Шиелі ауданы оқушылары жазғы демалысты көңілді өткізбек

Шиелі аудандық білім бөлімінің басшысы Жібек Баймұратова аудан бойынша 2022-2023 оқу жылының аяқталуы және жазғы демалысты ұйымдастыру жұмыстары бойынша брифинг өткізді.

– 2022-2023 оқу жылы бөлімге қарасты 40 мектепте 1-11 сынып аралығындағы 976 сынып топтамасында 18730 оқушымен басталған. Өткен оқу жылымен салыстыра қарағанда оқушы саны аудан бойынша 102 оқушыға азайып, сынып топтамасы 15 бірлікке артқан. Оның ішінде кент мектептері бойынша барлық сыныптар бойынша 75 оқушыға көбейсе, ауыл мектептері бойынша 178 оқушыға кеміген. Басты себептері ауылдық жердегі елді-мекендердегі көші-қонның теріс динамикасы және былтырғы жылы кент орталығында ашылған жеке мектептерге оқушылардың тартылуы. 2021-2022 оқу жылында «Самғау скулл» жеке мектебіне, 1-4 сынып аралғында 76 оқушы тартылса, 202-2023 оқу жылы басында «Самғау скулл» жеке мектебіне 38 оқушы, Зияткер жеке мектебіне 146 оқушы тартылған. ІІІ тоқсан қорытындысымен аудан бойынша білім сапасы 59,1 пайыз, үлгірім сапасы 100 пайызды көрсетті. Үздік оқушы саны – 3478, бұл жалпы оқушылардың 18,73 пайызы болса, жақсы оқитын оқушы саны – 5959, бұл жалпы оқушы санының 32,1 пайызын құрайды. Үлгірмейтін оқушы жоқ,-деді Ж.Баймұратова.

Ағымдағы оқу жылында оқу жылын аяқтау 31 мамырға белгіленіп, аудан мектептерінің 9 сыныбын 1750 оқушы, 11 сыныпта 959 оқушы бітіргелі отыр. 9 сыныптар бойынша қорытынды бітіру емтихандары 2-13 маусым аралығында өткізілу жоспарлануда. Үстіміздегі жылы 1-10 сынып аралығында 17 мың 893 бала жазғы демалыспен және саяхатпен олардың 92%-ы қамтылмақ. Сондай-ақ, ата-аналар есебінен 100 бала, ауыл, кент әкімдерінің ұйымдастыруымен 130 бала, мәслихат депутаттары есебінен 50 бала, мекемелер демеушілігімен, салалық кәсіподақтар тарапынан 250 бала, басқа да көздерден 303 бала, жалпы 833 бала жазғы кезеңде демалады деп жоспарланып отыр.

Мектеп жанынан тамақсыз ұйымдастырылатын 38 лагерьге 3788 бала, 11 мектепте бір мезгіл тамақпен ұйымдастырылатын мектеп жанындағы лагерьлерде 910 бала демалдыру жоспарланды. Жазғы каникул кезінде аудандық Оқушылар үйінде «3D-модельдеу», «Робототехника» және цифрлық зертханада арнайы «Жайдарлы жаз-2023» атты бағдарлама бойынша үйірмелер жұмыс жасайды және онда 1000 бала қамтылады.

«Ұстаз-ақпарат»

Пікір үстеу

Э-пошта мекенжайыңыз жарияланбайды. Міндетті өрістер * таңбаланған