Қызылорда облыстық білім басқармасының басшысы Мейрамбек Шермағанбет соңғы аптада білім саласына серпін беретін біршама шаруалардың басын қайырды. Өңірдегі білім жүйесі, оқушылар және олардың дарынын ашу бағытында да жетістіктер жолы жалғасып жатыр. Оның бәрі нақты жоспар мен нық талаптың арқасында болса керек.
Сөзуар жастардың серіктестігі
Барлық оқу орнындағы білім алушылардың жан-жақты дамуына, сыни ойлау дағдыларын қалыптастырып, ақпаратты дұрыс талдап үйренуіне барынша мүмкіндік жасалу қажет. Бұл ретте мектептер мен колледждерде дебат қозғалысын қайта жаңғыртудың ықпалы маңызды. Осыған орай аймағымыздағы білім беру ұйымдарында бүгінде мектеп директорлары мен оқушылар, студенттер арасында дебат қозғалысының жұмысы жандануда. Осы бағытта облыста алғаш рет «Өңірлік дебат» лигасы құрылып, оның жобалық бағыттары айқындалды.
Облыстық білім басқармасының басшысы Мейрамбек Шермағанбет жаңадан құрылған өңірлік дебат лигасының мүшелерімен кездесіп, оқушылар мен жастар арасында пікірсайыс қозғалысын дамыту, жетілдіру бағытындағы атқарылатын жұмыстарды талқылады. Басқарма басшысының айтуынша, лиганы құрудағы басты мақсат – оқушылардың сыни ойлауын, ораторлық шеберлігін, серіктестік қарым-қатынасты дамытуға мүмкіндік беру болып отыр.
Оқу-ағарту министрлігі тарапынан мектеп және студенттік дебат қозғалысын дамыту, дебат клубтарын біріктіру мақсатында өңірлік лига құру жөнінде тапсырмалар берілген болатын. Осыған орай бүгін өңіріміздегі пікірсайыс қозғалысын дамытуда өз үлестерін қосып жүрген өздеріңізбен бас қосып отырмыз. Алдағы уақытта лига жұмысын дамыту бағытында жұмыстарды өздеріңізбен бірлесе отырып атқаратын боламыз,- деді Мейрамбек Зинабдинұлы.
Лига мүшелерімен өткізілген кездесуде дебатшылар өздерінің ой-пікірлерін айтып, ұсыныстарын жеткізді. Пікірсайыс ойындарының телевизиялық нұсқасын қолға алу, сондай-ақ, мектеп директорлары мен мұғалімдер арасында да ойындарды өткізу мәселелері де қамтылды. Осылайша биылғы жаңа оқу жылынан бастап аймағымыздағы дебат жұмыстары жаңаша бағытта жүргізілмек.
Осал санаттағы балалардың бағы
Биылғы жаңа оқу жылында әлеуметтік осал санаттағы 4708 бала колледжде оқуға грант иеленді. Былтырмен салыстырғанда мемлекеттік тапсырыс аясында оқуға түскендердің саны 1600-ға артты. Бұл квота санаттары тізбесін кеңейтудің арқасында мүмкін болды. Биыл аймағымызда колледждердегі мемлекеттік тапсырыс саны ұлғайып, 4708-ге жетіп отыр. Бұл – рекордтық көрсеткіш.
— Мемлекет басшысының тапсырмасы бойынша министрлік 2025 жылға дейін сұранысқа ие мамандықтар бойынша тегін техникалық және кәсіптік білім берумен 100% қамтуды жоспарлап отыр. Ал, биыл тегін оқығысы келетіндер үшін квоталардың тізімі кеңейтілді. Көпбалалы отбасы балалары үшін 5% квота, толық емес отбасы балалары үшін 1% (осы мәртебеге үш жылдан кем болмауы керек) ерекше білім беру қажеттілігі бар балаларды тәрбиелеп отырған отбасы балалары үшін 1% квота қосылды. Соның арқасында жаңа оқу жылында квота санатына 4708 талапкер түсті. Бүгінде колледждерде жайлы жағдай жасау үшін жұмыс істеп жатырмыз,- деді облыстық білім басқармасының техникалық және кәсіптік білім беру бөлімінің басшысы Бекжан Есенбаев.
Айта кетейік, биыл колледждерге облыс бойынша барлығы 6128 талапкер оқуға қабылданды. Студенттердің басым көпшілігі техникалық мамандықтар мен педагогика және медицина салаларын таңдаған.
Басқарма басшысымен бетпе-бет жүздесуге болады
Облыстық білім басқармасының басшысы кезектілік тәртібімен жазылған азаматтарды жеке мәселелері бойынша қабылдады. Қабылдауға 9 азамат келіп, өз мәселелерін жеткізді. Басым бөлігі жұмысқа орналасу мен жеке шағын орталық ашу және балабақшадағы мәселелерге қатысты.
Қабылдауға келген Салиха Әбілпейізова Жаңақорған ауданы, Өзгент ауылындағы шағын орталықты жекешелндіру туралы айтса, ал Сабалақ саяжайындағы жеке балабақша меңгерушісі Гүлсәнім Аукенова жан басына қаржыландыру бойынша мәселесін көтерді. Басқарма басшысы жауапты мамандарға әрбір мәселені мұқият қарап, заң аясында пысықтауды тапсырды.
Айта кету керек, осы кезге дейін басқарма басшысы 4 жеке қабылдау өткізіп, 63 азаматтың мәселесін қарады.
Аудандарды аралады
Мейрамбек Шермағанбет 16-17 қыркүйек күндері Қармақшы және Жалағаш аудандарына іссапармен барып, бірқатар білім беру ұйымдарының жылу маусымына дайындығы мен күрделі жөндеу жүргізіліп жатқан мектептерді аралады.
Басқарма басшысы алдымен Қармақшы ауданы бойынша күрделі жөндеуді қажет ететін ІІІ Интернационал ауылындағы №108 мектепке, Ақтөбе ауылындағы №109 және Тұрмағанбет ауылындағы №29 мектептерге барып, жөндеу жұмыстарының жоспарымен танысты. Сонымен қатар аудан орталығында ағымдағы жылдың қазан айында аяқталуы тиіс №30 мектептің газдандыру жұмыстарының жай-күйін де көріп қайтты.
Мұнан соң Жалағаш ауданына барып, білім беру ұйымдарының жылу маусымына дайындығын тексеріп, күрделі жөндеуді қажет ететін мектептердің жоба сметалық құжаттарының жасалу барысымен танысып қайтты. Сондай-ақ, Мейрамбек Зинабдинұлы аудан орталығында орналасқан №123 мектеп-лицей ғимаратының жанынан салынатын 200 орындық қосымша ғимарат құрылысын салу мәселесін талқылап, №31, №33 мектептерінің де жөндеу жұмыстарының жоба сметалық құжаттарын аяқтауды тапсырды.
Жеке мектептердің жайы
Мейрамбек Шермағанбет аудандармен қатар қаламыздағы бірқатар жеке мектептерді аралап, жағдайымен танысты. Басқарма басшысы ең алдымен облыс орталығындағы 500 оқушыға арналған заманауи «Зерде» интеллектуалды мектебіне барды. Білім ордасының материалдық-техникалық базасымен танысып, оқушылармен және мұғалімдермен кездесті.
Мұнан кейін қаламызда жаңадан ашылған «125 HIGH SCHOOL» жекеменшік мектебінде болып, жұмыс процесін өз көзімен көрді. Аталмыш білім ордасының басты ерекшелігі — 10-11 сынып оқушыларына арналған. Мұнда енді қызылордалық мектеп бітіруші түлектер мектеп бағдарламасы мен дайындық курсын арнайы методика негізінде бір жерде оқи алатын болады. Қыркүйек айынан бастап жұмыс істеп жатқан жеке мектепте ҰБТ-ға қатысатын 100-ден астам оқушыға 30 мұғалім ұлттық сынақтың жеті бағыты негізінде білім беруде.
Аралау барысында Мейрамбек Зинабдинұлы қаламыздағы «Бәйтерек SCHOOL» жеке мектебінде болып, материалдық базаларымен танысып, оқушылармен сұхбаттасты. 2019 жылдан бастап ашылған жеке білім беру ұйымында бүгінде 340 орындық екі ауысымды мектеп, 600 орындық ақылы мектеп және 250 балаға шақталған мектеп интернаты жұмыс істеуде. Сондай-ақ, 1522 оқушы білім алатын білім ордасында 8 үйірме жұмысы жүйелі жұмыс жасауда.
Айта кетейік, осы кезге дейін облыста 6500-ден аса орынға арналған 19 жеке білім ордасы пайдалануға берілсе, биыл жаңа оқу жылының қарсаңында 2 жаңа мектеп ашылды.
А.СЫРЛЫБАЙ
