Сыр медицинасында серпін бар

Әлеуеті әлденіп, ахуалы артып келе жатқан Сыр өңірінің қай саласының болсын қадамы қарқынды. Бұл аймақтың инвестициялық тартымдылығын толықтырып, дүйім жұрттың елге деген ықыласын арттыруда. Оның ішінде медицина саласының орны айрықша. Өйткені, облыста жыл өткен сайын медициналық мүмкіндіктер молайып келеді. Мамандандырылған және жоғары технологиялық медициналық көмек түрлерінің сапасы да жақсара түсуде. Бүгінде өңірдегі 804124 тұрғынға 18 стационарлық, 21 амбулаториялық-емханалық медицина ұйымдары қызмет көрсетеді.

Өткен жылы салада соны серпілістер, айтулы жаңалықтар орын алды. Атап айтқанда, 1,1 миллиард теңгеге медициналық құрал-жабдықтар алынды. Материалдық-техникалық база жаңарды. Арал және Шиелі аудандарына лизинг арқылы 2 жылжымалы медициналық кешен қолданысқа берілді.

Бүгінде аймақта 7 жылжымалы медициналық кешен бар. Олар жоспарға сәйкес жұмыс жасауда. Жыл көлемінде 122183 тұрғынға медициналық көмек көрсетілді. Облыс бойынша жедел жәрдем қызметін 79 топ атқаруда. Санитарлық авиация серпінді жұмыс жасауда. Бұл бағыттағы көмекті 7 санитарлық автотранспорт, 2 ұшақ және 1 тікұшақ көрсетеді. Бәрі қажетті медициналық техникамен жабдықталған.

Сондай-ақ, амбулаториялық қызметтер мен емханалардың жұмысы жаңғыртылды. Астана мөлтек ауданында №3 қалалық емхананың филиалы ашылды. Жаңақорған ауданы Жаңарық елді мекенінде дәрігерлік амбулатория қолданысқа берілді. Арал, Қазалы, Шиелі аудандарында 6 медициналық бекет іске қосылды. Бас шаһарамызда орталық қалалық емхана ашылып, ел игілігі үшін жұмысын бастады.

Медицина саласында сұранысқа ие «жалпы медицина» мамандығы бойынша мамандар даярлауға облыс әкімінің 127 гранты бөлінді. 2021 жылы 84 дәрігер жұмысқа қабылданды.

Аймақ дәрігерлерінің шетелде тәжірибе алмасу жұмыстары ширап келеді. Өткен жылы Түркия Республикасында 7, Біріккен Араб Әмірліктерінде 14 бас дәрігер және олардың орынбасарлары тағылымдамадан өтті.

2021 жылы өңіріміздің 17 медициналық ұйымы аккредиттеуден өтіп, сапа стандартына сай деп танылды.

Пандемия басталғалы бері өңірде індеттің ілмегіне ілінген 24116 адамның 98 пайызы дертіне дауа тапты. Ал, бүгінде эпидемиологиялық ахуал тұрақты. Ұжымдық иммунитетті қалыптастыру мақсатындағы коронавирус инфекциясына қарсы екпе алу жұмыстары облысымызда қарқынды жүргізілді. Нәтижесінде ұжымдық иммунитет қалыптасқан аймақтар қатарындамыз.

Скрининг – халық денсаулығын нығайтуды жүйелі жүзеге асыруға бағытталған бағдарлама. Ауырып ем іздегенше, ауырмаудың жолын іздеуге шақыратын жоба тұрғындарды саламатты өмір салтын сақтап, ұзақ өмір сүруге үндейді. 2022 жылдың 5 айында 168561 тұрғын скринингтік тексеруден өтті.

Облыстың денсаулық сақтау саласы үшін халыққа сапалы медициналық қызмет көрсету – басты басымдық. Бұл ретте 1,9 млрд. теңгеге медициналық құрал-жабдықтар алынатын болады. Сонымен қатар республикалық бюджеттен 250 млн. теңге бөлініп, қаламыздың сол жағалауынан қан орталығы құрылысын жүргізуге баса мән беріліп отыр.

Бүгінде Сыр медицинасының елдегі абыройы асқақ. Өңірде тұрғындардың денсаулық деңгейі жоғарылап, аймақ дәрігерлері күрделі оталарды жасауда біліктіліктерін танытуда. Бұрын шетелде немесе Нұр-Сұлтан мен Алматы қалаларында жасалатын күрделі оталар кардиохирургия орталығы, офтольмология орталығы мен көпбейінді балалар ауруханасында өз дәрігерлеріміздің бастамасымен сәтті жүзеге асуда. Атап айтсақ, тері арқылы коронарлық стендтеу отасы көпбейінді облыстық аурухана мен Қазалы ауданаралық ауруханасында жасалуда.

Аймақ басшысының қолдауы, салаға бөлініп отырған қаржыландыру облыстың денсаулық сақтау саласында айрықша ілгерілеуге жол ашты. Ал, аймақтың ақ халатты абзал жандары болса тұрғындарға сапалы медициналық көмек көрсетуге өздерінің барлық білімдері мен мүмкіндіктерін сарқа жұмсауда. Табысты болашақтың негізі, бақытты өмірдің кепілі – ұлт денсаулығы жолындағы адал еңбектері үшін ақ халатты абзал жандарға алғысымыз шексіз. Кәсіби мерекелеріңіз құтты болсын!

Н.Меңдібай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған