Жақсы адам ғана жақсы ұстаз бола алады

Мұғалім – мамандық болса, ұстаздық адам бойындағы ұлы қасиет. Ұстаз мәртебесінің артуы ең алдымен ұстаз деген есімге қаншалықты лайық болуына байланысты. Бүгінгі жаңа дәуірдің, жаңарған білімнің мұғалімге қояр талабының жүгі ауыр, олар үлгі боларлық бар жақсылық атаулының ең биігінен көрінуі тиіс. Осы орайда, жақсылық атаулыны ішкі жан дүниесімен қабылдап, берік қалыптасқан көзқарасты оқушы бойына дарыта білетін, жасампаздық пен шығармашылық, өз-өзіне сенімділік пен сабырлылық, табандылық пен төзімдік сияқты мінез-құлық ерекшеліктерімен, сондай-ақ өзгелерге қолдау көрсете білетін, жылы жүрегімен жақсылық сәулесін шашып, мейірім шуағын төгіп тұратын ұстаздың бірі – Гүлбану Ағайдарова.

Аяулы ұстаз Гүлбану Сағындыққызы 2010-2013 жылдар аралығында Қорқыт ата атындағы Қызылорда университетінің «Бастауышты оқыту педагогикасы мен әдістемесі» мамандығы бойынша оқып шықты. Содан бері ұстаздық жолда еңбек етіп келеді. Ол 2009 жылы №85 орта мектебіне бастауыш сынып мұғалімі қызметінен бастап қазірде әлеуметтік педагог қызметін атқарып келеді. Кез-келген істе тәуекелге бара алуы, өзіне тапсырылған жауапкершілікті ала отырып, оны ұйымдастыра білуі оның іскерлік жетістіктерін шындай түсті. Бала жанының бағбанына айналған, шәкіртке сапалы білім беруде жалықпаған ұстаздың жеткен жетістігі аз емес.

Ұстаздық қызметтегі ұқыптылығы мен тиянақты ісі оны марапат мінберінен көрінуіне сеп болып келеді. 2017 жылы ұстаздар күніне орай Қызылорда облысының білім басқармасы басшысынан «Алғыс», 2016-2017 оқу жылында №85 орта мектеп директорының «Үздік ұйымдастырушы мұғалім – 2017» дипломымен марапатталған. 2019 жылы аудандық білім бөлім басшысынан «Озат» шығармашылық орталығының ұйымдастыруымен өткізілген «Бүгінгі білім берудегі құндылықтар» атты байқаудан I орынға қол жеткізсе, «Нұрлы болашақ» республикалық қашықтықтан оқыту олимпиадасында I дәрежелі жеңімпаз дипломының иегері атанды. 2020 жылы ҚР Білім және ғылым министрлігі «Дарын» республикалық ғылыми-практикалық орталығы математика пәнінен бастауыш сынып мұғалімдеріне арналған республикалық «Педстарт» қашықтық олимпиадасынан және Daryn.online білім беру олимпиада сайты бірлесіп педагогтардың біліктілігін арттыру мақсатында ұйымдастырған I республикалық «Кемеңгер ұстаз» олимпиадасының III дәрежелі жүлдегері атанды. 2020 жылы «BlLlM-ORKENlETl» ұлттық инновациялық ғылыми-зерттеу орталығының «Мәртебелі ұстаз» байқауының I дәрежелі жеңімпазы атанса, Тәуелсіздік күні мерекесіне орай Қармақшы аудандық білім бөлім басшысының Құрмет грамотасы, 2021 жылы аудандық білім бөлімі басшысының Құрмет грамотасы, Төретам кент әкімінің Алғыс хатымен марапатталған.

Зерделей келсек, ұстаздың 2009 жылдан бері жеткен жетістіктері ұшан-теңіз. Қызметте абыройы артқан Гүлбану Сағындыққызы бүгінде адал жар, асыл ана, аяулы әже. Өмірдегі кездескен қиыншылықтарға мойынсұнбай, адал еңбектің арқасында, өзінің қарапайымдылығы мен төзімділігінің нәтижесінде осындай жетістіктерге ие болып келеді. Осы тұста бақытын еңбектен таба білген ұстаздың қызмет жолына береке тілеп, мақтанына айналар шәкірттері көп болсын дейміз.

Жанар КАРМЫСАКОВА,

№85 орта мектептің математика пәнінің мұғалімі

Қармақшы ауданы, Төретам кенті.

Пікір үстеу

Э-пошта мекенжайыңыз жарияланбайды. Міндетті өрістер * таңбаланған