«Ұлттың үні – домбыра» мерекелік шарасы қала тұрғындарының рухын көтерді

Қазақ халқының ұлттық музыкалық аспабы – ғасырлар бойы серік болған қасиетті қара домбыраны ұлықтайтын күннің өз мәні бар. Домбыраның үні жай әуен емес, онда ұлтымыздың өткені, шежіресі бар, тарих қатпарындағы қуанышы мен қайғысы жатыр. Елімізде ұлттық аспапқа мән беріп, бір күнді атаулы дата етіп белгілеудің себебі сонда.

Ұлттық домбыра күніне орай қалалық мәдени және демалыс паркінде «Ұлттың үні – Домбыра» атты мерекелік шара өтті. Салтанатты шараға Қызылорда қаласы әкімінің орынбасары Жанмұрат Сейілов қатысып, қызылордалықтарды тәлім-тағылымы мол ерекше күнмен құттықтады. Әлем мойындаған ұлттық аспабымызды насихаттау, қалаға жақын орналасқан кент және ауылдық округтердегі мәдениет ошақтарының бәсекелестігін арттыру, ел ішінен талантты өнерпаздарды табу мақсатында ұйымдастырылған «Ел іші – өнер кеніші» байқауына қатысып, жүлдегер атанған мәдениет үйлері, жекелеген өнерпаздарға қала әкімінің арнайы алғыс хаты мен естелік сыйлықтарын табыс етті.

Байқау қорытындысы бойынша, «Шабыт» номинациясымен сазгер, Қараөзек ауылдық клубының директоры Айдос Байкенов, «Үздік қойылым» номинациясымен Қарауылтөбе ауылдық клубы, «Үкілі үміт» номинациясымен Ақсуат мәдениет үйінің «Дәстүрлі ән-жыр» үйірмесі, «Үздік би тобы» номинациясымен Ақжарма мәдениет үйінің «Жұлдыз» би тобы, «Дарын» номинациясымен Абай ауылдық мәдениет үйінен Ізбасар Акимов марапатталды. Сондай-ақ, дәстүрлі байқаудың жүлделі ІІІ орыны Абай ауылдық мәдениет үйіне бұйырса, Талсуат ауылдық клубы мен Белкөл кенті клубы ІІ орынды өзара бөлісті. І орынға С.Майқанова атындағы мәдениет Үйі лайық деп танылса, бас жүлдені Қызылжарма ауылдық мәдениет Үйі жеңіп алды.

«Ұлттың үні – Домбыра» атты мерекелік шарада байқау аясында үздік өнер көрсеткен өнерпаздар ән мен жырдан шашу шашып, қала тұрғындарының рухын көтеріп, көтеріңкі көңіл-күй сыйлады.

З.Дастанқызы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған