Білім саласында тың өзгеріс пен жаңашылдық болмаса, алға қарай серпін алып, дамымайтыны белгілі. Осы тұста білім басқармасының басшысы Асқарбек Есжанов жыл басында жаңашыл идеясымен көзге көрінді. Жақында осы идея көпшіліктің қолдауына ие болды. Ол өңірдегі білім беру ұйымдары басшыларының инновациялық және кәсіби тәжірибелерін анықтау, тәжірибе алмасу, білім беру жүйесіндегі өзіндік кәсіби имиджді қалыптастыру мақсатын көздеген «Бір мектеп – бір жоба» байқауы.
Апта басында «Бір мектеп – бір жоба» байқауының облыстық кезеңі Қызылорда қаласындағы №2 Абай атындағы мамандандырылған сыныптары бар мектеп базасында өткізілді. Оған дейін қала мен аудандардан жеңімпаз атанғандар облыстық кезеңде бақ сынасты. Байқау екі бөлімнен тұрды. Біріншісі ашық сабақ. Сабақ беретін пәнінен жоспар бойынша сол күнгі тақырыпта өткізіледі, ұзақтығы – 45 минут. Қатысушылар бір күн бұрын мектеппен танысуға, әзірлеген слайд және т.б. жұмыстарын орналастырып, тексеруге рұқсат етілді. Сабақты бағалау ҚР Оқу-ағарту министрлігінің бекіткен педагогтерді аттестаттау критерийлеріне сәйкес жүргізілді. Сабақты бағалауға Назарбаев Зияткерлік мектептерінің, Педагогикалық шеберлік орталығының Қызылорда филиалының, «Өрлеу» Ұлттық біліктілік арттыру орталығының Қызылорда облысы бойынша Кәсіби даму институтының мамандары және педагог-шебер санатты мұғалімдер қатысты.
Екіншісі – жоба қорғау. Әзірлеген жобасын қорғау ұзақтығы – 10 минут. 10 слайдтан аспайтын таныстырылыммен жүргізілді. Әзірлеген жоба білім беру ұйымындағы белгілі бір пән немесе бағытты жетілдіруге, пән бойынша білім сапасын жоғарылатуға әсер етуі қажет. Мектеп мүмкіндігімен педагогикалық ұжымның әлеуетін ескеріп, мектептің жақсы жақтарын жоғары деңгейге көтеру арқылы мектептің бейіндік бағытын анықтап, дамуына серпіліс беру қажет.
Облыс орталығындағы дарынды балаларға арналған мамандандырылған сыныптары бар мектебінің базасында өткен облыстық байқаудың ақтық кезеңіне Асқарбек Темірбекұлы арнайы келіп, әріптестеріне сәттілік тіледі. Ол жарыс жолына түскен жобалар байқауында мектеп директорлары қорғаған бірнеше жобалардың тың идеяларын қолдап, кемшін тұстарын атап айтып, күтілетін нәтижелерге тоқталып өтті. Аудандық кезеңнен озық шыққан директорлар бірінші кезең шартына сәйкес жоба қорғап, оның білім беру сапасының артуын қамтамасыз ететін үлгілер ұсынды. Байқаудың түпкі мақсаты өз құзіреті шегіндегі басшылар, білімді ұстаздар, табысты мектептер легін қалыптастыру екенін түсіндірді.
Білім басқармасы басшысы Асқарбек Темірбекұлы «Мектеп-лицей жағдайында оқушылардың фукционалдық сауаттылығын дамытудың педагогикалық шарттары» тақырыбы бойынша қазақ әдебиеті пәнінен Тахауи Ахтановтың «Күй аңызы» шығармасы негізімен сабақ өткен Қармақшы ауданындағы №279 мектеп-лицейінің директоры Фарида Аманованың сабағына қатысты.
«Бір мектеп – бір жоба» облыстық байқау қорытындысымен Қазақстан тарихы пәні бойынша көрсетілген сабақпен “Мектеп обсерваториясы” жобасы бойынша Қызылорда қаласындағы №264 мектеп-лицейінің директоры Бек Тумырзаев ІІІ орынды, анна тілі пәні сабағымен “Media studio – оқу үдерісінде” жобасы бойынша Жаңақорған ауданының №286 мектеп директоры Ляззат Нәлібаева ІІ орынды иеленсе, қазақ тілі пәнінен көрсетілген сабағымен “Құндылықтарға негізделген тәрбие үдерісін модельдеу” тақырыбындағы ұлттық құндылықтарды ұлықтаған жобасының үздік шығуымен Қазалы ауданындағы №17 мектептің директоры Эльмира Сматуллаева жүлделі І орынды жеңіп алып, арнайы дипломдармен марапатталып, бағалы сыйлықтар иеленді.
Мұнан бөлек Жалағаш ауданындағы №123 мектеп директоры Айнұр Мыханова Қазақстан тарихы пәнімен Шиелі ауданындағы №41 мектептің директоры Айгүл Елжасарова қазақ әдебиетінен көрсеткен сабақтары бойынша “Үздік сабақ” номинациясымен марапатталса, «Мектеп. Кәсіп. Болашақ» жобасымен Қармақшы ауданындағы №85 мектеп-лицейінің директоры Шаттық Шыңғысова мен Қызылорда қаласындағы №101 мектебінің директоры Айгүл Өткелбаева “Жасыл мектеп” жобасымен “Үздік жоба” номинацияларының иегерлері атанды.
Байқаудың қорытынды кешіне қатысқан басқарма басшысы Асқарбек Темірбекұлы барлық 23 қатысушыға алғыс хаттар табыстады. Соның ішінде №149 Ә.Монтаев атындағы орта мектебінің директоры Айнұр Архабаева, №153 Ш.Есенов атындағы мектеп-лицейінің директоры Қанат Амзиевтер бар.
Н.Көбегенұлы
