Депутаттардың қызылорда облысына сапарында тұрғындар ұсыныстары мен өтініштерін ортаға салды

Облыс әкімі Нұрлыбек Нәлібаев Сыр өңіріне жұмыс сапарымен келген ҚР Парламенті Сенатының депутаты Руслан Рүстемовпен, Мәжіліс депутаттары Мархабат Жайымбетов және Мұрат Ергешбаевпен кездесті. Алдағы уақытта атқарылатын жұмыстар, өзекті мәселелер туралы кездесуде талқыланды. Депутаттар Сырдария мен Жалағаш аудандарында және бірқатар ауылдарда болып, қабылдаулар өткізді.

Ауылдық округтердің жұмысын ілгерілетіп, ауыл тұрғындарына қажетті жұмыстарды атқарып жүрген – еңбекқор жастар. Олардың атқарған жұмыстарының арқасында көптеген мәселелердің түйіні тарқатылып, халықтың жағдайының жақсаруына әсер ететін шаруалар шешіліп жүр. Ауылдағы жұмыссыздық мәселесіне байланысты еңбекке жаны құштар жастарға мемлекет тарапынан қолдау көрсетіліп, жұмыс бригадалары құрылған еді.

Ауыл жастарынан тұратын еңбек бригадалары мүшелерімен ҚР Парламенті Сенатының депутаты Руслан Рүстемов және ҚР Парламенті Мәжілісі депутаттары Мархабат Жайымбетов пен Мұрат Ергешбаев Сырдария ауданында болып, салынып жатқан нысандарды аралады. Егін даласында еңбек етіп жатқан Айдарлы елдімекенінің ауыл жастарынан құрылған еңбек бригадасы мүшелерінің жұмысымен танысты. 2019 жылы Айдарлы жастар еңбек бригадасы республикада алғашқылардың бірі болып 15 жас­тың бірігуі арқасында құрылған. Ауданға қарасты Шіркейлі, Айдарлы, А.Тоқмағанбетов, Аманкелді, Бесарық, Жетікөл, Қоғалыкөл ауылдық округтерінен аудандағы жастардың жұмыссыздығын төмендету мақсатында облыс әкімінің қолдауымен жастар бригадалары қайта құрылды. Бүгінде еңбек бригадалары қатарында жұмыссыз, НЕЕТ санатындағы, пробация есебінде тұратын 200-ге жуық жас жұмыс жасайды. Ауыл жастарына мемлекет тарапынан тегін уақытша жер, су айдайтын насос беріліп, демеушілік есебінен жер жырту, егін алқабын қоршалау және жанар-жағармай отынымен толыққанды қамтамасыз етілген. Ауданның еңбекқор жастары бүгінде бақша дақылдарын егіп отыр.

«Ерте көктемде жұмыссыз жүрген 40 жасты Жаңақорған ауданы, Жайылма ауылдық округіне жіберіп, тегін егін егу тәсілдері үйретілді. Ол жақта көп мөлшерде егін егетін диқандар түрлі егін егудің артықшылықтарын түсіндіріп, алдағы жұмыстарына бағыт берді. Шіркейлі ауылдық округінде құрылыс материалдарын шығаратын «Шіркейлі» жастар бригадалары жұмыс жасайды. Құрамында ауылдың жұмыссыз 30 жасы бар. Олар цемент, әк және тағы басқа құрылысқа қажетті заттарды шығарады»,- дейді бригада жұмысымен таныстырған Сырдария аудандық жастар ресурстық орталығының директоры, аудандық мәслихат депутаты  Нұрман Абдрасилов.

Кездесу барысында жастар бригадаларының мүшелері депутаттарға көкейдегі ұсыныстарын да жеткізді. «Жетікөл» жастар бригадасының бригадирі Дархан Әзімханов елімізде жастар бригадаларының көп емес екендігін тілге тиек етіп, мемлекет тарапынан тыңайтқыш мәселесін шешіп беруге көмек сұрады. Жас еңбеккерлердің жұмысына риза болған халық қалаулылары ауыл жастарының ұсынысы бойынша кеңес беріп, назарға алатындықтарын жеткізді.

«Жастардың бос уақытта ішімдік, өзге де зиянды әдеттерге бой алдырмай, мемлекет және демушілер тарапынан көрсетілген көмекті әрі қарай тиімді іске асыруы көңіл қуантып отыр. Болашақта кооператив құрып, партияның «Ауыл аманаты» жобасы аясында жұмыстарын жетілдіру қажет. Кооператив құрып, егіс көлемін арттырғанда субсидия мәселесі де шешімін табады», деді ҚР Парламенті Мәжілісі депутатты Мұрат Ергешбаев.

Ал, депутат Мархабат Жа­йымбетов Aманат партиясы «Жер аманаты» партиялық жобасы аясында заңсыз берілген немесе пайдаланылмай жатқан жерлерді мемлекетке қайтарып, оны ауыл шаруашылығы айналымына енгізу жұмыстарын жүргізіп жатқандығын, жастар арасындағы жұмыссыздық деңгейі төмендету бойынша қолға алынған жұмыс­тарды атап өтіп, берілген жерді тиімді игеріп, жұмыссыз жастардың басын қосып, сонымен қатар өңірде азық-түлік бағаларын тұрақтандыруға ықпал ететін ауыл жастарының бұл тірлігі көпке үлгі екенін және басқа өңірлерге тәжірибе ретінде қарастыру керектігін жеткізді.

Мемлекет басшысы атап өткендей, еңбек адамына құрмет толастамайды. Өткен жылы жастар бригадаларының бригадирлері ау­дан әкімінің «Ынта» қаржылай сыйлығымен марапатталған. Еңбекқор жастарды көтермелеуге, ең сыйлы адам жасауға бағытталған жұмыстар биыл да өз жалғасын таппақ.

Кездесуге Aманат партиясының облыстық филиалы төрағасы Наурызбай Байқадамов та қатыс­ты.

– Айдарлы ауылында да болдық. Парламент сенатының депутаты Р.Рүстемов Мәжілістегі Аманат партиясының фракция мүшелері М.Жайымбетов және М.Ергешбаевпен бірге ауыл жастарынан құралған, еңбек бригадаларының жұмысымен таныс­тық. Бригада қатарында жұмыссыз, НЕЕТ санатындағы жастар және пробация есебінде тұратын жастар жұмыс жасауда. Қазіргі таңда жастардан құралған еңбек бригадасы 35 гектар картоп дақылын және 25 гектар жерге бақша дақылдарын егуде. Бұдан бөлек, кездесуде егін дақылдарына қатысты жобаларды қаржыландыру жөнінде пікір алмастық,– деді Наурызбай Байқадамов.

Қызылорда облысына келген депутаттар Руслан Рүстемов, Мархабат Жайымбетов және Мұрат Ергешбаев Сырдария ауданына қарасты Аманкелді ауылы тұрғындарымен кездесу өткізді. Кездесуге ауыл ардагерлері, жастар және БАҚ өкілдері қатысты. Халық қалаулылары Парламент қабыр­ғасында талқыланып жатқан заң жобалары туралы ақпараттармен бөлісті. Өз кезегінде ауыл тұрғыны Б.Сүлейменов осыған дейін шешімі табылмай келген «Қызылорда – Айдарлы» автожолының биыл жөндеу жұмыстарының өткенін, Аманкелді ауылдық емханасының дәрігері Ж.Амангелдина ауылдық емхана базасы жаңа флюрография аппаратымен толыққанын атап өтті. Бұған дейін Айдарлы, Жетікөл, Аманкелді және Бесарық елді мекендерінің тұрғындары аудан орталығына барып, флюрография қызметін пайдаланып келген болатын.

Депутаттар Қалжан ахун ауылы тұрғындарымен де жүздесті. Мұнда ауыл азаматтардың ұсыныс пікірлерін тыңдады. Кездесуде ауыл ардагері Б.Дүйсенбаев Қалжан ахун ауылының биыл көгілдір отын тұтынатындығын айтып, өз ризашылығын білдірді. Расында, облыста 3 елді мекенге табиғи газ берілді. Жыл соңына дейін 9 елді мекен табиғи отын игілігін көрмек. Қазірде ауылда газдандыру бойынша құрылыс-монтаж жұмыс­тары жүргізіліп жатыр.

Ауыл ардагері С.Кенжебаев ауылдағы инфрақұрылымды да­мы­ту бойынша өз ұсынысын жет­кізсе, ауылдық ардагерлер кеңе­сінің төрағасы М.Жорабек «Ауыл аманаты» жобасының іске асуын ауыл азаматтарының күтіп отыр­ғандығын айтты. Кездесу соңында депутаттар әрбір ұсыныстың маңыздылығына тоқталып, кезең-кезеңімен өз шешімін табатындығын жеткізді.

Сенат және Мәжіліс депутаттарының сапары Сырдария ауданына қарасты А.Тоқмағанбетов ауылында жалғасын тапты. Мұнда да халық қалаулылары алдымен ауыл тұрғындарымен кездесіп, пікір алмасты. Тұрғындарға елдегі соңғы қабылданып жатқан заң жобаларын түсіндіріп, алдағы жоспарларымен бөлісті.

Депутаттар ауылдық фельдшерлік-акушерлік бекеттің күрделі жөндеу жұмыстарымен танысты. А.Тоқмағанбетов ауы­лындағы фельдшерлік-акушерлік бекетке 20 жылдан бері жөндеу жұмыстары жүрмеген-ді. Мердігер мекеме «АХАТ-ГС» ЖШС жұмысты күзге дейін толық аяқтап, пайдалануға бермек.

Ауылдың тіршілігімен танысқан депутаттар Тереңөзек кентінің орталығындағы Д.Қонаев көшесіне төселіп жатқан асфальт сапасын көріп, мердігерлермен тілдесті. Көшенің жалпы ұзындығы 1,34 шақырымды құрайды. Бұған дейін көшенің бойына бордюр салу жұмыстары жүргізілген. Халық қалаулылары жөндеу жұмыстарының сапалы әрі уақытылы аяқталуын мердігер мекеме өкіліне нықтап тапсырды. Мұнан әрі партияның аудандық филиалының ғимаратында қоғамдық қабылдау өткізіп, тұрғындар өтінішін тыңдады. Қабылдау барысында азаматтар Шаған ауылын газдандыру, Тереңөзек кентіндегі көпқабатты тұрғын үйлердің ауласын абаттандыру, тұрғын үй мәселесі, Қалжан ахун ауылының электр желісін жаңарту секілді жалпыға ортақ мәселе көтерді.

Жалағаш ауданы, Т.Жүргенов ауылына ат басын бұрған депутаттар тұрғындармен кездесті. Кездесуде ауыл тұрғындары жайы­лымдық жерлер, шаруалардың ротациялық жүйенің сақтамауы, әлеуметтік нысандарды жөндеу және су мәселелерін көтерді.

– Ауылымыздағы №15 «Балбөбек» бөбекжай-бақшасы 1988 жылы тиіптік жобада салынып пайдалануға берілген. Қазірде бөбекжай-бақшада 4 топта 85 бала тәрбиеленіп, 30 қызметкер жұмыс жасайды. 2009 жылы жаңадан бу қазандығы салынып пайдалануға берілді. Қазіргі уақытта бөбекжай-бақша ғимараты күрделі жөндеуді қажет етеді. Атап айтқанда, ғимараттың шатыры тозып, ішкі-сыртқы сылақтары түсіп, электр желілерінің тозығы жетіп тұр. Алдағы уақытта бөбекжай-бақшаға заманауи үлгідегі күрделі жөндеу жүргізілуіне ықпал естеңіздер,– деді ауыл тұрғыны Әли Қасымов.

Кездесуде халық қалаулылары сайлаушылардан түскен ұсыныстарды назарға алатындығын айтты. Соның ішінде Ақсу елді мекенін газдандыру, №31 мектеп-гимназияны, сонымен бірге өзге де білім ордаларын күрделі жөндеуден өткізу, жайылымдық жерлерді кеңейту сынды мәселелерді көтерді. Кездесуге Қызылорда облыстық мәслихатының депутаты Әмірбек Шаймағанбетов, Жалағаш ауданының әкімі Асқарбек Есжанов, Жалағаш аудандық мәслихат депутаттары Өмірзақ Елеусінов, Қуат Ахетов қатысты.

Жалағаш ауданына барған сапарында депутаттар Мақпалкөл ауылының тұрғындарымен де кездесті. Тұрғындарға сенатор Р.Рүстемов Сенатта мақұлданған заңдарға, жаңадан қолданысқа енетін «Әлеуметтік кодекс» жөнінде хабарлама жасап, тұрғындардың ұсыныс-сұрақтарына түсіндірме жасады. Мұнан кейін Жалағаш кентінде аудан әкімі жанындағы қоғамдық кеңес мүшелері мен аудандық мәслихат депутаттарымен жүздесу болды. Оларды толғандырған сұрақтарға жауап берілді.

– Президентіміз VIII сайланған Парламенттің бірінші сессиясының ашылуында: «Депутаттардың рөлі едәуір күшейді. Конституциялық Сот құрылды. Бүкіл сот жүйесіне түбегейлі реформа жасау басталды. Адамның құқықтары мен бостандықтарын қорғауға қатысты жұмыс жаңаша сипат алды. Азаматтардың саяси өмірге емін-еркін араласуына жол ашылды. Реформаларымыз «Күшті Президент – ықпалды Парламент – есеп беретін Үкімет» қағидасына негізделді. Бұл қағида – мемлекетіміздің басты тірегі»,- деді. Демек, аудан көлемінде атқарылатын жобалар мен жұмыстар қоғамдық кеңестің келісімімен жүзеге асады. Мәслихат депутаттарының сенімімен келісіледі. Осындай жауапты уақытта әділетті түрде атсалысуға шақырамын, – деді Руслан Рүстемұлы.

Кездесуге қатысқан мәслихат депутаттары мен қоғамдық кеңес мүшелері ортаға салған бірқатар мәселелер, атап айтқанда, Жалағаш, Қармақшы, Қазалы аудандарының Аққыр, Шобанқазған, Кәукей ауылдарына шекаралық аймақ мәртебесін бекіту, «Дип­ломмен ауылға» бағдарламасын заңнамалық тұрғыда жетілдіру және тағы басқа өзекті мәселелер жөнінде ұсыныстарын ортаға салды.

Ауылдық елді-мекендердің мәселесін жіті қадағалап, шешу жолдарын табу арқылы, еліміздегі бірқатар ауқымды мәселелерді шешуге болатынын халық қалау­лылары түсінеді. Еліміздің барлық жерін көркейтіп, ел болып қалыптасу жолында атқарылатын жұмыстардың маңыздылығы жоғары болып отыр. Сол себепті ауыл-аймақтардың мәселесі Мемлекет басшысы, Үкімет, депутаттар, облыс әкімдігін де алаңдатып отыр. Қаланың жағдайын көтеруден бөлек, ауылдық жерлерді жандандыру да күн тәртібінен түспеуі керек. Ауыл шаруашылығын дамытып, елімізді азық-түлік өнімдерімен қамтамасыз етіп отырған ауылдардың жағдайын көтеру бас­ты парыз. Сыр өңірінің ауылдық округтеріне де қолдау көрсетіп, ауыл жастарының жұмысына үкімет көмек қолын созса, көп жұмыстар шешімін тапқалы отыр.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған