Бүгінде тұрғын үйді басқару реформасына өзгеріс енгізілді. Енді меншік иелерінің бірлестігі және жай серіктестік жүйесі өз жұмысын бастамақ. Өйткені, аталғандардың артықшылығы айқын, бағыты бағдарлы болып отыр. Әйтпесе, жекеменшік пәтер иелері кооперативтері жұмысының жөнсіздігі, қызмет көрсету деңгейінің төмендігі тұрғындардың көңілін қалдырған. Талапқа сай нәтиже болмаса істің кері кететіні де белгілі ғой. Тіпті, күрделі жөндеу жұмысын қажет ететін, қирауға шақ қалған үйлерге назар аударылмаса, жиналған қаражат жымқырыла берсе, іс алға бассын ба? Мұндай келеңсіздікті көрген тұрғындар да көз жұмып отырмайтындығы ақиқат. Осы тәріздес түйдектелген һәм тізбектелген мәселелер түйінін шеше алмаған соң, Мемлекет басшысының пәрменімен басқару жүйесі өзгерген болатын. Жаңа жүйелердің жұмысы жөнінде Өңірлік коммуникациялар қызметінде өткен баспасөз конференциясында айтылды.
Тұрғындардың талабын тыңдап, көпшіліктің қалауын ескерген соң өзгерістің оңды болғаны ләзім. Себебі, сан соғып қалғандар өкінішін білдіріп өтініш жазғанда атқарылмаған жұмыс бірден аңғарылмақ. «Тұрғын үй қатынастары туралы заңнамаға сәйкес кондоминиум объектісін басқаруды жүзеге асыру бойынша облыста меншік иелерінің бірлестігі және жай серіктестік құру жұмыстары жүруде. Облыс бойынша 1222 көпқабатты тұрғын үйдің 913-і жаңа басқару жүйесімен құрылды. Қалған 309 көпқабатты тұрғын үйге коммуналдық меншікте болуына байланысты басқару ұйымдары талап етілмейді» деді облыстық энергетика және тұрғын үй-коммуналдық шаруашылық басқармасы басшысының орынбасары Қайсар Мұстафаев. Яғни, «бір үй – бір бірлестік – бір есеп шот» қағидаты бойынша «Мүлік иелерінің бірлестігі» коммерциялық емес ұйымының жаңа нысанын құру жолымен басқару органдарының қызметін реттеу жүзеге асуда. Сайып келгенде, жаңа жүйенің тұрғын үйлерге сапалы қызмет көрсететініне сенім мол. Пәтер иелері кооперативтеріне қарағанда меншік иелері бірлестігінің ерекшелігі – күрделі жөндеуге ақша жинауға мүмкіндік алады. Өйткені, көпшіліктің көңілі толмайтын алғашқы жүйеде ортақ шотта қаражат жиналғанымен, қаржыны кім қалтаға басып яки қалай жұмсалатындығынан бейхабар болатын. Яғни, оны зерделеп, бақылап отыру қиын болған. Енді, тұрғындарға ақшаның мақсатты жұмсалуын қадағалай алатын және басқа да мүмкіндіктер туды. «Мүліктің меншік иелерінің бірлестігі және жай серіктестік құрудың артықшылығы – сіздің қаражатыңыз тек сіздің үйіңізді күтіп ұстауға жұмсалады. Жинақ шоттары сіздің үйіңізге бекітіледі. Бос тұрғын емес үй-жайларды, жертөлелерді жалға беруден, жарнамадан және басқалардан табыс алу мүмкіндігі бар. Сондай-ақ, жергілікті бюджет қаражаты есебінен сіздің үйіңізге техникалық тексеру жүргізіледі. Жергілікті бюджет қаражаты болған жағдайда қайтарымды негізде сіздің үйіңіздің лифтілерін жөндеу мен ауыстыруды, ұйымдастыруды және қаржыландыруды жүзеге асыруға құқылы» деді тұрғын үй қатынастары және экономика бөлімінің басшысы Айгүл Ильясова.
Барлық атқарылар ауқымды іс, тындырылған тынымды тірлік тікелей тұрғынмен байланысты болғандықтан арнасын өзгерткен жұмыстар өз жемісін беруі тиіс. Әйтпегенде, шығарылған шешімдер, берілген бұйрықтар өте көп. Қ.Мақсұтұлының айтуынша, кондоминиум объектісінің ортақ мүлкін күтіп-ұстау үшін жинақ шоттарын ашу, көп қабатты тұрғын үй шығыстарының ең төменгі мөлшерін жұмсау жұмыстары жүргізілуде. Сондай-ақ, туындаған мәселелерге байланысты басқарма тарапынан жаңа басқарудың толыққанды жүзеге асырылу уақытын жыл аяғына дейін созуға ұсыныстар жолданған екен. Әйтеуір, жұртшылық жүйенің жақсылығын көрсе игі. Айтылып-айтылып қалатын сөзден гөрі қарекеттің қарқыны байқалса, кәнекей!
Замира ҚОНЫСЖАН
