкерлердің кәсіпкерлік субъектілері мен жеке тұлғалармен қызметтен тыс уақытта ретсіз араласуын болдырмасын,- деген Н.Нәлібаев кәсіпкерлік саласында бөлінген қаражаттың мақсатты жұмсалуын қатаң бақылауға алуды тапсырыпты.
Н.Меңдібай
