Қаламына қасиет ұялаған

Қарашығы салатын қияға мән,

Ақпаратсыз ғаламға сия ма адам.

Қадамына құт біткен тілшілердің,

Қаламына қасиет ұялаған.

Өмір өрнек тағдырмен үйлесесің,

Найза қалам жүректен түйресе сұм.

Газет исі бұрқырап шыға қалса,

Жусан исін жұтқандай күй кешесің.

Тілшінің тіліп түзер мұң тілі бал,

Ақпарат айдынында күн құбылар.

Құлып түсен анамның сандығындай,

Көк жәшікте тәттінің түр-түрі бар.

Заңғар заман ұқпаймыз кей істі біз,

Жолымыз жолсыздарға түйісті жүз.

Арқалаған алтыным бар болса егер,

Не үшін жантақ жеуге тиістіміз.

Бастан кешіп сан қилы оқиғаны,

Бір күні мың ғасырға татиды әрі.

Тілшілер тынбай жазған бұл өмірді,

Болашақ тарих етіп оқиды әлі.

Айдар САЙЛАУОВ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған