24 наурызда Жосалы кентінде Қармақшы ауданы әкімінің қолдауымен, Ш.Төлепова атындағы аудандық мәдениет үйі ұжымының ұйымдастыруымен, Ақбалыш ана ұрпақтарының демеушілігімен «Аналарды ардақтайық» жобасы аясында жоғары дәрежелі ұстаз, тыл ардагері Ақбалыш Жалғасованы еске алуға арналған «Ұстаз-Ана» атты облыстық жазба ақындар мүшәйрасы ұйымдастырылды. Жыл сайын өткізіліп, дәстүрлі жыр додасына айналған тағылымға толы шараға Қызылордадан, Төретамнан, Жалағаштан қонақтар келді.
Алдымен «Анаға тағзым» ескерткішінде басталып, оған Қармақшы ауданының құрметті азаматы, мемлекеттік қызмет саласының ардагері Рзақұл Нұртаев, облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай және аудан әкімі Жандос Еркінбек қатысты. Жиналған көпшілік ескерткішке гүл шоқтарын қойып, аяулы аналардың рухына құрмет көрсетті. Сондай-ақ, ананың ұлылығын дәріптеген әсерлі өлеңдер мен жырлар оқылды.
Мұнан кейін тағылымды кеш аудандық Ш.Төлепова атындағы мәдениет үйінде жалғасын тапты. Рухани кешке облыстың әр өңірінен келген 19 ақын қатысып, бақ сынады.
Жыр додасына жиналған көрермендерге облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай сөз сөйлеп, облыс әкімінің арнайы құттықтауын жеткізді. Сонымен қатар шара барысында ақындар туындыларын көпшілікке паш етіп, Сыр елінің рухани мұрасын дәріптеді.
Иә, ұлағатты ұстаз, тыл ардагері Ақбалыш Жалғасованың жарқын бейнесін ұлықтауға арналған дәстүрлі облыстық жазба ақындар мүшәйрасы ана мен ұстаздың ұлы тұлғасын қатар дәріптеген, өнеге мен парасаттың тоғысқан тұғырына айналды.
— Жыл сайынғы дәстүр бойынша мүшәйраға қатысушы ақындар екі бірдей тақырыпта қалам тербеді. Оның бірі «Ұстаз-Анаға арнау» болса, биыл екінші тақырыпты терең тарихи тамырдан сыр шертетін «Оғыз-жыр» бағытына арнадық. Бұл талап ақындардың тек шеберлігін ғана емес, таным көкжиегі мен тарихи зердесін де сынағандай болды.
Жыр бәйгесіне облыстың «Сен тұр, мен атайын» дейтін сөз зергерлері қатысып, өзара бақ сынады. Әр өлеңде жүрек лүпілі, анаға деген құрмет, ұстазға деген тағзым, сондай-ақ ұлттық рух пен тарихи сана айқын көрініс тапты. Қазылар алқасының талғамынан суырылып шыққан 7 жүйрік ақынға Ақбалыш Жалғасованың ұрпақтары арнайы дайындаған қомақты жүлделер табысталды. Жүлде қорынан бас бәйге 200 мың теңгені құрап, өнер иелеріне құрмет көрсетілді. Ал, қалған 12 ақын да елеусіз қалмай, ынталандыру сыйлықтарымен марапатталды.
Айрықша атап өтерлігі, аудан әкімі Жандос Еркінбекұлы жыр додасының басынан аяғына дейін қатысып, ақындардың өнеріне құрмет танытып, жеңімпаздарды өз қолымен марапаттады. Бұл – өңір басшысының руханиятқа, ұлттық өнер мен әдебиетке деген шынайы жанашырлығының айқын көрінісі,- дейді қазылар алқасының төрағасы Берік Саймағанбетов.
«Сардарлардың сыры бар жанға ашпаған,
Шыңның өзін жер етіп жан баспаған,
Туыла сап тіл қатқан Оғыз қаған,
Түркінің тілін тапқан алғашқы адам!
Тәңір баққан тоқтыдай сый көреді ер,
Күн күйіне оралап күйреген ел…
Қобыз тұрқы секілді Оғыз жұрты,
Жарты әлемді ең алғаш билеген ел!» – деп, тебірене жырлайды Айдар Сайлауов.
Қазылар алқасының мүшесі, «Әлімсақ» журналының бас редакторы, филология ғылымдарының кандидаты Нұрлан Көбегенұлы:
— Жазба ақындар мүшәйрасы жоғары деңгейде өтті. Ұстаз анаға арнаулар ширатылған, «Оғыз-жыр» бағыты бойынша ақындардың ізденгені байқалады. Расында, алға суырылып шыққан ақындар жүлдегер атанды. Аудан әкімінің екі сағатқа созылған жыр бәйгесіне болысып, жастардың жырын тыңдап, соңында бәріне құтты болсын айтып, марапаттағаны сөз өнеріне жанашырлығын танытқандай әсер қалдырды. Өлең тыңдауға келген көрерменнің көптігіне риза болдым. Мүшәйра аяқталғаннан кейін өз әсерлерімен бөлісіп, талқылап жатқаны халықтың рухани толысқанын байқатады. Өлең-жырға қармақшылықтардың ынтасы бөлек екен»,- дейді.
Мүшәйра қорытындысы бойынша жеңімпаздар анықталып, қазылар алқасының шешімімен аудан әкімі Жандос Еркінбек үздіктерді арнайы марапаттады. Сонымен қатар ұлағатты ұстаз, тыл ардагері, ел анасы Ақбалыш Жалғасованың ғибратты ғұмыры, тағдыр жолы ел-халыққа үлгі-өнеге екенін айтып өтті.
7 жылдан бері дәстүрлі түрде өткізіліп келе жатқан, саналы ғұмырын ұрпақ тәрбиесіне арнаған ұстаз-ананың өнегелі өмірін ұлықтау мақсатында ұйымдастырылған бұл тағылымды шара жалғасын таба бермек.
Б.Бағдатұлы
