Мемлекетіміз білім саласына көңіл бөліп, болашақ ұрпақтың білікті де парасатты, зерек те зейінді болып өсуіне аса назар аударып келеді. Әрбір оқушының мектеп табалдырығынан аттап, қатарластарымен бірге білім алуына қаржысын аяған емес. Осы тұрғыда жаңа оқу жылына әрбір мектеп мұғалімі жоғары дайындықпен келеді. Ал, жаңа оқу жылына тың серпіліспен келетін ұстаздарды қандай өзгерістер күтіп тұр, оларды мемлекет тарапынан тағы қандай жаңалықтар қарсы алмақ, бұл туралы биылғы тамыз мәслихатында кеңінен айтылды.
Сыр елінде мыңға жуық педагогтың қатысуымен облыстық тамыз кеңесі өткізіліп, білім саласының өзекті мәселелері қаралып, үздік ұстаздар марапат мінберінен көрінді. Алқалы жиынға облыс әкімі Нұрлыбек Нәлібаев, ҚР оқу-ағарту вице-министрі Ғани Бейсембаев, ҚР Парламент Сенатының депутаттары Мұрат Бақтиярұлы, Ақмарал Әлназарова, мәслихат депутаттары және сала ардагерлері, мектеп директорлары мен ұстаздар қатысты.
«Білімді ұлт: терең білім, еңбекқорлық және отаншылдық қасиет» тақырыбында өткен педагогтер кеңесінде Нұрлыбек Нәлібаев мемлекет әрдайым ұстаздарға лайықты деңгейде қолдау шараларын жүргізетінін жеткізді.
— Президент бастамасымен соңғы жылдары білім саласында ауқымды реформалар жүзеге асырылып, педагог мәртебесін көтеруде тың бастамалар қолға алынды. Бұл өз кезегінде ұстаздарға деген айрықша құрмет, білім саласына жасаған ерекше қамқорлық.
Биылғы жылы білім саласына бөлінген қаржы 204,8 миллиард теңгеге жетіп, облыс бюджетінің 42,8%-ын құрады. Бұл былтырғы жылмен салыстырғанда 17%-ға артық. Тиісінше, алдағы жылдары білім саласына бөлінетін қаржы көлемі арта бермек.
Жаңа мектеп салу, апатты және үш ауысымды жою – білім саласындағы басым бағыттардың бірі. Арал ауданы Тоқабай ауылындағы апатты мектеп әкімдіктің ұйымдастыруымен жеке инвестор есебінен салынуда. Қазалы ауданындағы №94 мектептің жоба-сметалық құжаттары әзірленуде.
Аймақтағы демографиялық өсімді ескере келе, алдағы 3 жылда аймақта 20 мемлекеттік мектептің іргетасын қалаймыз. Бүгінгі күні демеушілердің өз қаражатына салынған жеке мектептердің желісі 20-ға жетті. Алдағы жылдары инвестор есебінен тағы 12 мектеп салынатын болады. Ал, биылдың өзінде облыста 6 жаңа мектеп бой көтереді, оның 2-еуін келер айда, қалған 4-еуін жыл соңына дейін пайдалануға береміз. Ал, аймақтағы 6 мектептің үш ауысымға өту қаупі бар, ал 4 апатты деп танылған 3 мектептің мәселесі биыл шешімін таптық. Оның екеуін қыркүйекте табыстаймыз.
Орын тапшылығы жағдайының алдын алу үшін жыл аяғына дейін 1,6 млрд. теңге көлемінде қаладағы Абай мектебіне 550, №101 мектепке 375 орынға лайықталған қосымша құрылыс салынатын болады. Осы арқылы көп жылдардан бері шешімін таппаған бұл мектептегі үшауысымға ауысу қаупіндегі мәселе түбегейлі шешіледі,-деді Н.Нәлібаев.
Басқосудан білгеніміздей, келесі жылы облыс орталығындағы бала саны көп №3 лицейге 300, №264 мектепке 600 орындық қосымша ғимарат құрылысын бастамақ. Бұған облыстық бюджеттен жоба-сметалық құжаттарды әзірлеуге қажет қаржы бөлінген. Сонымен бірге тағы бір жағымды жаңалық, 2024 жылы Арай, СПМК-70 мөлтек аудандары мен Сырдарияның сол жағалауында жаңа мектептер бой көтеретін болады.
Соңғы жылдары мұғалім мәртебесін көтерудің барлық алғышарттары жасалып, материалдық ынталандыру аясы кеңейіп келеді. 2020 жылдан ұстаздарға қажетті үстемақы төленуде, биыл бұл мақсатқа републикалық бюджеттен — 52,4 млрд. теңге қаржы бөлінді. Келесі жылы педагогтер жалақысы тағы 25 пайызға көбейеді. Бұл – мұғалімдерді әлеуметтік қолдаудың нақты бір қадамы.
— Біз үшін бала өмірі, оның қауіпсіздігі қашанда маңызды. Үкіметтің кеңейтілген отырысында балабақшаларға лицензиялау тәртібін қайта енгізу міндеті қойылды. Мәселе бала қауіпсіздігіне тікелей қатысты болғандықтан, бұл міндеттер бірінші кезекте орындалу тиіс.
Бүгінде облыстағы 601 балабақшаның 439-ы, яки 73%-ы жеке сектордың үлесінде, яғни басым бөлігі шағын және орта бизнес өкілдеріне тиесілі. Ендігі кезекте балабақша құрылтайшылары да жоғары жауапкершілік танытып, қауіпсіздік мәселесіне жете мән беруі керек. Бұл ретте, облыстық білім басқармасы мен білім саласында сапаны қамтамасыз ету департаментімен бірлесіп, қыркүйек айынан бастап көтерілген мәселеге қатысты тиісті дайындық шараларын жүргізуді қолға алуы тиіс,- деді облыс басшысы.
Шындығында, балабақшалар төңірегінде соңғы уақытта жағымсыз ақпараттар көптеп кездесіп жүр. Соны болдырмау мақсатында тиісті шаралар қабылдау, алдын алу жұмыстарын жасау қажет. Облыс әкімінің бұл мәселеге мән беріп, бала қауіпсіздігін назарда ұстауын тапсыруы орынды.
Соңғы уақытта ел арасында сөз болып жүрген әңгіме білім шаңырақтарының тазалығы. Облыс басшысының тамыз кеңесінде: «Білім саласы қай кезде де ашықтықты қажет етеді. Соған сәйкес, сыбайлас жемқорлықты болдырмау және оның алдын алу– баршамыздың міндетіміз. Өйткені бір ғана сыбайластық фактісі біздің жасап жатқан жұмысымыздың нәтижесін жоққа шығарады. Сондықтан білім беру ұйымдарының басшылары кадр мәселесіне келгенде, азаматтық ұстаным мен адалдық принципін ұстануы керек» деп, қатаң ескертуінің астарынан көп жайтты аңғаруға болады.
Біріншіден, білім беру жүйесіндегі ротация жайы. «Білім беру жүйесіне ротациялау тәртібін енгізу – уақыт талабынан туындаған міндет. Ашығын айтқанда, бізде бір орында 10-15 жыл және одан да көп қызмет атқарып жүрген директорлар аз емес. Әрине, олардың арасында өз жұмысын жетік білетін, білім беру ұйымдарының дамуына елеулі үлес қосып жүрген басшылар да бар. Әлеуметтанушылардың пікірінше, мекемені ұзақ жылдар басқару адамның бастамашыл идеясы мен жұмысқа деген ынтасын төмендетеді. Сәйкесінше, басшыларды ротациялау сала дамуына жаңаша леп, тың серпін береді. Осы мәселеге қатысты облыстық білім басқармасына заң шеңберінде ротациялау рәсімдерін 1 қазанға дейін аяқтауы тиіс»,- деп қадап айтты әкім.
Екіншіден, саладағы жемқорлықтың алдын алу. «Облыстық білім басқармасына сыбайлас жемқорлыққа жол бермеу және оның алдын алу бойынша мүдделі органдармен бірлескен тиімді жұмыстарды жүргізуді және мұғалімдерді конкурс тәртібімен жұмысқа қабылдауды тапсырамын. Білім берудің үздік тәжірибесін лайықты жалғастыра келе, ұлттық құндылықтар мен тұлғатану институтын қалыптастыруға тиіспіз. Бұл — бүгінгі буынның біліміне жауапты ұстаздарды ғана емес, бауыр еті баласы үшін барын беретін ата-аналарды да алаңдатуы қажет. Сондықтан құндылықтарға негізделген білім арқылы парасат биігіне жетеміз. Бұл ретте, биыл еліміз бойынша кең ауқымдағы аталып өтіп жатқан Ахмет Байтұрсыновтың, Мұхтар Әуезовтің, Ғани Мұратбаевтың мерейтойлық шаралар балалардың рухани танымын тереңдетуге жол ашады»,- деп, тереңнен ой қазғады облыс басшысы.
Әдетте, өңірдегі қайбір іс-шарада мектеп оқушылары жүреді. Ұйымдастырылып жатқан шаралардың сапасына кейде көңіл де бөлінбейді. Оқушы сол үшін сабақтан босатылып, мезі болған шараларда тұрады. Мәселенің бұл жағы да облыс басшысын алаңдатса керек, «облыстық білім басқармасы мәдениет және спорт басқармасымен бірлесіп, жаңа оқу жылынан бастап шаралардың нәтижелі әрі балалар үшін лайықты ұйымдастырылуын қамтамасыз етулері қажет» деді жиында.
Мұғалімдерді әлеуметтік көтермелеу мәселесі назардан тыс қалмайды. Ел Президенті Қасым-Жомарт Кемелұлы Тоқаев халықаралық пән олимпиадаларының жеңімпаздарына бір реттік қаржылай сыйақы тағайындады. Балалардың ұстаздарында моральдық және материалдық тұрғыдан ынталандырды. Қызылорда облысы бұл жағынан алда тұр, алдағы уақытта да дарынды балаларды қолдау саясаты лайықты деңгейде жалғасатын болды. Әкім бұл жағына да мән берді:
— Мен басқосу алдында Сыр өңірінің талантты жеткіншектерімен кездесіп, пікірлестім, жобаларымен таныстым. Дарынды балалар келешекте отандық ғылым саласындағы инновациялық идеяларды дамытып, тәуелсіз елімізге қызмет ететін болады. Оларды қолдаудың кешенді шараларына ұдайы көмек береміз.
Облыстық білім басқармасына экономика және қаржы басқармасымен бірлесіп, дарынды шәкірттер мен олардың ұстаздарын қаржылай қолдауға қатысты ұсыныс енгізуді тапсырамын.
Облыс әкімін жазғы тынығу лагерьлерінің жайы да ойландырғанға ұқсайды. Бірнеше ай бұрын жазғы тынығу лагерьлерін аралап, балалардың жағдайымен танысқан ол тамыз кеңесінде өз ойын ортаға салып, нақты тапсырмалар берді.
— Шән мәнінде, бізге әлі де болса, лагерь жұмысын жандандыру қажет. Қызметі жыл он екі айға лайықталған «Қамбаш» және «Талдысу» лагерьлері тек жазғы маусымда ғана жұмыс жасауда, қалған уақытта бос. Балалардың білім қарқынына ілесіп, таным көкжиегінің кеңейгенін қаласақ, лагерьлердің жыл мезгілдерінде де балаларға барынша тиімді қызметін ұйымдастыруға міндеттіміз.
Менің тапсырмаммен биылдан бастап аталған екі лагерь жыл бойы жұмыс жасайтын болады. Мұнда аймақтың дарынды балалары республикалық, халықаралық олимпиадаларға дайындалып, үздік ұстаздардың тәлімін алып, дәрісін тыңдайды.
Бұған облыстық бюджеттен 86 миллион теңге қаржы қарадық. Келешекте бұл қаржы еселеп қайтады. Осы ауқымды жұмыстардың жалғасы ретінде — Қызылорда қаласы, Сабалақ саяжайындағы 150 орындық қосымша білім беру орталығы мен Қармақшы ауданындағы тынығу лагерін қайта құрылымдап, дарынды балаларға арналған мектеп-интернат ретінде келесі жылы пайдалануға береміз. Облыстық құрылыс басқармасына нысанның сапалы қабылдануын және құрылыс жұмыстарына қатысты мердігерлермен бірлескен тиісті жұмыстарды аяқтауды тапсырамын.
Түрлі әлеуметтік санаттағы отбасылардан шыққан балаларды дер кезінде қолдау бағытында өңірде пәрменді шаралар қабылдануда. Биыл жергілікті бюджеттен жалпыға міндетті оқу қорына – 3,8 млрд. теңге бөлдік, оның 1,1 млрд. теңгесі бір реттік қаржылай көмек көрсетуге, 2,5 млрд. теңгесі ыстық тамаққа қаралды. Ал, қалған қаржы балалардың сауықтыру-тынығу бағытындағы шараларға жұмсалады,- деп, облыс әкімі балалар үшін жұмсалатын қаржыларды жасырмай айтып берді.
Биылғы Балалар жылында Сыр бойында жаңалық көп. Облыс әкімі Н.Нәлібаев оқу-ағарту вице-министріне жасалып жатқан жұмысарды тізбелеп шыққанда, ризашылықпен қабылдады.
— Биылғы жылға «Балалар жылы» деп атау беріліп, айдар тағылғанымен, бүлдіршіндерге қамқорлық бір жылдың ауқымымен шектеліп қалмасы анық. Балалар жыл он екі ай үлкендердің көз алдында, елінің қамқорлығында болуы тиіс. Біз балалардан ештеңе аямаймыз. Балалар үшін қомақты сый — Қызылорда қаласында заманауи үлгідегі Оқушылар сарайын салу бойынша «ҚазМұнайГаз» ұлттық компаниясы басшылығымен келісімге келдік. Нысан Сырдария өзенінің сол жағалауында бой көтеретін болады.
Мерейлі жылы балаларға тарту ретінде демеушілер есебінен 1 млрд. теңгеге қаламызда 50-ге тарта спорт алаңын, аудандарда 600 млн. теңгеге 30-дан астам ойын алаңын салудамыз. Бұл – балалардың бос уақытын тиімді пайдаланудың жақсы мүмкіндігі,- деді.
Конференцияда сөз алған спикерлер білім саласындағы соңғы өзгерістерге тоқталып, дарынды балаларды қолдау, білім берудің ортақ мәселелерін талқыға салып, идеяларымен бөлісті. Вице-министр Ғани Бейсембаев қызылордалық оқушылардың халықаралық деңгейдегі ТIMSS және PISA көрсеткіштерінде жоғары нәтижеге жеткенін атап өтті. Сондай-ақ, облыстық мәслихат хатшысы Наурызбай Байқадамов соңғы жылдары салаға енген вертикалды басқару жүйесін қайта қарап, қала, аудандық білім бөлімдерінің құзіреттілігін қайта қайтару туралы ұсыныс білдірді.
Мінбеге көтерілген сенатор білім саласындағы кей проблемаларға тоқталып, оны бірлесіп шешу жолын ұсынды. Ал, білім басқарманың басшысы Мейрамбек Шермағанбет алдағы жаңа оқу жылында болатын жаңалықтармен бөлісті.
— Алдағы оқу жылында «Алтын белгіге» үміткерлер «Алгебра және анализ бастамалары» пәні бойынша қорытынды аттестаттаудан «Назарбаев Зияткерлік Мектебі» базасында өтеді. Педагогтар үш жылда кемінде бір рет біліктілік арттыру курстарына қатысуы тиіс. Мұғалімдердің біліктілігін арттыруда өзара тәжірибе алмасу өте маңызды. Ұстаздар үнемі ізденіс үстінде болуы қажет. Министрлік тарапынан біліктілік арттыру сертификаттарының бірыңғай базасы жасақталатын болады. Әрбір білім беру ұйымдарында педагогтардың біліктілік арттыру курсынан өту мерзімдеріне байланысты перспективалық жоспарлар әзірленуі керек. Бұл мәселе білім бөлімдерінің жіті бақылауында болуы тиіс.
Бүгінгі күні аймақта 17 мемлекеттік балабақша мен 24 мектепте басшылардың бос орындары қалыптасып отыр. Бос вакансияларға конкурстар өткізілген, дегенмен үміткерлердің тестілеу кезеңінен өте алмау себебінен басшылар тағайындалмаған. Осыған сәйкес, басқарма мен білім бөлімдерінің алдында білім беру ұйымдары басшыларының кәсіби дамуы үшін мансаптық өсу, басшылардың кадрлық резервін қалыптастыру, тәлімгерлік институтын дамыту мәселелерін жандандыру міндеті тұр. Осы ретте, басшыларды тағайындау мен оларды аттестаттау және ротациялаудың жаңа тәртібі бойынша жұмысты жалғастыратын боламыз
Балалар жылы шеңберінде ерекше білім алуды қажет ететін балалар мәселесі де назардан тыс қалмады. Медициналық қызметтермен бірлесіп, балалардағы бұзушылықтарды ерте анықтауды және ерекше білім берілуіне қажеттілігі бар балаларды ерте түзетуді қамтамасыз ету маңызды. Мұнда көп нәрсе психологиялық-медициналық-педагогикалық консультациялар мен психологиялық-педагогикалық түзету кабинеттерінің үйлесімді және кәсіби жұмысына байланысты. Облыста инклюзивті білім беруді дамыту мақсатындағы 2020-2022 жылдарға арналған арнайы Жол картасы сәтті іске асырылуда, оған 4 млрд. теңге қаржы қаралды. Биыл қосымша мектептерден 28 инклюзивтік кабинет, 2 ресурстық орталық, 47 балабақшада логопункт ашылады. Осылай аймақта 77 білім беру ұйымында инклюзивтік білім алуға қолайлы жағдай жасаймыз. Бұл мақсатқа жергілікті бюджеттен 405 млн. теңге қаржы бөлінді,- деді.
Мойындауымыз керек, кейінгі кезде мектеп оқушыларының тәрбиесі босаңсып кетті. Бала бір жақта, ата-ана бір жақта қалды. Біліммен қатар тәрбиені де ата-ана мұғалімге ысырып қойды. Оның бір шешімін ойластырмаса, кінәлілерді қолдан жасайтын түріміз бар. Осы орайда білім басқармасының басшысы Мейрамбек Зинабдинұлы тамыз кеңесінде бала тәрбиесіне көңіл бөлуде ата-аналардың белсенділігін арттыру керектігін айтты. Соған сәйкес ұсыныстарын да жеткізді.
— Бала тәрбиесінде мектеп пен отбасының өзара әрекеттесуі маңызды. Балалардың мүддесі үшін осы екі ортада ынтымақтастық қажет. Мектеп пен ата-аналардың өзара байланысын ұйымдастырудың жаңа форматын енгіземіз. Жаңа формат ата-аналар қауымдастығымен жеке, топтық, ұжымдық деңгейлерінде жұмыс бағытын айқындайды. Білім беру ұйымдарында әжелер, аталар, әкелер, аналар, ағалар мектебін жандандыру ата-аналардың бала тәрбиесіндегі рөлін арттырады.
Ата-аналардың мектеп пен сыныптың білім беру процесіне қатысуы арқылы дұрыс түсінік қалыптастыру, балаларға мамандық таңдауға бағыт көрсетуде маңызы ерекше. Осы ретте, білім беру ұйымдарындағы ата-аналармен жүргізілетін жұмыс барысымен олардың оқу процесіне қатысу белсенділігін арттыру бағытындағы жұмыстарды жандандыру маңызды.
Сонымен бірге, белсенді тәрбие жұмысы арқылы оқушылардың бойындағы құндылықтар жүйесін қалыптастыруға ерекше назар аударуымыз қажет. «Оқуға құштар мектеп», дебаттық қозғалыстар мен «Мектеп театры», «Мектеп парламенті» атты өзін-өзі басқару жобалары ары қарайда іске асырылып, «Жас ұлан», «Жас қыран», «Жас сарбаз» қозғалыстары, волонтерлік бағыттағы тәрбие беру жұмыстары өз жалғасын табады.
Бүгінгі күні облыстағы 61 қосымша білім беру ұйымына 53959 бала қамтылған. Қосымша білім берудің аясын кеңейту мақсатында өңірдегі 295 мектеп жанынан 2170 спорттық секция және 1942 шығармашылық үйірме ұйымдастырылған. Осыған сәйкес, мектептерде білім алушыларды домбыра, шахмат үйірмелеріне көптеп тарту, олардың мәдени және интелектуалдық дамуына жоғары әсер етеді. Жаңа оқу жылында осы бағыттағы үйірмелерді дамытуға басымдық беріледі,- деді басқарма басшысы.
Педагогтер жиында алғаш рет халықтың құрметіне бөленген қос ардагер ұстазға ілтипат білдірілді. Білім беру саласына елеулі үлес қосқан, саналы ғұмырын ұрпақ тәрбиесіне арнаған ардагер ұстаздар Төлепберген Қасымов пен Марк Подольский марапат биігінен көрінді. Облыс әкімі Нұрлыбек Нәлібаев қос ұстазға Қызылорда облысының «Құрметті азаматы» атағын табыстады.
Төлепберген Смағанбетұлы «КСРО – халық мұғалімі», «Кәсіптік білім саласының еңбегі сіңген қызметкері» атағымен марапатталған. Бірнеше мәрте КСРО Жоғарғы Кеңесінің, КСРО-ның ғылым академиясының құрметтеріне ие болған. Төлепберген Қасымовтың есімі КСРО-ның үлкен энциклопедиялық сөздігіне, мемлекеттік Құрмет кітабына енген. Ал, Марк Захарович — білікті маман, сауатты басшы және шебер ұйымдастырушы ретінде аймақтың дамуына үлес қосқан қайраткер. Білім саласына сіңірген ерлеулі еңбегі үшін «Парасат» ордені мен «Ерең еңбегі үшін» медалімен марапатталған.
Тамыз кеңесінде көпшілік күтпеген марапат болды. Өткен аптада қала орталығындағы «Универсам» шағын ауданында оқыс оқиға орын алып, екі жарым жастағы сәби ашық тұрған кәріз құдығына түсіп кеткен еді. Аралдан арман қуып, оқуға келген 15 жастағы Арман Аманжолов оқиға сәтінде көзсіз ерлікке барып, баланы құдықтан алып шыққан болатын. Бозбаланың батырлығына тек жерлестері ғана емес, тұтас ел болып қуанып, ерлігіне тәнті болған-ды. Педагогтардың тамыз кеңесінде облыс әкімі Нұрлыбек Нәлібаев ерік-жігерімен тәуекелге барған аралдық Арманға пәтер кілтін табыс етті.
— Мемлекет басшысы тарапынан азаматтарымыздың мұндай ерекше батыл қимылдарын елеусіз қалдырмай, өзгелерге үлгі ету туралы ұстанымы аясында бүгін Арман батырға, оның ата-анасына барша Сыр елінің атынан зор ризашылығымызды білдіремін. Бүгінде аймағымызда жомарт жүректі жанашыр азаматтар жетерлік. Сол демеушілердің атынан бүгінгі бейбіт күннің батыры болған бозбалаға баспана кілтін табыс етеміз. Қарапайым ғана ауыл баласының бұл ерлігі өзі сияқты қатар жүрген балаларға үлгі болсын, елдің ішінде осындай азаматтар көп болсын,-деді облыс әкімі.
Арман Аманжолов Арал ауданы, Бөген ауылында 2007 жылы дүниеге келген. 5 ағайынды, 2 тәтесі, 2 ағасы бар. Әкесі жұмыссыз, анасы мектеп асханасында жұмыс істейді.
Тамыз кеңесі Сыр бойы ұстаздарына шабыт сыйлайтын, еңбекке құлшындыратын басқосуға айналып келеді. Бұл жолы да соның куәсі болдық. Жыл сайын өткізілетін конкурс нәтижесінде үздік білім беру гранты ауыл мектебіне бұйырып, Ұзақбай Қараманов атындағы №262 мектебі 34 миллион теңгенің сертификатын жеңіп алды.
Көпшілік біледі, өткен жылдан бері үздік ұйымға берілетін қаржы екі есеге ұлғайды. Бұған дейін өңірде 7 мектеп 17 миллион, өткен жылы 1 мектеп 34 миллион теңгенің сертификатын иеленген еді.
Облыс әкімі Нұрлыбек Нәлібаев жеңімпаз атанған Арал қаласындағы Ұ.Қараманов атындағы №262 мектеп-гимназиясының директорына арнайы грантты салтанатты түрде табыстады.
Бұл мектеп – республикалық «100 мектеп, 100 аурухана» бағдарламасы аясында 1200 орындық оқушыға арнап салынып, 2009 жылы пайдалануға берілген білім ордасы. Білім мекемесі – серіктес мектеп ретінде қарамағында аудандағы 15 мектеппен өзара ынтымақтастық орнатқан облыстағы инновациялық үлгідегі мектептердің бірі.
Жиында облыс әкімінің грантын иеленген 100 оқушының бірқатарына грант табыстады. Өңір басшысы үлкен өмірге қадам басқан жастарға сенім білдіріп, терең білім алуға шақырды.
Ұстаздардың төл жиынында еңбегімен көзге түсіп, үздік шәкірттерімен танылған 3 мұғалім «Ы.Алтынсарин» төсбелгісімен, 1 ұстазға «Білім беру ісінің Құрметті қызметкері» төсбелгісі тағылды. Мұнан бөлек, «Еңбек ардагері», «Мейірім» төсбелгісінің иегері марапатталып, 5 мұғалімге облыс әкімінің Алғыс хаты берілді.
Н.Көбегенұлы
