Аурудың жасты талғамайтыны, мезгіл таңдамайтыны көпке аян. Айтып келмейтін аурудың сүлесоқ күйге түсіріп, құр сүлдерді қалдыруы бір-ақ сәт. Ес білетін ересекті айтпағанда құндақтағы нәрестенің өзі шырқырап жылағанда шыбын жанын көзіне көрініп шырылдап кетесің. Әсіресе, түн жарымында аурудың асқынып алқымнан алуы тіптен қиын. Мұндайда сырғып өтетін уақыт та тоқтап қалғандай, жанды қоярға жер таппай таңның тез атуын тілеуге тура келеді. Сондықтан қиналыстан дегбірі қашқандар дереу жедел жәрдемге хабарласып, көмегіне жүгінеді. Бірақ, жедел жәрдем қызметінің сапасына айтылған сын біраз болғандығы бесенеден белгілі. Межелі орнына мезетінде жетпей, әуре сарсаңға салатынына науқастар налитын. Жеделдіктің жайбасарлыққа ұласуы аурудың адамды тұсаулап, жағдайын қиындататыны жасырын емес. Шақырғанда шақырымнан жете алмай жатыр деп жақтағанменен, қоңырау шалғанда ананы-мынаны сұрап титыққа тиетіні тағы бар. Жаның қысылып қыл үстінде тұрғанда өмірбаянды баяндап тұруға да әл-дәрмен керек шығар. Хош. Қызмет пен қызметкерді, сала мен сапаны сын тезіне салып сілкіп алғымыз жоқ. Тек жалпақ жұрттың талқысына көп түсетін мәселені тілге тиек етіп отырмыз.
Дөп сөзбен датталатын, алғыспен ақтап алуға болатын ауқымы кең түйдек мәселе бұл. Бірі қоңыраудың көп түсетіндіктен кешеуілдеп баратынын яки жол сапасына қатысты жете алмай айналып жүретінін жеткізсе мейлі деп көндігерсің. Бірақ, кейде себепсізден сенімнен айырылатын қызмет сапасына көңілдің көншуі қиын-ақ. Оның үстіне, жаңару мен жаңғырудың кезеңіне қадам басқан соң қарышты дамудың да қарқыны байқалуы тиіс. Яғни, жедел-жәрдем көліктерінің саны артса, бірін-бірі күтпей, жәрдем керек жерге жедел жететіні анық. Сондықтан мұның өзі түйдек мәселенің түйінін шешуге ықпал етеді. Сонда науқас та шағымданбай, шамданғаннан туындайтын шиелініс азаяр. Медицина қызметкерлеріне айтар алғыс жоқ емес, тек тиісінше өмір мен өлім таразыға түсетін салада салғырттық болмағаны ләзім. Аурумен арпалыстың азап екенін аңғарып, деннің саулығы бәрінен маңызды екенін алға тартатын басшылықтың жедел жәрдем көлігін табыстауы қуанарлық жайт болды. Облыс әкімі Нұрлыбек Нәлібаев медицина қызметкерлеріне салтанатты түрде 20 жедел жәрдем көлігінің кілтін табыстады. Көліктердің басым бөлігі — ауылдық елді мекендерге бағытталды. Аймақ басшысы дәрігерлерді құттықтап, Сыр өңірінде медицинаның ілгері дамуына жан-жақты қолдау көрсетілетінін жеткізді.
— Біле білгенге, жедел жәрдем қызметінде еңбек ететін әрбір дәрігердің адам өмірін сақтап қалуда еселі еңбегі зор. Түрлі тосын жағдайларға тап болып, жол көлік оқиғасында зардап шеккен жолаушыларға мезетінде көмек беру олардың басты ұстанымы. Бұл ретте сала мамандары үшін заманауи үлгідегі автокөліктердің қажеттілігі бар. Себебі соңғы жылдары жедел жәрдем автокөліктерінің басым көпшілігі ескіріп, талап үдесіне сай келмеуде. Бүгін, міне, тұрғындардың талап-тілектерін ескере келе, кәсіпорынға заманауи үлгідегі 20 жедел жәрдем реанимобилі табысталады. Жергілікті бюджеттен 1 қызметтік автобус пен арнайы техника да беріледі,- деді Н.Нәлібаев.
Іс-шарада қоғам қайраткері, Қызылорда облысының Құрметті азаматы Тұрғанбай Маханов әріптестерін құттықтап, ізгі тілектерін арнады. Ал, жаңа көлікті тізгіндеген мамандар бұл игілікті іске алғысын білдірді.
Реанимобильдер «Өнеркәсіпті дамыту» қорымен лизинг арқылы алынды. Айта кетейік, биыл Қазалы ауданының Әйтеке би кентінде 80 мыңнан аса халыққа бастапқы медициналық-санитариялық көмек көрсететін 250 келушіге арналған аудандық емхана ғимараты іске қосылса, амбулаторияға деген қажеттілігі бар Арал ауданы Тастүбек және Қазалы ауданының Жұбан елді мекендерінде 2 медициналық бекет пайдалануға берілді.
Сонымен қатар, тамыз айында шаһарымыздың сол жағалауынан құны 2,7 млрд. теңгені құрайтын облыстық қан орталығының іргетасын қалау рәсімі өтті. Мұнан бөлек, алдағы 2 жылда «Ауылдық денсаулық сақтауды жаңғырту» ұлттық пилоттық жобасы аясында құны 9,7 млрд. теңгеге 27 жаңа нысан салынады. Оның басым бөлігі дәрігерлік амбулатория болмақ. Ал, келер жылы 36,4 млрд. теңгеге Қызылорда қаласынан көпсалалы аурухана мен емхана құрылысын басталмақ. Жұмысты жүргізу үшін келер жылға республикалық бюджеттен 750 млн. теңге қаражат бөлу туралы шешім қабылданды.
Иә, бас ауырып, балтыр сыздаса немесе денені дерт дендегенде халықтың іздейтіні білікті ақ халаттылар. Асылында, аурухана мен емхананың да құрылысын бастап, көптеп ашылатыны жанға медет болғандай. Қайткенмен де, халық өмірі басты байлық болғандықтан, саулыққа бей-жай қарау сорақылық шығар. Ағзаны ауру меңдегенде жанды шүберекке түйіп, көл болған көз жасты тыйып, сенімін серігі еткендердің емхана іздеп сеңделмегені, үмітінің үзілмегені керек. Жедел жәрдем көліктерінің көбеюі көңілді қуантып қойды. Әйтеуір, медицина саласындағы кем-кетік ретімен шешімін тапса, шикілік те шегінен шықпас.
Замира ҚОНЫСЖАН
