Жас ақындар Қызылорданы жырға қосты

Қызылорда қаласының 205 жылдығына орай қалалық мәдениет және спорт бөлімі және орталықтандырылған кітапханалар жүйесінің бірлесе ұйымдастыруымен «Қаламгерлер» аллеясында «Кітап FEST» кітап көрмесі мен сатылым акциясы өткізілді. Акция барысында Ә.Тәжібаев атындағы облыстық ғылыми-әмбебап кітапханасы, Қорқыт ата атындағы Қызылорда университетінің ғылыми кітапханасы, «Болашақ» университетінің кітапханасы, Қызылорда медициналық жоғарғы колледжінің кітапханасы, М.Мәметова атындағы Қызылорда педагогикалық жоғары колледждері түрлі кітаптардан инсталляция құрап, жыл ерекшеліктеріне байланысты кітап көрмесін жасады. Кітап жәрмеңкесіне «Мазмұндама» баспа үйі, «Кітап ал» кітап дүкені, «Отбасы хрестоматиясы» баспа үйі, «Қасым» баспа үйі, «Мұқаба» баспа үйі өз кітаптарын сатылымға шығарды.

«Өткені сырлы, келешегі нұрлы – Қызылорда» атты кітап көрмесі мен кітап жәрмеңкесі таныстырылып, балалар кітапханасының тұрақты оқырмандары «Ханшайым ана» бөбекжай бақша жеке білім беру мекемесінің бүлдіршіндері «Түлкі мен қоян» ертегісінен сахналық қойылым көрсетті. Қалалық мәслихат төрағасы Ибадулла Құттықожаев сөз сөйлеп, бірқатар үздік оқырмандармен үздік кітапханаларды марапаттады. Белсенді оқырмандар Мақсат Дауылбай, Бексұлтан Санақұл кітап туралы ақындар толғауын нақышына келтіре орындады.

Кітап мерекесі «Жыр толғаған Сыр елі» атты әдеби-музыкалық мерекелік кешпен жалғасты. М.Мәметова атындағы педагогикалық жоғары колледжінің студенті Алмат Бақытжанұлы С.Сіргебаевтың «Қызылорда» әнін орындап, жас ақын Бексұлтан Бағдатұлы «Сыр елі» атты өз туындысын оқиды. Ержігіт Сармырзаев ақын М.Әміреұлының Сыр еліне арнаған өлеңін оқыса, жас оқырмандар әдеби-монтаж жасады.

М.Мәметова атындағы педагогикалық жоғары колледжінің студенттері Нұрталап Егізбай, Нұркелді Өтепберген «Қызылорда вальсінің» шығу тарихы жайлы сахналық көрініс көрсетіп, кешті шынайы сезіммен әсерледі. Жас әнші Елдос Бекежановтың орындауындағы Елена Әбдіхалықованың «Сыр елім» атты әнімен кеш қорытындыланды.

Кітап мерекесі «Жырым сенсің, туған жер» ақындардың жыр мүшәйрасымен жалғасып, жыр додасына жас ақындар қатысты.

Қызылорда – көненің көзі, көрікті қала.

Жазса Тарас Днепрді,

Жазса Пушкин Еділді.

Неге маған жырламасқа,

Сырда туған елімді,– деп, ақын Әбділда Тәжібаев жырлағандай, қазақ тарихында өзіндік үлкен рөл атқаратын қаланың тарихы тереңде жатыр. Осы бір қасиетті мекенге жыр арнамаған ақын кемде кем шығар. Негізігі мақсат да осы, туған елін, сүйікті қаласын жырға қосатын жас буын ақындар легін жаңа есімдермен толықтыру. Жыр мүшәйрасы екі кезең бойынша өткізіліп, «Жырым сенсің, Қызылорда» кезеңіңде ақындар Қызылорда қаласына арнау өлеңдерін, екінші кезеңде ақындар еркін тақырыпта өз өлеңдерін оқыды.

Мүшәйраға Қазақстан Журналистер одағының мүшесі, филология ғылымдарының кадидаты, «Әлімсақ» журналының бас редакторы Нұрлан Нұрмахан, айтыскер ақын, математика пәнінің мұғалімі Ержеңіс Әбдиев, ақын, Қазақстан Жазушылар Одағының мүшесі, республикалық жыр мүшәйраларының жүлдегері Мақсат Дауылбай төрелік жасады. Қорытындысында өрнекті өлеңімен көзге түскен жаңа есім – М.Мәметова атындағы педагогикалық жоғары колледжінің 4-курс студенті Нұркелді Өтепберген бас жүлдеге лайық деп табылды. Жүлделі орындарға ие болған ақындар бағалы сыйлықтармен, арнайы дипломдармен марапатталды.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған