ҚАЛА КҮНІ АЯСЫНДА “Кітап Fest” ФЕСТИВАЛІ ӨТТІ

Қызылордадағы қала күні мерекесі әлі де қарқынды жалғасуда. Әу бастан шаһардың мереке күніне орай ұйымшылдықпен ұйымдастырылған айшықты шаралар бірінен кейін бірі өткізілуде. Қала тұрғындарының түгел көңілінен шыққан шаралар тап бір думандай өткізіліп, қуаныштан жүздері нұрлануда. Әсіресе, биылғы тойлаудың жөні бөлек болған сыңайлы. Астарына үңілсең, рухани сабақтастықтың сарыны сезіледі. Қанша дегенмен, мәдениеттің мәйегі байқалып, дәстүр дәріптелгендей. Шынтуайтында, шырайлы шаһардың шырағы сөнбек емес. Себебі, мерекенің түпкі мақсаты қала тұрғындарының берекесін арттырып, ізгілік ізін жалғай түсті. Тегінде, тойлау – танымымызға таңсық дүние емес. Дей тұрғанмен, қала күнін тойлаудың түбірі рухани кемелдіктің үлгісін үлестіргендей болды.

Сонымен, қала күні мерекесінің кезекті тағылымды шарасы «Өнер арбаты» бойында өтіп, шаһар басшысы Асылбек Шаменов кітап көрмесі мен сатылым акциясына, сондай-ақ “Буккроссинг” кітап сөресінің ашылу салтанатына арнайы қатысты. «Мәдениеттің мәйегі – кітап» деп қарастырсақ, айтулы шараның адамға тигізер ықпалы зор екенін анық аңғаруға болады. Салтанатты шара барысында Қала әкімі Асылбек Өмірбекұлы алдымен Өнер арбатын бойлай орналасқан “Өткені сырлы, келешегі нұрлы – Қызылорда” атты кітап көрмесі мен кітап жәрмеңкесін аралап шықты.

Кітап фестивалі аясында Алматы қаласынан “Отбасы хрестоматиясы” қоғамдық қоры және Түркістан қаласынан “Мазмұндама” қоғамдық қоры, сондай-ақ облыс орталығындағы “Кітап ал” кітап дүкені өз кітаптарын сатылымға шығарып, кітап мерекесінің көрігін қыздырды. Кейін кітап жәрмеңкесін тамашалап болған соң қала әкімі бастаған құрметті қонақтар “Буккроссинг” өзің оқысаң, өзгеге табыс ет қағидасына негізделген кітап сөресінің ашылу салтанатына қатысып, кітапхананың үздік оқырмандарын марапаттады.

Тағылымды шараның тынысты ашып, ой-өрісті кеңейтер кезеңі мұнымен шектелмеді. Қала әкімі Асылбек Шаменов, қалалық мәслихат хатшысы Ибадулла Құттықожаев және Қазақстанның еңбек сіңірген қайраткері, режиссер Хұсейн Әмір-Темір кітап сөресінің лентасын қиып, арнайы кітапшаға өз лебіздерін жазып қалдырды. Кітап мерекесі ары қарай қалалық кітапханалардың мәдени шарасы мен “Bookathon” зияткерлік сайысына ұласты.

Замира АХМЕТ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған