Әке перзенті үшін асқар тау. Әрбір үйдің іргетасының мықты болып, тату-тәтті өмір сүруі әкеге байланысты. Қазақ халқы да «әке көрген оқ жонар» деп, әкенің баласы үшін тау тұлға екенін айтып кеткен. Қазіргі таңда қоғамнан жаға ұстатар жайттарды естіп, оқып жүрміз. Баласынан безген әке, үйдің берекесін алып, жанжал тудыратын даукес жан атандырған жағдайлар кездеседі. Алайда, қоғамды дүрліктіретін жаңалықтар отбасына қамқор әкелердің абыройына дақ түсіре алмайды. Ақ пен қарадан тұратын өмірде, жаман да, жақсы да жандардың болатыны хақ. Түрлі әлеуметтік желілерде отбасылық құндылықтарды көрсетіп, ата-ананың мейірімін паш ететін видеолар кеңінен тараған. Осы секілді дүниелердің түрлі болмысқа ие ата-анаға, оның ішінде әкелер қауымына үлгі болары анық.
Биыл елімізде алғаш рет маусым айының үшінші жексенбісі Әкелер күні болып мерекелік күнтізбеге енгізілді. Жалпы отбасының беріктігі ер-азаматқа тікелей байланысты. Халқымызда әкені ерекше құрметтеп, мәртебесін жоғары қою дәстүрі орныққан.
Бала бойындағы жақсылы-жаманды қасиеттерін байқаса, қазақ оны ең бірінші әке мен ата тәрбиесінен көреді, тегіне тартқан дейді. «Әкесі сондай адам еді, атасы жақсы адам, көрегенді бала» деп, ер адам тәрбиесін тілге тиек етеді. Өйткені әкесінің баласына қалдырған ең үлкен мұрасы – оның жақсы тәрбиесі. Ал, әке мектебінен өткен бала сол мұраға қиянат жасамауға тырысқан.
Атаулы күнге орай қаладағы Тұңғыш Президент саябағында «Әке – отбасы тірегі» атты спорттық сайыс өтті. Сайыс мақсаты— әке мен балаларды бір мақсатқа жұмылдыру, отбасындағы береке-бірлікті нығайту.
Шараға Қызылорда облысы әкімі аппаратының басшысы Шахмардан Байманов қатысты. «Әкелер Одағы» ҚРҚБ Қызылорда облысы бойынша филиалының басшысы Ержан Ескендір қатысушыларға сәттілік тіледі.
— Әкелер күні тек мереке ретінде ғана атап өтілмеуі керек деп есептеймін. Өйткені ер-азаматтар өз отбасына көңіл бөлу, ұл-қызды тәрбиелеу арқылы ұлтты тәрбиелейді. Әкелердің мәртебесін көтеру және оларға қолдау білдіру баршамыздың парызымыз деп білемін. Бүгінгі сайысқа қатысушы барша әкелерге сәттілік тілеймін,- деді Ержан Ескендір.
Белсенді әкелер мен олардың балалары қатысқан спорттық сайыста түрлі салада қызмет ететін жалпы саны 18 команда (18 отбасы) өзара бақ сынасты. Олар ұлттық ойындардың бірі — «Асық ату» және «Көңілді эстафета» бойынша жарысты.
Айта кетейік, Әкелер күніне орай 17-18 маусым күндері Қызылорда қаласы мен барлық аудандарда әртүрлі форумдар, көңілді спартакиадалар, жиындар және танымдық кездесулер өткізілді.
Балалықпен әкенің қадіріне жете алмай, сөз қайтарып, ақылына құлақ аспайтын сәттер де кездеседі. Ата-ана баласына ешқашан жамандық тілемейді, аналар махаббатын ашық түрде көрсеткенімен, әкелер қауымы табиғатынан қатты болатындықтан іштей жақсы көретінін аңғартады. Бала үшін әкенің берген ақылы, білімі, тәрбиесі ержеткен шақта өз нәтижесін көрсетеді. «Бір әкенің тәрбиесін жүз мектепте бере алмайды» дегендей, әкелердің өмірде көмегін тигізер ақылдарын өзге ешкімнен ести алмаспыз. Әйгілі жазушы Марк Твеннің өзі «Жасым он төртте болғанда әкем өте ақылсыз, ақымақ еді. Мен оны әзер түсінетінмін. Ал, менің жасым жиырма бірге келгенде, сол жеті жыл аралықта әкем өте ақылды, өзіме ақылшы-тіреу, одан артық адам жоқ болды» деп, әке жайында пікір қалдырған. Қоғамда өз орнын тауып, тарих тақтасында есімі жарқырап тұрған азаматтардың көбі әкелеріне алғыстарын айтып, жеткен жетістіктерін әкеге байланысты екендігінен хабардар етеді. Сол секілді бүгінгі таңда әке мен бала арасындағы байланысты насихаттап, жас отбасыларға үлгі бола білген шарт. Қаламызда өткізілген сайыс әке мен баланың арасындағы үлкен махаббаты көрсеткендей. Жыл сайын тағылымға толы сайыстар өткізіліп, қаламыздағы отбасылардың ішкі әлемін паш ету күн тәртібіне қойылып отыр.
Қазақбай ӘНДЕШ
