«Зайырлылық және дінтану негіздері» пәні мұғалімдеріне арналған семинар-тренинг өтті

Қызылорда облыстық дін істері басқармасының Дін мәселелерін зерттеу орталығының ұйымдастыруымен дін саласы бойынша республикалық ақпараттық-түсіндірме тобы мүшелерінің қатысуымен «Зайырлылық және дінтану негіздері» пәні мұғалімдеріне арналған семинар-тренинг өтті. Іс-шараны ұйымдастырудағы басты мақсат – «Зайырлылық және дінтану негіздері» пәні мұғалімдеріне тың ақпараттар бере отырып, жастарымыздың деструктивті діни ағымдардың ықпалына түсіп кетпеуінің алдын алу. Семинар-тренингтің кіріспе сөзін бастаған орталықтың бөлім басшысы Жеңісбек Анафияұлы оң-солын толықтай танып үлгермеген жеткіншектердің ақпарат қабылдауда сыни ойлау қабілетін дамытудың маңыздылығына тоқтала келе, оқушылармен тікелей байланысқа түсіп, дін негіздері бойынша түпкілікті түсінік қалыптастырудағы мұғалімдердің рөлі туралы айтты.

Іс-шарада дін саласындағы республикалық ақпараттық-түсіндірме тобы мүшелері: «Конфессияаралық және өркениетаралық диалогты дамыту жөніндегі Н.Назарбаев орталығының» Діни ахуалды талдау және мониторинг департаментінің бас сарапшысы Асқар Кенжеев және белгілі дінтанушы Дәлелхан Қоңырбайұлы дәріс оқыды.

Зайырлылық және дінтану негіздері бойынша білімін үздіксіз жетілдіріп отыратын кез келген ұстаз елімізде жүріп жатқан діни үдерістерге талдау жасай алатын және жат ағымдардың жас жеткіншектер санасына қалай ықпал ете алатынын білуі қажет. Сонымен қатар, дін феноменінің адамзат қоғамындағы рөліне, әлемдік діндердің пайда болуы мен олардың арасындағы ерекшеліктер мен мәдениет қалыптастырушылық қызметіне, халықтардың рухани-мәдени болмысындағы алатын орнына тоқталуы керек. Сондай-ақ, жастар арасында рухани құндылықтарды түсіндіру және орта білім беру ұйымдарында дін саласы мәселелерін зайырлылық қағидаты негізінде реттеуді басты назарда ұстауы алға тартылды. Басқосуда жоғарыда айтылған ауқымды тақырыптар қамтылды.

Еліміздегі зайырлылық принциптері – дін мен мемлекет арасындағы арақатынас­ты анықтауда басты ұстаным. Зайырлылық прициптері атеизм де, секуляризм де емес, мемлекет пен дін арасындағы байланысты құқықтық негізде реттеу дегенді білдіреді. Бұл мемлекеттегі діни-рухани үдерістердің бір жағынан еркін дамуына мүмкіндік берсе, екінші жағынан ол үдерістердің заң шеңберінен шықпауына ықпал етеді. Осындай тым нәзік тақырыптарды мұғалімдердің оқушыларға білім беру барысында дұрыс түсіндірулері маңызды.

Қазіргі кезеңдегі еліміздегі діни-рухани үдерістер әлемдік жаһандану үдерісімен сабақтастықта жүріп жатқаны, мұсылман елдеріндегі түрлі қақтығыстардың діни үдерістермен байланысты екендігі және ол үдерістердің елімізге де белгілі дәрежеде ықпалы бар екендігі рас. Осы мәселелердің барлығы семинар-тренинг шеңберінде қарастырылып, өскелең ұрпақтың санасын діни радикалдық топтардың теріс ықпалынан қорғау жолдары айтылды.

Педагогтердің білімін жетілдіруге арналған семинар-трениг барысында Қазақстан Республикасының дін саласындағы мемлекеттік саясаты және оның негізгі ерекшеліктері, еліміздегі діни ахуалды талдау және мониторинг жұмыстарының өзекті мәселелері, рухани-адамгершілік құндылықтар, ұлттық дәстүрлер мен мәдениетті насихаттау сынды тақырыптарда мазмұнды баяндамалар оқылып, бүгінгі күнгі өңірдегі діни ахуалға талдау жасалды.

Елімізде зайырлылық принциптеріне сай азаматтардың дінге қатысты ұстанымына мемлекет араласпайды. Сондықтан, ішкі тұғыры берік, сыни көзқарасы мықты, талдау жасауға қабілетті, сараптама жасай білу дағдысы бар жастарды қалыптастыру өте маңызды. Зайырлылық қағидаты – діни догманы мемлекеттен алшақтату, бірақ дінді қоғам өмірінен ажырату емес екендігін оқушыларға түсіндіре отырып, зайырлылықтың құндылықтар жүйесі адамның ойлау мәнері мен машықтарынан бастап, киім үлгілеріне дейінгі мәдени феномендері туралы дұрыс бағытты бала бойында қалыптастыратын ата-анасынан кейін мұғалім. Сондықтан семинар-тренинг барысында баяндамашылар кері байланыс орната отырып, мектептерде кездесетін дінге қатысты өзекті мәселелерді жаңа қырынан талдауға тырысты.

Зайырлы мемлекеттің маңызды сипаттарының бірі – діни сенімдері мен көзқарастары әр түрлі азаматтардың бейбіт қатар өмір сүруінің өмірдегі көріністері туралы, зайырлы мемлекет рухани саладағы көптүрлі қарым-қатынастың құқықтық негіздерінің тәжірибедегі, қолданыстағы барысы, мемлекетті құраушы ұлттың ділін, мәдениетін және руханиятын сақтай отырып, заманауи, дамушы мемлекет болу мәселелері туралы сөзталқы болды.

Мұғалімдерге жүктеліп отырған адамның діни сеніміне қарамастан тең құқылы қарым-қатынас құруды, дін ұстану адам өмірі мен денсаулығына, қоғамдық негіздерге қауіп келтірмейтіндей ережелерді бойына сіңіріп өскен, тұлғалық негізі қалыптасқан, азаматтық ұстанымы нық балаларды тәрбие­леуде осындай семинар-тренингтердің берері мол.

Баян Ахатай, «Ана мектебі» қоғамдық қоры жетекшісі

Пікір үстеу

Э-пошта мекенжайыңыз жарияланбайды. Міндетті өрістер * таңбаланған