Мәдениет және өнер қызметкерлерінің кәсіби мерекесі қарсаңында Ақордада салтанатты жиын өтті. Президент ұлтымыздың болмыс-бітімін сақтауға, халқымыздың руханиятын байытуға зор үлес қосып жүрген сала қызметкерлеріне ризашылығын білдірді.
– Мәдениет – ұлттың төлқұжаты. Жаһан жұрты елімізді, ең алдымен, өнеріміз арқылы танып біледі. Біз – Ұлы далада тамыр жайған бірегей мәдениеттің заңды мұрагеріміз. Қазақ жерінен шыққан қайталанбас өнер иелерінің теңдессіз туындылары тұтас ұлтты тәрбиеледі. Қазір төл мәдениетіміз дүние жүзіне танылып жатыр. Қазақ киногерлері түрлі халықаралық байқауларға қатысып, сарапшылардың жоғары бағасына ие болуда. Рухани мұраларымыз цифрлық форматқа көшіріле бастады. Таяуда ұлтымыздың бір жарым мың ән-күйі мен фольклорлық мұрасы ең танымал халықаралық платформаларға салынды. Төл өнеріміз креативті индустрия арқылы барынша насихатталуда, – деді Президент.
Шындығында, мәдениет саласы үшін қаншама жұмыс жасалып жатыр. Дегенмен ұлттық мұра дегенде оның сыртқы қалпы ғана емес, ішкі мазмұны да санамызға енуі тиіс. Әйтпесе, фольклорымыз, салт-дәстүріміз, әдеп-ғұрпымыз насихатталған тұста ұлттық рухымыз биік тұрмаса, әншейін сөз болып қала береді. Ұлттық қадір-қасиетімізге нұқсан келтіріп жүргендерге де тыйым салатын уақыт жетті.
Рас, мәдениеті озық елдің рухы биік болады. Қасым-Жомарт Тоқаевтың айтуынша, мемлекет өнер саласын өркендетуге әрдайым ерекше мән береді.
– Былтырдың өзінде 45 жаңа мәдениет нысаны салынды. Бұл жұмыс болашақта да жалғасын табады. Театр – руханиятымыздың негізгі тірегінің бірі. Ұлттық құрылтайдың Бурабайда өткен отырысында аймақтағы театрларды дамыту туралы нақты тапсырма берілді. Театрлардың көпшілігі толық жаңғыртуды қажет етеді. Кейбіріне жаңа ғимарат керек. Осы жұмысқа кәсіпкерлер мен меценаттарды жұмылдырған абзал. Бұл – әлемде кең таралған тәжірибе. Мұндай жобаларға инвестиция салуға дайын азаматтар аз емес. Мен бизнес өкілдерін руханиятымызды дамыту ісіне атсалысуға шақырамын,– деді Мемлекет басшысы.
Президенттің бұл сөзін жергілікті билік қаперіне мықтап ұстап, жүйелі жұмыс жасау керек. Әйтпесе бүгінде тозығы жеткен мәдениет үйлері, клубы жоқ ауылдар бар. Әкімдерден сұрасақ, «мәдени шараларды мектептің акт залына өткізуге болады, қазір бірінші кезекте ауылды жолмен, жарықпен, газбен қамтамасыз етуіміз керек» деп, қашыртпа жауап беріп, мәдениет қызметкерлерін екінші сортқа айналдырып отырғанын қалай жасырарсың? Енді бос сөз сөйлейтін шенеуніктер істің көзін тауып, кәсіпкерлермен жұмыс жасауына тура келеді.
Президент елімізде іргелі мәдениет ошақтары көп екеніне назар аударып, олар талай жылдан бері көрермен қауымға тағылымды қойылымдар ұсынып келе жатқанын жеткізді.
– Осы орайда Бикен Римова атындағы қазақ драма театрына, Алматы қаласындағы Мемлекеттік қуыршақ театрына және Ғарифолла Құрманғалиев атындағы филармонияға академиялық мәртебе беру қажет деп санаймын. Бұл қадам мәдениет мекемелерінің жұмысына тың серпін берері сөзсіз, – деді Мемлекет басшысы.
Салтанатты жиында Президенттің мемлекеттік марапат тапсырғаны және кімдерге берілгені әлеуметтік желінің дауына айналды. Қазақтың жүрген жері бұрыннан өсек-аяң, дау-дамай, қызғаныш пен өкпе. Бұл жолы да сол «үрдіс» жалғасын тапты. «Анау алды, мынау алмады» деген сөз арқылы желіден ішкі шерін шығарғандар көп болды.
— Өнер және мәдениет күнінде мәдениет, руханият қайраткерлеріне мемлекеттік марапат беріліп жатыр екен. Сырдың талантты әншісі, өңір мәдениетіне бел жазбай қырық жылға жуық еңбек еткен қайраткеріміз Үміт Медеуова «Құрмет» орденімен, Аралда, бабақоныста бір өзі бір мектеп болып отырған шын дарын, шын ұстаз Айбек Тәңірберген «Ерен еңбегі үшін» медалімен наградталыпты,- деп, өз ойын білдірді осы тұста журналист Дәурен Сейітжанұлы. – Президент пәрменімен жоғары дәрежелі “Халық әртісі” атанып жатқандар да бар. Қазақтың «әттеген-айы» өзімен бірге өмір сүреді ғой. Ұстаздардың ұстазы, бір өзі бір мектеп қана емес, бүтін зерттеу университеті, бүтін бір бекзада өнердің ұшар басында тұрған сұңғыла талант Алмас Алматовқа «Халық әртісі» атағы берілмеді. Дәл бүгінгідей емес, қазақ кеңестің көлеңкесінде қалып жүрген уақытта маңдайы жарқырап ұлт атын шығарған, дүниені дүр сілкіндірген, бүгінде қарттыққа жетіп, елге оралған Набат Ойнароваға ше?
Ұсынысы орынды. Өнердің «отымен кіріп, күлімен шығып», мәдениетке еңбегі сіңгендер тыс қалып, бір өлеңімен жарқ еткендер атақтың айналасында жүргені көпке ұнай қоймасы анық. Жан-жағына ойлы көбен қарап, екі өлшеп, бір кесетін бұрынғыдай сүйегі мықтылар Үкімет басында қазір азайды. Соның зардабын енді тартып, әлеуметтік желімен әуре болып отырған түріміз осы.
Н.Естемес
