Ұстаздың өз басылымын оқуына кедергі болмаса екен
2023 жылға жазылу науқаны аяқталды. Дегенмен биыл мерзімді баспасөз үшін оңай болған жоқ. Тұрақты әрі ойлы оқырмандардың өздері кейбір мекеме басшыларының әрекеттеріне таң қалысты. Редакция қызметкерлері түсінен шошып оянған кейіп танытқандарды түсінбей дал болды. Тіпті, ақпараттың бетінен түспейтін кей министрлер ақпарат құралдарына келгенде кірпідей жиырылды. Жылына екі рет жазылу науқаны жүргізілетін болса, енді оған кедергілер тап болды. Бірінші кедергі келтірушілер «Педагог мәртебесі туралы» заңды дұрыс түсінбегендер. Дұрыс түсінбеген жерде дұрыс түсіндіру де болмайтыны белгілі. Ендеше біз түсіндірейік.
«Педагог мәртебесі туралы» заң дүниеге келместен бұрын «Ұстаз мәртебесі» газеті жарыққа шығып, ұстаздармен тығыз байланыс жасауды бастап қойған. Ұстаз құқығын қорғауда тиісті заңның керек екенін айтқан да біз болатынбыз. Сонымен араға бірнеше жыл салып, педагогтар үшін тиісті заң шықты. Осы күні баспасөзбен «жауласып» жүргендер Мәжіліс пен Сенат депутаттары қолдаған заңның «Педагогтің кәсіптік қызметін қамтамасыз ету» деген 6-бабына сүйенеді. Онда «Педагог кәсіптік қызметін жүзеге асыру кезінде тауарлар мен көрсетілетін қызметтерді сатып алу бойынша міндетті жүктеуге жол берілмейді» делінген.
Біріншіден, баспасөзге жазылу я тауар, я қызмет емес. Оны терең ойлаған адам ғана түсінеді. Баспасөз – шығармашылық, сауаттылық, мәдениет, идеология! Баспасөзден бойын аулақ салу терең ойланудан құр қалумен тең.
Енді заңға келейік. Педагогтің кәсіптік қызметін жүзеге асыру кезіндегі құқықтарына зер салсақ, кәсіптік қызметін жүзеге асыру кезінде педагог ғылыми, зерттеу, шығармашылық, эксперименттік қызметті жүзеге асыруға, педагогтік практикаға жаңа әдістемелер мен технологияларды енгізуге құқығы бар. Және де педагог өзінің кәсіби шеберлігін, зерттеу, зияткерлік және шығармашылық деңгейін үздіксіз жетілдіруге міндетті. Яғни, педагог кәсіптік қызметін жүзеге асыруда шығармашылықпен айналысу керек. Ол үшін әріптестерінің еңбектерімен танысу, жалған емес, нақты жаңалықтардан хабардар болу, кәсіби қабілетін шыңдау үшін байқауларда бақ сынау қажет-ақ.
Міне, дәл осы ерекшеліктерді «Ұстаз мәртебесі» газетінен таба алады. 12 жылға жуық уақыттан бері ғылыми, педагогтік, шығармашылық бағыттар бойынша ұстаздармен, оқушылармен бірге жұмыс жасап келеді. Баспасөз бетіне педагогтар пәндік сабақтарын жариялау арқылы газетті тәжірибе алаңына айналдырса, «Үздік жас ғалым» байқауы арқылы ұстаздар өз шәкірттерін ғылымға баулыды, ал жас қаламгерлер шығармашылығын ұштау мақсатында оқушылардың поэзиялық және прозалық туындылары газет бетінде үзбей жарияланып тұрды. Алдағы жылдары бұл үрдіс жалғасын таба бермек. Бұл тұрғыда «міндетті жүктеу» туралы әңгіме саяси басылымдарға болмаса, бізге тән емес. Шыны керек, педагогқа керек пе, керек емес пе, мұғалімге кез келген басылымды тықпалай беруге болмайды. Сондықтан алдағы уақытта ұстаздың өз басылымын оқуына кедергі болмаса екен.
Екіншіден, заң баптарында «газет-журналға жазылмасын» деген нақты сөз жоқ. Жалаулатып жүргендер 6-бапты асыра пайдаланып жүр. Егер баспасөзге жазылуға қарсы болса, газет оқитын оқырманнан олардың санасының төмен болғаны. Бар болғаны – сол! Оның үстіне, оқымайтын адамның құқығын қорғағысы келетіндер оқитындардың құқына қол сұққанмен бірдей. Келесі жолы құқығы бұзылғандармен біз жұмыс жасайтын боламыз.
Баспасөзге жазылу дегенде тайлы-таяғына дейін іске кірісетін бір мекеме бар. Ол – Қазпошта. Өткен ғасырдан бері халықтың арасына барып, әңгімелесіп, одан қалды, газет-журналға насихат жұмыстарын жүргізіп, жазылдыру жұмыстарымен айналысып, баспасөзді таратуда еңбегі орасан. Пошташы қызметі ерекше, күндіз де, кешке де, жаздың аптабында да, қыстың аязында да оқырманға газет-журналды апарады, хат-хабарды жеткізеді. Биылғы баспасөзге жазылу барысында бізбен бірге жүгіріп жұмыс жасаған Қазпошта қызметкерлері. Қала, аудан, тіпті ауылдың түкпіріндегі оқырманға газет пен хат жеткізу үшін редакция мен халықтың арасын жалғастыруға тырысады.
Өткен бейсенбіде «Қазпошта» АҚ Қызылорда облыстық филиалының жаңадан тағайындалған директоры Ғалымжан Кенжебаев облыстағы бірнеше басылымдардың бас редакторларымен кездесіп, шай үстінде емен-жарқын әңгімелесті. Ғалымжан Арыстанбекұлы бұл салада жиырма жылдай еңбек өтілі бар, саланың қыр-сырын меңгерген маман. Бұған дейін Сырдария ауданындағы пошта бөлімін басқарған ол орталыққа келе сала іске белсене кірісіп кеткенін байқадық.
— Өздеріңіз білесіздер, «Қазпошта» АҚ Қызылорда облыстық филиалы басылымдар мен бұқараны байланыстыруда аянбай еңбек етіп келеді. Елімізде және шетелдерде шығатын газет-журналдарға жазылу, оларды оқырманға жеткізу, тарату қызметтерін тиімді ұйымдастырып келеді. «Қазпошта» өзіне жүктелген негізгі міндеттің бірі баспасөзге жазылдыру болғандықтан келесі жылға жазылу науқанын өткізіп, қорытындылап отырмыз,- дей келе, жазылу барысындағы мәселелерді қозғап, осы бағытта оңтайлы жұмыстарды бірлесе ұйымдастырудағы ұсыныстарды тыңдады. Өз кезегінде бас редакторлар сөз алып, өз ой-пікірлерін ортаға тастап, нақты да ұтымды ұсыныстарын айтты.
Кездесу соңында «Қазпошта» директоры бас редакторлар мен редакция қызметкерлеріне жаңа жылдық сый-сыяпат жасады.
Н.Көбегенұлы
