Қазіргі таңда еліміздің дамуындағы маңызды бағыттардың бірі – қоршаған ортаны қорғау, экологиялық мәдениетті қалыптастыру және туған жердің тазалығы мен көркеюіне әр азаматтың жауапкершілігін арттыру. Бұл бағыт Мемлекет басшысының тапсырмаларында да айрықша мәнге ие. Табиғатты қорғау, елді мекендерді абаттандыру, көгалдандыру жұмыстарын жүйелі түрде жүргізу – баршаға ортақ міндет.
Осы мақсатта елімізде жүзеге асырылып келе жатқан «Таза Қазақстан» республикалық экологиялық акциясы қоғамды игі іске жұмылдырып, қоршаған ортаға деген жауапкершілікті арттыруға бағытталған маңызды бастамаға айналды. Аталған акцияның мәні – айналаны тазарту немесе көгалдандырумен ғана шектелмей, қоғам мүшелерінің бойында табиғатқа жанашырлық, еңбекке құрмет, туған жерге деген сүйіспеншілік сияқты құндылықтарды қалыптастыру.
Сақтапберген Әлжіков атындағы №144 мектеп-лицейінің ұжымы да бұл бастаманы қолдап, мектеп аумағын абаттандыру және көгалдандыру бағытындағы жұмыстарға белсене атсалысып келеді. Мектеп аумағында тал көшеттерін отырғызу жұмыстары ұйымдастырылып, ұстаздар қауымы туған жердің табиғатын көркейтуге өз үлестерін қосты.
Көшет отырғызу – сырт көзге қарапайым ғана жұмыс болып көрінгенімен, оның тәрбиелік мәні зор. Бүгін отырғызылған талдың саясын ертеңгі ұрпақ көреді. Яғни әрбір көшет – болашаққа жасалған қамқорлықтың, туған жерге деген жанашырлықтың белгісі. Табиғатты аялау арқылы біз балаларға сөзбен емес, нақты іспен үлгі көрсетеміз.
Мектеп – тек білім беретін орын ғана емес, сонымен бірге жас ұрпақтың азаматтық ұстанымы мен өмірлік құндылықтары қалыптасатын маңызды тәрбие ортасы. Сондықтан білім алушыларға қоршаған ортаны қорғаудың маңызын түсіндіру, табиғатты ұқыпты пайдалануға үйрету, қоғамдық жұмыстарға белсенді қатысуға баулу – тәрбие жұмысының ажырамас бөлігі.
Бұл ретте «Адал ұрпақ» тәрбиесінің маңызы ерекше. Адал ұрпақ – туған жеріне немқұрайлы қарамайтын, өз ортасына жауапкершілікпен қарап, қоғамдық іске белсенді араласатын, еңбекті бағалайтын азамат. Табиғатты қорғау да осы азаматтық жауапкершіліктің нақты көрінісі.
Оқушыға «табиғатты қорға» деп айту жеткіліксіз. Оны табиғатты қорғауға нақты әрекет арқылы тәрбиелеу қажет. Ағаш отырғызу, мектеп ауласын таза ұстау, көгалдарға қамқорлық жасау, қоршаған ортаға зиян келтірмеу – қарапайым болғанымен, баланың бойында үлкен жауапкершілікті қалыптастыратын әрекеттер.
«Таза Қазақстан» бастамасының тәрбиелік мәні де осында деп ойлаймын. Тазалық – адамның мәдениетін көрсететін ұғым. Ал, туған жердің тазалығына атсалысу – Отанға деген сүйіспеншіліктің бір көрінісі. Өз ауласын, өз мектебін, өз ауылын таза ұстаған бала ертең елінің тағдырына да жауапкершілікпен қарайтын азамат болып қалыптасады.
С.Әлжіков атындағы №144 мектеп-лицейінде білім сапасын арттырумен қатар, оқушылардың бойында ұлттық және жалпыадамзаттық құндылықтарды қалыптастыруға да ерекше көңіл бөлінеді. Адалдық, еңбекқорлық, жауапкершілік, отансүйгіштік, үлкенге құрмет, кішіге ізет және табиғатқа жанашырлық – жас ұрпақ тәрбиесінің негізгі бағыттарының бірі.
Президент тапсырмаларын білім беру ұйымдары деңгейінде жүзеге асырудың бір жолы – осындай нақты әрі пайдалы жұмыстарды жүйелі ұйымдастыру. Әрбір игі бастама оқушыға ой салып, оны қоғамдық өмірге араласуға жетелейді. Мектеп ұжымы ұйымдастырған экологиялық жұмыстар да осы мақсатқа бағытталған.
Көшет отырғызу барысында ұстаздардың өздері еңбек етіп, табиғатты көркейтуге үлес қосуы – оқушылар үшін үлкен өнеге. Мұндай жұмыстар арқылы білім алушылар еңбектің қадірін түсінеді, ортақ іске жауапкершілікпен қарауды үйренеді. Ең бастысы, олар туған жердің әрбір тал-шыбығына, әрбір тазалық жұмысына немқұрайлы қарамау керектігін ұғынады.
Таза мектеп – таза орта. Таза орта – дені сау, мәдениетті және жауапты ұрпақтың қалыптасуына негіз. Ал, жауапты ұрпақ – елдің жарқын болашағы. Сондықтан мектеп аумағын көгалдандыру, тазалықты сақтау және қоршаған ортаны қорғау бағытындағы жұмыстар алдағы уақытта да жалғасын табады.
Біз әрбір ұстаздың еңбегі мен бастамасын жоғары бағалаймыз. Мектеп ұжымының ауызбіршілігі мен белсенділігі – кез келген игі істің нәтижелі жүзеге асуының кепілі. «Таза Қазақстан» акциясы аясында тал көшеттерін отырғызу жұмыстарына атсалысып, туған жердің көркеюіне өз үлестерін қосқан барша ұстаздарға шынайы ризашылығымды білдіремін.
Бүгін отырғызылған әрбір талдың тамыры тереңге жайылып, мектеп ауласын жасыл желекке бөлесін. Оның саясында ертеңгі ұрпақ білім алып, өсіп-өнсін. Бұл – біздің табиғатқа деген қамқорлығымыз ғана емес, келешек ұрпаққа қалдырар игі аманатымыз.
Таза Қазақстанды қалыптастыру – бір күндік акция емес, әр азаматтың күнделікті өмір салтына айналуы тиіс құндылық. Осы құндылықты жас ұрпақтың бойына сіңіру – мектеп пен ұстаздардың ортақ міндеті.
Мектебіміздің әрбір бастамасы ел игілігіне бағытталып, оқушыларымыздың адал, еңбекқор, жауапты, отансүйгіш және табиғатқа жанашыр азамат болып қалыптасуына қызмет ете берсін!
Асылбек Макашев,
С.Әлжіков атындағы №144 мектеп-лицейінің директоры
