МИНИСТР СЫР МӘДЕНИЕТІНІҢ МӘЙЕГІНЕ ҚАНЫҚТЫ

Дәуірлер діңгегі, ғасырлар ғаламаты, жылдардың жарқын шоқжұлдызы өнер ғана. Иә, қай кезеңде де, қай елде болмасын, мәдениет пен өнер – халықтың рухани болмысының айнасы, бағдарлы болашағының берік бастауы. Мәдениеттің өсуі – елдің өсуі, ұлттың өсуі. Тәуелсіздігіне тәубе етіп, Мәңгілік ел болуды мұрат тұтқан халқымыздың рухани бай дүниесінің өлшемі мен өресі де осы мәдениет пен өнер өн бойында өскін алып жатқаны ақиқат.

Өшпес өркениетке қол созған еліміз үшін экономикалық өсіммен қатар елдің рухани бай құндылықтарын да дамыту мәселесі қолға алынды. Заманауи жабдықталған мәдениет ошақтары салынып, ел игілігіне берілді, түрлі бағдарлама негізінде елдің мәдени білімін тереңдету, ең бастысы ел дамуы үшін мәдениеттің де озық деңгейде дамуы қарастырылды. Өнер мен мәдениет – егіз ұғым. Бір-бірінсіз жетімсіреп тұратындай. Мәдениеттің мәйегі өнер арқылы дәріптеліп, халықтың құлағына жетіп жатады. Осы орайда, төскейінде берекенің қазаны қайнаған, босағасына бақ пен береке ұялаған, ақындық пен жыраулықтың ақ бесігі саналған қасиетті Сыр елінде мәдениет пен өнерді һәм спортты дамыту саласында атқарылып жатқан игі істер – ұлттық дәстүрді дамыту, өнер мен мәдениеттің өмірмен өзектестігін бағамдау, өнерді өнеге тұтқан елдің рухани дүниесін байыту мақсаттарын көздейді. Сол бағытта атқарылып жатқан жұмыстар да ауқымды.

Міне, осыған орай, күні кеше ғана облыс әкімі Нұрлыбек Нәлібаев Сыр еліне жұмыс сапары аясында келген Мәдениет және спорт министрі Дәурен Абаевпен кездесіп, бірлескен жұмыстарды талқылады. Аймақ басшысы өңірдегі мәдениет, спорт саласындағы ауқымды жұмыстарға тоқталып, министрлікпен бірге жүзеге асатын жобалар туралы пікірлесті. Министр сапары аясында Қызылорда қаласында бірқатар мәдени орындар мен спорттық нысандармен танысты. Сондай-ақ, халықпен кездесіп, өзекті мәселелерге жауап берді. Ол алдағы уақытта Қорқыт ата кешені мен Байқоңыр ғарыш айлағына барады.

Дегенмен де, Сыр өңіріне жұмыс сапарымен келген ҚР Мәдениет және спорт министрі Дәурен Абаев облыс әкімі Нұрлыбек Нәлібаевпен бірге өңір орталығындағы бірқатар мәдени нысандарды аралап, спорт кешендерінің жұмысын көрді.

Алдымен ведомство басшысы «Мұз айдыны» кешеніне барып, балалармен кездесті. Спорттық-сауықтыру кешенінде сырғанау мұз айдыны, волейбол, баскетбол-командалық ойындар залы, жекпе-жек үшін оқу-жаттығу залы, спорттық билерге арналған хореографиялық сынып қарастырылған. Қазіргі таңда нысанда 615 адам 7 спорт түрінен жаттығуда.

Облыс әкімі мен министр «Тарлан» спорт кешенінде аялдады. 2016 жылы ашылған нысан бір мезетте 120 жаттығушыны қабылдай алады. Спорт кешенінде бокс, күрес, таеквондо, ауыр атлетика және жаттығу залдары, демалыс бөлмелері, медициналық кабинет, асхана мен жатақхана бар. Мұнда 100 жаттықтырушы жұмыс істейді және 350-ден аса адам жаттығып жүр. Бүгінге дейін спорт кешені қабырғасында 20 ҚР спорт шебері, 78 ҚР спорт шеберіне үміткер дайындалған.

Спорт кешені алаңында Нұрлыбек Нәлібаев пен Дәурен Абаев жас спортшылармен кездесіп, олардың спортқа деген ынта-жігерін арттыру бағытындағы шаралар туралы пікірлесті.

Облыс әкімі балалар жылы аясында өңірде демеушілер көмегімен 80 ойын алаңын салу басталғанын жеткізді. Сондай-ақ, Оқушылар үйі де бой көтеретінін тілге тиек етті. Министр ұлттық спортты, оның ішінде ат спорты мен ат туризмін заманға сай жаңғырту мақсатында «Ұлы дала жорығы» атты жаңа жоба жарыққа шыққанын тілге тиек етіп, марафонға белсенділік танытып, жанкүйер болуға шақырды.

1200 шақырымдық марафон-бәйге елордамыздан бастап Ақмола, Қарағанды, Ұлытау, Қызылорда және Түркістан облыстарын қамтиды. Марафон жеңімпаздарына І орын 30 млн теңге, ІІ орын 20 млн теңге, ІІІ орын 15 млн теңге ақшалай сыйлықтармен марапатталады.

Одан әрі қарай министр облыстық музейге барып, Сыр еліндегі құнды жәдігерлермен танысты. Ғимаратта 11 көрме залы бар, мұнда аймақ тарихы көне дәуірден бастап қазіргі заманға дейін көрсетілген. Музейде 62 мыңнан аса жәдігер сақтаулы.

Дәурен Абаев жұмыс сапарын Ә.Тәжібаев атындағы облыстық әмбебап ғылыми кітапханасында жалғастырды. Онда облыс тұрғындарымен кездесуге барып, азаматтармен жеке қабылдау өткізді. Өзекті сауалдарға жауап берді. Елге белгілі азаматтар мәдениет, спорт,өнер саласына қатысты сауалдарға нақты жауап берді.

Қызылорда облысында өткен жылдан бастап 11 спорт нысанының құрылысы жүргізілуде. Сонымен бірге, биыл 4 жаңа объекті эксплуатацияға енгізіледі деп күтілуде, олар Қазалы ауданының Үрмәш Түктібаев ауылы, Жаңақорған ауданының Ақжол ауылы, Шиелі ауданындағы Шиелі кентінде және Сырдария ауданының Бесарық ауылындағы спорт кешендері.

Иә, спортты, мәдениетті өнердің қоймасы деп жатамыз, ал қызылордалық мәдениет саласы қызметкерлерінің қоймасы ешқашан ортая қоймайды. Себебі сала мамандарының жүйелі жұмысы мен іс жоспары, талайды таң қалдыратын таланттары ешқашан тасада қалған емес. Өңірдегі өнер саласының өркен жаюы сол бір елдің талантының, қанға сіңген қасиеттің құны іспетті. Сондықтан мәдениет майданының сарбаздары еңселерін кез келген қонақтың алдында тік ұстап жүре алады.

А.СЫРЛЫБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған