Денсаулық сақтау министрі Ақмарал Әлназарованың Қызылордаға келгенін әлеуметтік желіден көрдік. Көпшілік түгілі, бұқаралық ақпарат құралдары хабарсыз. Бұл жолы журналистерге айтылмапты. Себебі халықпен кездесуді, қабылдауды жоспарламаған. Тек медициналық нысандарды аралап көрген. «Ауылдық денсаулық сақтауды жаңғырту» ұлттық жобасы аясында атқарылып жатқан жұмыстар көп, салынып жатқан нысандар бар, соларды көрді» дейді денсаулық сақтау басқармасының баспасөз хатшысы Ж.Жалиева. Сонда тағы не жоспары бар? Білгіштер оның қырық күндік асқа келгенін айтады. Оған дейін медициналық нысандарды аралаған.
Сонымен облыс әкімі Нұрлыбек Нәлібаев Сыр өңіріне келген ҚР Денсаулық сақтау министрі Ақмарал Әлназарова және ҚР Парламенті Мәжілісінің депутаты Мұрат Ергешбаевпен бірге сол жағалаудағы Қан орталығына барыпты. Орталықтың іргетасы өткен жылдың тамыз айында қаланған болатын. Мұнда жылына 5000-10000 адамға қызмет көрсетіледі. Нысан жақын күндері пайдалануға берілмек. Сондықтан жоспарланған жұмыс уақытылы әрі сапалы атқарылуы тиіс.
Нұрлыбек Машбекұлы мен Ақмарал Шәріпбайқызы көпбейінді аурухана құрылысымен де танысыпты. Наурыз айында салынып басталған үш қабатты ғимаратты «SHEBERBUILD» ЖШС 2025 жылдың соңында ел игілігіне табыстамақ.
Негізі биыл аймақ медицинасына 140 млрд. теңге бағытталған. Мемлекет басшысының тапсырмасымен басталған «Ауылдық денсаулық сақтауды жаңғырту» ұлттық жобасы қарқын алды. Ұлттық жоба аясында 11 млрд. теңгеге 27 нысан салынуда. Өткен жылы елді мекендерде 15 жаңа дәрігерлік амбулатория, 1 медициналық бекет ашылды, бүгінде барлығы ел игілігі үшін қызмет етуде. Қалған 11 нысан жыл соңына дейін пайдалануға берілмекші. Былай қарағанда, бәрі керемет секілді көрінеді. Басқаша зерделесек, аурухана салып, ауру шақырған жақсы емес. Оның үстіне, қызылордалық науқастар басқа қалаларға, тіпті көршілес мемлекеттерге барып, ем алып жүр. Бұл нені көрсетеді, бұл туралы министр жақ ашпайды.
«Ауыл – ел бесігі» бағдарламасы да денсаулық саласына «бүйрегін» бұрып тұр. Қызылорда қаласының Досан елді мекенінде жаңа медициналық бекет, Баймұрат батыр ауылынан жаңа дәрігерлік амбулатория ашылғаны соның дәлелі.
Көпбейінді облыстық аурухана базасында жаңа МРТ аппараты іске қосылып, 70 орындық перинаталдық бөлім жұмысын бастағанынан көпшілік хабардар. Облыс орталығында бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы жүруде. Бұл аты жаман аурудың өңірде көбейгенін білдірмей ме?
Жаңақорған ауданы, Төменарық ауылында дәрігерлік амбулаториясымен қоса 15 төсектік ауылдық аурухана салынуда. Енді жақын күндері Жаңақорған ауданындағы көпбейінді аудандық орталық аурухана базасында, жыл соңына дейін Арал ауданында «Қамқорлық» оңалту орталықтары ашылмақ.
Аймақтың медицина саласын дамытуға бюджеттен тыс ресурстар да тартылып жатқанын айтайық. «Қазақстан халқына» қорымен тұрақты әріптестік байланыс орнатылып, соңғы екі жылда бөлінген 2 млрд. теңгеден астам қаржыға облыстық балалар ауруханасы базасында «Қамқорлық» реабилитациялық орталығы ашылды, аса қымбат дәрі-дәрмек алынды.
«Қазақстан халқына» қоры облыстық онкология орталығына еліміздегі 3 өңірде ғана бар (Қызылорда, Ақтөбе, Алматы), 1 млрд. 100 млн. теңгенің жылжымалы медициналық кешенін сыйға тартқанын мақтанып та айтып жүрміз.
Осы жаңалықтармен танысқан министр А.Әлназарова облыстық онкология, қан орталықтарының және қалалық орталық емхана жұмысымен танысуға барыпты. Таныстыру шарасына облыс әкімі Нұрлыбек Машбекұлы, облыстық денсаулық сақтау басқармасының басшысы Олжас Ермекұлы да қатысқан.
200 төсек орынды құрайтын облыстық онкология орталығында хирургиялық, химиотерапиялық, паллиативтік, сәулелік, онкогематологиялық және реабилитациялық бөлiмдер мен күндізгі стационар халыққа медициналық қызмет көрсетедi. «Ал, жұмыс сапарында барған қалалық орталық емханада халыққа тегін кепілдендірілген, мамандандырылған медициналық көмек, консультациялық-диагностикалық және стационарды алмастыратын медициналық көмек көрсетуде. Өз ретінде тұрғындар тарапы Акмарал Шәріпбайқызы мен емхана мамандарына ризашылықтарын бiлдiрiп, iзгiлiк танытты» деген ақпарат таратты облыс әкімінің баспасөз қызметі.
Көпшіліктің түсінбегені, арнайы сапармен келген министр халықпен кездесіп, ұсыныстарына құлақ асудың орнына нысан аралап жөнімен кеткені. Сол мезетте әлеуметтік желіде облыстық жұқпалы аурулар ауруханасында жатқан науқастың емдеу орнының сол мезеттегі жай-күйін бейнелейтін видеосы жарияланды. Артынша журналист Айдос Мырзалының жазбасы фейсбукке шығып, көпшілікке ой салды.
«Басқа өңірден келген қонақтар ауырып қалмасын. Өңірдің ауруханасын көріп, инфекциялық ауруына қоса, жүректері де қосыла кетуі екіталай. Мына бейнежазбаны кеше досымның статусынан байқап қалдым. Масқара емес па?! Біз кинодан көрген құдды Совет үкіметінің кезі секілді. Қыры кеткен кастрюль, жарылған қабырғалар, құлпы бұзылған және құмырсқа жайлаған әжетхана, суы далаға ағатын умывальник… Өздерінің айтуынша, тендерден ұтқан 5 мл инелері нашар, теріге кірмей, ауыртатын көрінеді. Айтпақшы, бүлінген жаялықтарды алмастыруды талап еткен науқастарға мінез көрсететін медбикелеріміз де бар екен. Ем алып жатқандарға арналған ваннада науқастар емес ыдыстар кезекте тұрса жетісерміз». Қысқаша осы.
Оған облыстық жұқпалы аурулар ауруханасы жауап берді: «Үстіміздегі жылдың наурыз айынан бастап облыстық жұқпалы аурулар ауруханасына қарасты Ғ.Мүсірепов көшесі 75 үй мекен-жайы бойынша орналасқан бас емдеу ғимаратына күрделі жөндеу жұмыстары басталды. Мердігер мекеме “Абу-Сер” ЖШС. Қазір мұнда 3 бөлімше ғана медициналық қызмет көрсетуде. Қалған бөлімшелер Ә.Бөкейханов 60 мекен-жайында орналасқан ғимаратқа көшірілген.
Бүгінгі күні құрылыс жұмыстары қарқынды жүргізілуде. Осы айдың соңында №1 емдеу корпусы пайдалануға беріледі. Құрылыс барысына қосымша жұмысшылар тартылуда. Күрделі жөндеу жұмысының сапасы тікелей облыс әкімдігі мен облыстық денсаулық сақтау басқармасының назарында.
Облыстық жұқпалы аурулар ауруханасының типтік жобадағы ғимараты осыдан 35 жыл бұрын салынған. Күрделі жөндеу жұмысының жүргізілуі емдеу мекемесі үшін тарихи сәт. Құрылыс жұмыстарына қарамастан аурухана ұжымы өзіне жүктелген міндетті қалтқысыз орындауда! Видео авторының нақты шағымдары болатын болса аурухана әкімшілігіне немесе 87774524389 телефон нөміріне хабарласуға болатынын жеткіземіз» депті.
«Жаңа нысандарды аралаған министр Ақмарал Әлназарова осындай проблемасы шаш етектен ескі нысандарды өз көзімен көріп, аурулармен неге жүздеспеді? Әлде өзі қызмет атқарған тұстағы кемшілктерді көруге жүрегі дауаламады ма екен?» деген ой келеді. Қалай болғанда да, елдің алдында жүретін қайбір шенеунік халықпен, елдің пікірімен санасып жүргені жөн болар.
Уақыт осымен бітпейді. Министр туған жеріне тағы да бір келер, сол кезде «жан-жағына қарар, айтылып жатқан әңгімеге құлақ тосар, жазылып жатқан мәселеге үңілер» деген үміттеміз. Ал, келіп-кету жоспар сызбасын өзі ақылға салып қараса, тіпті мәселе туындамас еді.
Н.Естемес
