Киелі Қобда топырағындағы жауынгерлер Ұлы Отан соғысында жанқиярлықпен ерлік көрсетті. Біз Отан бақыты үшін ең қымбатты өмірін қиған, бейбіт өмір үшін мерт болған аяулы жандар алдында бас иеміз. Бүгінгі ұрпаққа сол отты жылдарда ерлік көрсеткен батырларымызды мақтанышпен айта аламыз.
Қобда аудандық орталықтандырылған кітапхана жүйесінің ұйымдастыруымен Исатай Тайманов атындағы гимназияда Ұлы Жеңістің 80 жылдығы, Кеңес Одағының батыр қызы Әлия Молдағұлованың туғанына 100 жыл, қайсар батыр Иманғали Білтабановтың туғанына 100 жыл толуына және соғыс ардагері Ақби Рақовқа арналған «Батыры көп елдің – рухы биік» атты еске алу кеші өтті.
Аталған кешімізге белсенді ардагерлер, гимназия директоры Марал Жалғасбайқызы, ұстаздар мен оқушылары қатысты. Кеш барысында Исатай Тайманов атындағы гимназия директорының тәрбие ісі жөніндегі орынбасары Нұрбол Мадетханұлы соғыс ардагері Ақби Рақовтың ерлігін айтып өтсе, кітапхана қызметкерлері батырлар туралы мағлұмат беріп, кітап көрмесімен таныстырып өтті. Кешке қатысқан оқушылар батырларға арналған өлеңдерін нақышына келтіре оқып берді.
Айман Жаңабергенқызы,
ҚАОКЖ-нің өлкетану бөлімінің кітапханашысы
