ТАЛАПКЕРЛЕР ҰБТ БЕЛЕСІН БАҒЫНДЫРДЫ

«ҰБТ-ға дайындалу барысы мен бағыты қалай? Жаңа үлгіге талапкерлер үйренді ме? Биылғы қорытынды қандай?» деген сауалдың салмағы арта түсуде. Бұл сұрақ қазір мектеп бітіруші түлектерді, олардың ата-аналарын, мұғалімдер қауымын қатты толғандырады. ҰБТ-ға байланысты, сұрақтарына қатысты алыпқашпа пікірлер мен реніштер жыл сайын айтылады. Ал, ҰБТ-ның мақсаты – мектеп саласындағы білім беруді обьективті бағалап, оқушының білім алудағы жоғарғы нәтижелерге қол жеткізу талпынысын қанағаттандырып, ынтасын арттыру, білімін саралау жолы.

Өкінішке қарай, Ұлттық бірыңғай тестілеуге қатысты кейбіреулер «тест жүйесі робот сияқты тәрбиелеп жатыр. Бұл жүйе енгізілгелі оқушылардың өз ойын жеткізуі, түсіндіруі атымен жоғалып барады, білімді бағалаудың бұл жүйесі өзін-өзі ақтамады» деген желеу сөздермен ҰБТ жүйесін жарамсыз еткісі келетіндер де бар. Бірақ, ҰБТ-ның ең басты ерекшеліктерінің бірі білімі толық түлектердің өз деңгейін толық ашып көрсетіп, гранттық білім алуға барлығына бірдей тең дәрежеде қол жеткізуіне мүмкіндік беру. Емтиханға қарағанда тиімді әрі әртүрлі тәсілдермен берілген жауап нұсқаларын таңдап алуға мүмкіндік бар. Енді ҰБТ технологиясына, ұйымдастыруы мен өткізілуіне орай кейбір келеңсіз, жергілікті факторларды қатаң бақылау жылдан-жылға күшейтіліп жатыр. Бұл ең бастысы әділдікке салынған жол екені даусыз.

Енді өңірге оралайық. Биыл Қызылорда облысында 17 маусым мен 5 шілде аралығында өткізілген Ұлттық бірыңғай тестілеу өз мәресіне жетті. Облыс бойынша 7506 оқушы мектеп бітірсе, сынақ тапсыруға ниет білдірген түлектердің 6452-і немесе 87 %-ы ҰБТ-ға қатысты.

Биылғы Ұлттық бірыңғай тестілеу Қызылорда қаласы мен Жаңақорған және Қазалы аудандарындағы 3 пунктте жүргізілді. Тестілеудің әділ өту барысын қадағалау мақсатында ҚР Оқу-ағарту министрлігі мен Сыбайлас жемқорлыққа қарсы агенттігінен, үкіметтік емес ұйымдар, «Адалдық алаңы» жобалық кеңселерінің өкілдері және қоғам белсенділері бар арнайы мониторингтік топ мүшелері бақылады. Сондай-ақ, ҰБТ жүргізілген әр аудитория арнайы бейнебақылау камераларымен жабдықталып, тестілеу барысы тікелей эфир арқылы көрсетілді.

ҰБТ қорытындысы бойынша тестілеуге тіркелген азаматтардың 87 пайызы емтиханға қатысты. 815 талапкер 100-ден жоғары баллды жинаса, бұл өткен жылғы көрсеткіштермен салыстырғанда бір деңгейде қалып отыр. Ал, 416 тестіленуші 49 баллдан төмен алып, шекті деңгейден өтпеген.

Айта кетейік, облыс бойынша ең жоғары 137 баллды Қызылорда қаласы, №101 мектеп-лицейдің түлегі Дәулет Омаров иеленді. Сол секілді 134 балды Жаңақорған ауданының түлегі Алуа Ахмети, 133 балды Қазалы ауданының қос түлегі Аяулым Әзен мен Іңкәр Смағұл жинаса, Қармақшы ауданынан Қарақат Қанибекова 132 баллға ие болды. Ал, Арал ауданының екі түлегі Аршын Әбдіхалық мен Сымбат Жақсылықова және №4 облыстық дарынды балаларға арналған мектеп интернатының түлектері Нұрдаулет Бергенбекұлы, Шаһида Қайырбек, Ернұр Дүйсенбек 131 ұпай жинап, жоғары нәтиже көрсетті.

А.ӘДІЛЖАНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған