«Меридиан» оқу орталығының мәселесі комиссияда қаралды

Қызылордада оқу орталықтары жетерлік. Атаулары оқу орталығы болғанымен қайсыбірінің тереңінен оқытып, бала санасына білімді сіңіріп, жарытып жатқандары шамалы. Тіпті, заң бұзып, баланың құқығын таптап жүргендерін де құлағымыз шалатын. Бекер емес екен. Әлеуметтік желіні шулатып, одан «Қазақстан» ұлттық арнасында көрсетілген Қызылорда қаласындағы «Меридиан» оқу орталығы туралы көп ішінде әр түрлі пікірлер өртше қаулады. Тәрбиеленуші балалардың еденде жатқаны көп ата-аналарды да ойландырып тастаған болатын. Осы жөнінде білмекке Қызылорда қаласы бойынша білім бөліміне сұрау салдық.

Жауапқа назар аударсақ, 2022 жылғы 18 мамырда әлеуметтік желіде «Меридиан» оқу орталығы туралы шыққан бейнежазбаға қатысты сол күні Қызылорда облысының Білім саласында сапаны қамтамасыз ету департаменті, Қызылорда облыстық білім басқармасы, Қызылорда қаласы бойынша білім бөлімі жанынан құрылған мониторингтік топ мүшелері балалардың құқықтарын қорғау бойынша «Меридиан» оқу орталығына барып, зерделеу жұмыстарын жүргізіпті. Зерделеу барысында орталықта мектепке дейінгі топтардың белгілі бір сағат емес, толық күн бойы жұмыс жасайтыны анықталған. Сонымен бірге ата-ана мен орталықтың келіспеушілігі негізінен санитарлық-гигиеналық талаптардың сақталмауы орын алған. Бұған дәлел ретінде ата-аналар өздерімен жасаған келісім шартты алға тартқан. Онда: «Қалалық СЭС бекіткен (бұйрық №005-2017) ас мәзіріне сай үш мезгіл тамақтандыру», – делінген тармақ бар. Бұл келісім шарт бекітілген нысанда емес, өзара келісім негізінде жасалған. «Бұдан оқу орталығы тарапынан балаларға қатысты өз бетінше әрекет ету көрінісі байқалады» дейді бөлімнің жауапты маманы.

Мониторингтік топ мүшелері балалардың құқықтары бойынша белгіленген нормалар сақталмағанын, орталықта тамақ әзірлеу орнының санитарлық-эпидемиологиялық талаптарға сәйкессіздігін, балаларды демалу орнымен қамтамасыз етпеуін айтып отыр. Осыған байланысты, 23 мамырда қала әкімдігі жанындағы кәмелетке толмағандардың ісі және олардың құқықтарын қорғау жөніндегі комиссияда «Меридиан» оқу орталығында білім алушы кәмелетке толмаған балалардың құқықтық мүддесін қорғау туралы мәселе қаралды.

Комиссия отырысына «Меридиан» оқу орталығының жетекшісі, жеке кәсіпкер Айнұр Сүндетованың өзі келді. Бүгінгі күні үйірмелерді қоспағанда орталықта 21 адам жұмыс жасап жатқандығын, 5-6 жастан бала қабылдайтынын, әр баланы тәрбиелегені үшін айына 15-20 мың теңге көлемінде ақы алатынын, мемлекеттен субсидия алмайтынын ашық айтты. Мәселе оның құжаттарында болып тұр. Комиссия мүшелері оның нормативтік құжаттарының шикі екенін, қызмет көрсетудің ережелеріне сәйкес жұмыс жасау керектігін баса айтты. Мәселені талқылай келе орталыққа қатысты білім бөлімі тарапынан зерделеу жұмыстарын жүргізу тапсырылды. Орын алған санитарлық-гигиеналық және төтенше жағдайдағы қауіпсіздік шараларының сақталмауына байланысты Қызылорда қалалық санитарлық-эпидемиологиялық бақылау басқармасына, Қызылорда қаласы Төтенше жағдайлар басқармасына жедел зерделеу жүргізу бойынша хаттар жолданды. Қорытындысымен алдағы айда комиссияға шығарылатын болды.

Бұл бір мысал. Бүгінгі күні қаладағы оқу және білім орталықтары Қызылорда қаласы бойынша білім бөлімінен рұқсат алмай, орта мектептерге емін-еркін кіріп-шығуды шығарған. Ақылы сайыс өткізеді, жазғы курсқа ақылы шақыратын жарнама парақшаларын таратады. Соның бірі Әйтеке би көшесі, 44 б үйде орналасқан «Достық» білім беру орталығының 5-сыныпқа арналған жарнамалық парақшасы қолымызға тиді. 6-24 маусым аралығында үш апталық курстың құны 36 мың теңге екен. Күніне 2400 теңгені айналдырады. Бұл жеңілдік жасалған бағасы. Ата-анасымен сөйлесіп яки ескертпей, 10 жастағы оқушының қолына парақшаны қыстырып жібереді. Баланың құқымен санасып жатқан білім беру мекемелері жоқ, басынып алған. Осы бойынша білім бөлімінен сұрағанымызда аталған орталықтың рұқсат сұрамағаны белгілі болды.

Біз мәселенің басын қозғадық. Алдағы уақытта бұл тақырыпқа қайта айналып соғатын боламыз. Сіздің балаңыз оқу орталығына барып жүр ме, қандай білім алып жүр, ондағы санитарлық жағдай көліңізден шыға ма, ата-ана? Редакция сіздің сөзіңізге де құлақ асады. Ендеше атсалысыңыз, мәселені бірге шешейік.

Н.КӨБЕГЕНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған