Елімізде ұлттық мәдениетті дамытуда мектеп оқушылары біркелкі үлгіде ұлттық киімді кигенді қолға алды. Ұлттық үлгіде тігілген киім жастардың бойындағы патриоттық сезімді де оятты. Елдің тұтқасын ұстайтын жастардың бойына сарқылмас жігер берді. Мектеп оқушыларының білім шаңырағында ұлттық киіммен жүргендеріне қызыға қарайсың. Қазақтың болмысын, тектілігін көргендей сезімде боласың.
Ертеде қазақ халқы қыздың ибалы, инабатты болғанын қатаң қадағалаған. Қыздар бастарына тақия киген, тізесін жауып тұратын көйлектер киген. Бойжеткен жаздыгүні жұқа матадан тігілген тақия, қыста бөрік киген. Тұрмыс құрмаған қыздар барынша сәнді киініп жүрген. Бойжеткендер бұрымын әсемдеп өріп қойып, шолпысын сылдырлатып жүрген. Бұрын ата-бабаларымыз ұзатылып бара жатқан қыздың тегін, әлеуметтік жағдайын оның басындағы сәукелесіне қарап-ақ білген екен. Қарап отырсаңыз, ата-бабаларымыз қыз балалардың бойына иба мен инабатты киіммен бірге сіңіре білген.
Ұлттық киімді тек мерекеде емес, ұдайы киіп жүрсе, ерекше жарасымды болтыны айтылды. «Ең әдемі киім – ұлтыңның киімі» деген сөз бар. Ертеде ата-бабаларымыздан қалған құнды дүниелерді насихаттау, дәріптеуде шеберлеріміздің еңбегі көрінді. Қазақ халқының ұлттық киімдерінің түрі де, үлгісі де еш халықтан кем болмаған. Ұлттық көркем үлгілері әлемнің этнографиялық музейлері мен көрмелерінен орын алған. Ұлт мәдениетінде бағалы киімдер сый-сияпат ретінде жүріп, құрметтеудің бір көрінісі ретінде ғана емес, мағынасы терең көпқырлы ұғымды көрсетті. Еліміздің рухани дамуы ұлттық рухқа тікелей байланысты.
Халқымыздың төл мәдениеті салт-дәстүрден, әдет-ғұрыптан бастау алады. Ұлт мәдениетінен халық өмірінің айнасы мен оның болмысы көрінеді.
Бибігүл Айтбақова,
Т.Ізтілеуов атындағы №29 орта мектебінің аға тәлімгері.
Қармақшы ауданы, Тұрмағамбет ауылы.
