КЕШЕ
— Ау, қайдан келесіз?
— Сайлаудан келеміз.
Саясат десе жанымызды береміз.
Үкімет десе соңынан ереміз.
Коммунистік рухпен тәрбиеленген
Ұлы партияға сенеміз.
— Сеніміңіз мол екен.
Сіздің жолыңыз жол екен.
— Әй, қайдан келесің?
БҮГІН
— Сайлаудан келемін.
«Елімнің келешегі не болар екен?» деп,
Ойлаумен келемін.
— Әй, не болды сонша?
Көңіл-күйің болмай тұр ғой онша?
— Енді қайтейін?
Таққа таласқандарға көңілің бір толмайды.
Екі қошқардың басы бір қазанға сыймай жүргенде,
Бір орынға үш кандидаттың бірін таңдайды.
Үшеуінің бағдарламасын оқымадық,
Толтырып тұр көңілімді сан қайғы.
— Енді қандай шешімге келдің?
Кімге даусыңды бердің?
— Кабинаға кіріп алып, өзімше тергіледім,
Төртінші «үмітсізді» белгіледім.
— Ел болашағына болжамың қалай?
— Депутат десе жүйкеміз тырысып жүр.
Өйткені олар елі үшін емес,
Билік үшін алысып-жұлысып жүр.
Сайланып кеткенше амалдайды.
Халықпен кездесуді емес,
Әлеуметтік желіні паналайды.
Сосын ешкімге қарамайды.
Халықпен шаруасы жоқтар депутат болса,
Еліміз алға қалай адымдайды?
Осы менің болжамым,
Сұрамай-ақ қой ар жағын.
К.Масин
