Ұлттық құндылықтарымыздың бiрi — қасиетті қара домбыраны дәріптеу мақсатында Сыр өңірінде iс-шаралар жоғары деңгейде ұйымдастырылды. Аудан орталықтары мен ауылдарда түрлi мәдени-көпшілік жиындар мен кештер өткiзiлді. Ұлттық домбыра күні қарсаңында Құрманғазы Сағырбайұлының 200 жылдығына арналған «Күй мен күйшi» атты халық аспаптар оркестрінің күйші-концертмейстерлерінің республикалық фестивалі өтті. Мерекелік кеште «Қара жорға», «Сарыарқа», «Адай» секілді күйлер орындалып, көрерменге рухани азық, көтеріңкі көңіл-күй сыйлады. Оның қорытындысымен Тұңғыш Президент саябағында гала-концерт ұйымдастырылды.
Маусым айының аяғынан бастау алған атаулы мерекеге арналған республикалық аламан айтыс, айтыс олимпиадасы, еліміздегі күйші-концертмейстрлердің фестивалі еліміздің түкпір-түкпірінен келген күйшілердің қатысуымен өткен гала-концертпен жалғасты. Қазақы дәстүрмен безендірілген сахнада еліміздің әр өңірінен келген дәулескер күйшілер, атап айтқанда, Солтүстік Қазақстаннан Әсел Ерман, Атыраудан Ринат Ғимратов, Шымкенттен Серік Сариев пен Қайырбек Қалиев және өңірімізге белгілі өнер ұжымдары, күйшілер ашық аспан астында қос ішектен күмбірлете күй төкті.
Тұрмағамбет атындағы Халық аспаптар оркестрінің орындауындағы мерекелік күймен ашылған салтанатты шараға қатысқан облыс әкімінің орынбасары Балмейір Сансызбайұлы рухани жаңғырудың нағыз үлгісі – домбыраны ұлықтау екенін, ал жыр мен толғау, терме Сыр сүлейлерінен бастау алғанын айтып, бүгінде дәстүрлі сипатқа ие болған Ұлттық домбыра күнімен құттықтап, лебізін білдірді.
Мәдениет және спорт басқармасы ұйымдастырған концерт барысында облыстың өнер ұжымдары Жалдыбайдың «Қаражорға», халық күйі «Ақсақ құлан», Құрманғазының «Серпер», А.Жайымовтың «Шалқыма», Әлшекейдің «Терісқақпай», Ә.Райымбергеновтің «Секіртпе», Н.Тілендиевтің «Әлқисса», «Махамбет» күйлерін күмбірлетсе, әншілер домбыраға әуелеген әндерін арқау етті.
Әр халықтың тарихы хатқа түсіп таңбаланғандай, қазақ халқының күллі ғұмыр жолы, руханияты мен тұрмысы, тәлім мен тәрбиесін тарих етіп бойына сіңіріп, оны күй қылып төккен домбыра күніне арналған мерекелік гала-концерттің қорытындысы ұлтымыздың саз өнерінің темірқазығына айналған Құрманғазы Сағырбайұлының «Сарыарқасымен» түйінделді.
А.Әділжанұлы
