Адамзат қаншалықты өмір сүрсе, медицина соншалықты бірге жүреді. Туғаннан бастап соңғы тыныс алғанға дейін адамның жанында әрдайым ақ халатты абзал жан дәрігер болатыны рас. Жақында медицина қызметкерлері күніне орай ҚР Денсаулық сақтау министрлігіне қарасты Санитариялық-эпидемиологиялық бақылау комитетінің «Ұлттық сараптама орталығы» Қызылорда облысы бойынша филиалында мерекелік кеш өтті. Кеште филиал директоры Фарида Қалиева:
«Біздің саламызда бүгінде еңбекқор және жауапты кәсіпқойлар, көптеген бірегей мамандар жұмыс жасап жүр. Осындай мерекелік күнде барлық қызметкерлерімізге ризашылығымды білдіремін. Адал ниетті еңбектеріңізбен, халықтың санитариялық-эпидемиологиялық саламаттылығын қамтамасыз етуде ең жылы, ең шынайы алғыс сөзге лайықсыздар.
Құрметті әріптестер! Қиын да қызықты, мәртебелі жұмыста табыстарға жете беріңіздер! Өз міндеттеріңізді абыроймен атқарып, ел құрметіне бөленіп, кәсіби біліктіліктеріңіздің арқасында биіктерден көріне беріңіздер!» деп, әріптестерін құттықтады. Содан кейін жыл бойы абыройлы қызмет атқарған мамандарды марапаттады.
«Еңбек ардагері медалі» және «ҚР Еңбек сіңірген қызметкері» төсбелгісімен Алпысбай Серкешбаевты, «Денсаулық сақтау саласына қосқан үлесі үшін» медалімен Лаззат Орынбаеваны марапаттады. Ал, кәсіподақ ұйымының төрағасы Олжас Ізмағамбетов кәсіподақ атынан «Үздік әлеуметтік серіктес» медалімен мекеме басшысы Фарида Қалиеваны марапаттады.
Кеш барысында 60 және 50 жас мерейтой иелеріне де құрмет көрсетілді. Сол күні саланың үздік медицина қызметкерлері де марапат төрінен көрінді. Үздік қызметкерлер «Ұлттық сараптама орталығы» аппаратының, кәсіподақтың және «Ұлттық сараптама орталығы» филиал директорының Құрмет грамотасымен марапатталды.
Б.Бағдатұлы
