ҰСТАЗ – ҰЛЫҚ ЕМЕС, ҰЛЫ ҚЫЗМЕТ

Шәкірттерін білім нәрімен сусындатып, адамгершілік рухта тәлім-тәрбие беріп, жақсы қасиеттерді бойына дарытуда ұстаздар қауымының еңбегі ерен. Сондықтан қазан айының алғашқы жексенбісінде еліміз бойынша мәртебелі мамандық иелеріне кәделі құрмет көрсетіп, үздіктерін марапаттау игі дәстүрге айналған.

Ақын Мағжан Жұмабаевтың «Алты алаштың баласы бас қосса, төр – мұғалімдікі» деген сөзі қазір де өзекті. Астарында үлкен ой, ұшқыр ұғым жатқан осы бір мамандық иелерінің қоғамдағы алар орнын осы сөз айқындап беріп отыр.

А.Тоқмағанбетов атындағы мәдениет үйінде ұстаздар күніне орай ұлағатты жандарға арналып, «Ұстаз – ұлық емес, ұлы қызмет» тақырыбымен салтанатты кеш өтті. Жиынға қала әкімінің орынбасары Ақзира Қасымова арнайы қатысып, қала ұстаздарын кәсіби мерекелерімен құттықтап, жүрекжарды лебізін жеткізді.

– Ұлағатты ұстаздарымыз шәкірттеріне кенен ғылым мен кемел білімнің дәнін себуде. Қажырлы еңбектеріңіздің жемісі – оқушыларымыз республикалық, облыстық деңгейдегі сайыстардан жүлделі орындардан көрініп, түрлі байқау-жоба жарыстарынан жоғары көрсеткішке жетіп отыр. Сонымен қатар, мектеп ұжымдары әрдайым қоғамдық іс-шараларға да аянбай атсалысып, барлық салада белсенділік танытуда.

Білім жүйесінің жаны да, жүрегі де, тірегі де – ұстаз. Сондықтан еліміздің келешегі сіздердің қолдарыңызда! Тәуелсіз мемлекетіміздің әлеуетін арттырып, атын әлемге танытатын білімді де талантты шәкірттеріңіз көбейе берсін,– деді Ақзира Бақтыбайқызы.

Салтанатты жиында қала әкімінің орыбасары Ақзира Қасымова мерейлі 80, 85, 90 жасқа жеткен ардагер – ұстаздар Бәкір Ысқақовқа, Жұмасұлу Ағыбаеваға, Ахмет Әбсадықовқа, Жаңабек Алтынбековке шаһар басшысының арнайы құттықтау хатын табыстап, сый-құрметін көрсетті.

Мерекелік кеште ұстаздардың бірқатары ҚР Оқу-ағарту министрлігінің «Құрмет» грамотасымен №15 мектеп-лицейдің мұғалімі Жанхия Сәрсенбаева және министрліктің Алғыс хатымен №5 мектеп-лицейдің мұғалімі Надежда Ющенко мен №264 мектеп-лицейінің мұғалімі Айнұр Аманкелдіқызы марапатталды. Сонымен бірге Қызылорда облысы әкімінің Алғыс хатымен де қызылордалық ұстаздар марапат төрінен көрінді.

Педагогтердің қоғамдағы мәртебесін және беделін арттыру, үздік мұғалімдердің озық педагогикалық іс-тәжірибесін тарату мақсатында 2012 жылдан бастап республикалық «Үздік педагог» конкурсы өткізіліп келеді. Салтанатты шарада «Үздік педагог» атанған 10 ұстазға қала әкімінің 150 мың теңге ақшалай сыйақысы табысталды. Ал, қалалық «Үздік педагог» байқауы І кезеңінің жеңімпаздарына ноутбук берілді.

Салтанатты шара соңы Оқушылар сарайының қызметкерлері мен жас өнерпаздары ұсынған концерттік бағдарламасына ұласты.

Осыдан кейін А.Тоқмағанбетов атындағы мәдениет үйінде өткен шара өз жалғасын тауып, Қызылорда қаласы бойынша білім бөлімінің басшысы Ерлан Теңізбайұлы үздік ұстаздарды марапат биігіне шығарып, арнайы құттықтап, құрмет көрсетті.

– Құрметті ұстаздар! Баршаңыздың отбасыларыңызға амандық, дендеріңізге саулық, еңбектеріңізге табыс тілеймін. Ұстаз – жай білім беретін мамандық иесі емес. Ол – екінші ата-ана, тәрбиенің де қайнар көзі. Бәріміз де ұстаздарға қарыздармыз. Сондықтан ұлағатты ұстаздардың алдында барлық адам құрметпен бас иеді. Өмірде адамға берілер екі нұр бар болса, соның бірі – күннің сәулесі, ол адамның жүзіне құйылады, ал екіншісі – ұстаздың сөзі. Сөз арқылы шәкірттің жүрегіне құйылатын нұр бәрінен биік тұрады,– деді қалалық білім бөлімінің басшысы.

Жылы лебізден кейін қаланың білім саласында өзіндік орны бар бірнеше сала қызметкерлері марапат биігінен көрінді. Мерекелік шарада ұстаздар қала әкімінің «Алғыс» хатымен, қалалық білім бөлімі басшысы мен қалалық білім қызметкерлерінің кәсіподақ төрағасының «Құрмет грамотасымен» марапатталды.

А.Сырлыбай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған