М.Мәметова атындағы Қызылорда педагогикалық жоғары колледжі Жастар ісі жөніндегі комитет жанынан құрылған «Ассорти» студенттер театры кезекті жаңа қойылымын сахналады. А.Тоқмағанбетов атындағы қалалық мәдениет үйінде халықаралық театр күніне орай сахналанған психодрама жанрындағы «Трейлер» спектаклі түрлі оқиғаларға негізделген үш көріністі қамтыды.
Аласұрған сезім мен алдамшы махаббаттың жетегінде жүріп, асқақ арманға толы болашағының астан-кестеңін шығарған студент қыздың өкінішке толы өмірі көркем суреттелді. Басты бейнеде көрінген Д.Кеңесова өз кейіпкерінің ішкі-жай күйін сезінген және спектакльдің оқиға желісінің толыққанды көрерменге жетуіне «Япурай» хор ұжымының орындауындағы «Әлди» әні үлкен мүмкіндік берді. Осы тұста режиссер көрермен залын толық қамтып, әрбір детальді ұтымды пайдаланған.
Қойылым режиссері Бекасыл Ерланұлының жиынтық образ ретінде алған Клоун бейнесі қойылымның шешімін айқындап, тақырыбын, түпкі идеясын аша білді. Клоун роліндегі Б.Ешмұратовтың ойыны арқылы бүгінгі күннің ащы шындығын көрсетуге ұмтылған. Спектакльдің темпо-ритмін сақтап, қойылымға ден берген де осы Клоун бейнесі болды.
Ғашықтар. Саябақта кездейсоқ жолығып, таныстықтың соңы үлкен махаббатқа ұласқан А.Мамзада мен Д.Асанов сомдаған образдар да өз деңгейінде шыққан. Ал, қос ғашықтың сезімін, кедергілерге қарамастан олардың бір-біріне деген көңілін шынайы жеткізуде гитарамен ән айтқан Қ.Әбдікәрімнің ойыны да өзгеше әсер етті. Сонымен қатар, Шеф роліндегі Ж.Ешмурат, көп балалы ана ролінде көрінген Ж.Тулегенова, көпшілік сахнасындағы Ш.Сағадат, Д.Өмірзақ, Н.Өтепберген, Н.Агинов, Қ.Рүстем, А.Кабадулла, Д.Баймұрат, Б.Махамбет, Д.Дәурен, Д.Шайман, Е.Сәндібеков және жеке би орындаған А.Егізбай, А.Байзақтың өнерін ерекше атауға болады.
Жалпы қойылым кейіпкерлерінің психологиялық тебіреністері мен күрделі иірімдерін «Нұргүл» халықтық би ансамблі көркемдеген қойылым дөп басып, нанымды шығуына септігін тигізді. Режиссердің көздегені – қазіргі қоғамдағы түйткілді мәселелерді суреттеу ғана емес, көрермендердің спектакльден кейін ой түйіп қайтуы. Осы тұста режиссермен етене жұмыс жасаған хормейстер С.Көздібаева, концертмейстер А.Бәкір, хореограф Ж.Құрманғазықызы және спектакльді музыкамен көркемдеген Н.Амангелді, жарықпен әрлеген Ғ.Көктілеуов пен Г.Серік секілді шығармашылық ұжымның еңбегі зор. Студент жастарға осынша мүмкіндік беріп, шығармашылық еркіндік сыйлаған колледж директоры Жақсыгүл Қоханқызына алғыс. Спектакль соңында Қазақстанның еңбек сіңірген қайраткері, «Құрмет» орденінің иегері, майталман режиссер Хұсейн Әмір-Темір сөз алып, кәсіби мамандар болмаса да, кәсіби деңгейге дейін көтеріліп, үлкен шығармашылық жұмыстың нәтижесін көргенін мақтанышпен айтып жеткізді. «Әлімсақ» журналының бас редакторы, әдебиеттанушы ғалым Нұрлан Көбегенұлы халықаралық театр күні мен халықаралық күлкі күнін байланыстырған және қос тақырыпты қамтыған спектакль ретінде қабылдап, баға берді. Студент жастардың қоғамдағы келеңсіз жайттарды санаға сіңіріп, қорытындысы ретінде өзіндік көзқарасын, ой байламын боямасыз жеткізгені және өмір шындығын көркемдік шындыққа сәтті айналдырғаны үшін рақметін айтты.
Спектакльдің сәтті шығуы драматургияға тікелей байланысты десек, осы тұрғыда қойылым жасаушылар оқиғалар тізбегі арқылы тақырыптың идеялық мазмұнын аша отырып, өзекті мәселелер тоғысқан заманауи спектакль ұсына білді. Дегенмен жекелеген актерлік ойындарды, декорацияны, жалпы қойылымның тұтастығын кәсіби мамандардың көмегімен айшықтап алса, қалың көрерменге қаймықпай ұсынатын, тіпті эскперименттік фестивальге қоюға тұрарлық қойылым болатыны даусыз. Сондықтан болар, қойылымнан ерекше әсер алдым. Себебі жастардың киелі сахна арқылы жеткізе білген еркін әрі кіршіксіз таза өнеріне сүйсіндім.
Ұ.Қылышбаева
Н.Бекежанов атындағы қазақ академиялық
музыкалық драма театрының әдебиет бөлім меңгерушісі,
театртанушы, сыншы
