Бүгінде Қызылорда қаласында білім саласының сапасы жоғары деңгейге жеткен. Оған биылғы ҰБТ-дан мектеп бітірушілердің республика бойынша Алматы мен Астана қаласын артқа тастаған көрсеткіші дәлел бола алады. Ал, биылғы қала бойынша білім беру мекемелерінің жаңа оқу жылына дайындығы қалай? Осы жайында қалалық білім бөлімінің ақпараты арқылы білдік.
2026-2027 оқу жылында Қызылорда қаласы бойынша 61 мектепте 1-11 сыныптарда 73729 оқушы білім алуды бастады. Былтырғы жылмен салыстарғанда оқушы саны 4204-ге артқан. Оның 7628-і – 1-сыныпқа қабылданған оқушылар. Былтырмен салыстырғанда мектеп табалдырығын алғаш аттаған бала саны 1034-ке артқан. 2026-2027 оқу жылында қолданыстағы пәндердің үлгілік оқу бағдарламалары жетілдіріліп, жаңа пәндер мен курстар енгізілді. Айтар болсақ, міндетті курстар ішінде 5-7 сынып үшін «Конституция негіздері» курсы — мемлекеттік құрылым, азаматтардың құқықтары мен бостандықтары, конституциялық міндеттері туралы негізгі түсініктерді қалыптастыруға бағытталған. 8-11 сыныптар үшін «Заң мен Тәртіп» курсы – құқықтық сауаттылықты, әлеуметтік жауапкершілікті және заң талаптарын сақтау дағдыларын қалыптастыруға бағытталған. Ал, 5-9, 10-11 сыныптар үшін «Жеке қауіпсіздік» курсы — қоғамдық және цифрлық ортада қауіпсіз мінез-құлық дағдыларын қалыптастыруға, қауіпті және қиын жағдайларды анықтауға және қажетті жағдайда көмекке жүгінуге үйретуге бағытталған.
1-сыныпта бұған дейін «Цифрлық сауаттылық» атауы «Цифрлық сауаттылық және жасанды интеллект», 5-11 сыныптарда информатика пәнінің атауы «Информатика және жасанды интеллект» болып өзгерді. Ал, «Алғашқы әскери және технологиялық дайындық» пәнінің атауы «Бастапқы әскери даярлық» пәні болып өзгерді.
— Жаңа оқу жылына дайындық жұмыстары пысықталды. 2026 жылдың 1 шілдесінен бастап Абай ауылындағы №138 орта мектеп ғимаратына қаржысы 100 млн теңгеге кешенді жөндеу жұмыстары жүргізілді. Жөндеу жұмыстарына: әжетхана, кәріз, жылу, 1,2,3 қабаттардың еденіне кафель төсеу, есік, терезе, спорт зал, акт зал, 1 қабатты толық сырлау, мектеп алдын абаттандыру жұмыстар қаралған. Сонымен қатар, 14 мектепте жөндеу жұмыстары өз деңгейінде жасалды.
Жылу маусымына дайындық барысы да көңіл көншітеді. Білім бөліміне қарасты 61 мектептің 38-сі орталықтандырылған жылу жүйесімен, 8 дизель отын, 13 газ, 2 қатты отынмен жылытылады. Мектепке дейінгі білім беру ұйымдарының 13-і орталықтандырылған, 6 дизель отын, 9 газбен жылытылады. Барлығы 28 мемлекеттік балабақша. Бүгінгі күні жылу маусымына дайындық жұмыстары, яғни батареяларды жуып шаю жұмыстары толық аяқталып дайындық паспортына құжаттары әзірленуде. Мектептер мен балабақшалардағы отын қоры келісім шарт негізінде жасалған, жыл аяғына дейін жеткілікті,- дейді Қызылорда қаласы бойынша білім бөлімінің басшысы Бағдат Бердәулетов.
Білім ошақтарында қауіпсіздік және инфрақұрылым да жолға қойылған. Барлық білім ошақтары сандық бейнебақылау камераларымен жабдықталып, Жедел басқару орталығына тікелей қосылған. Жаңа бағыттар мен әдістер де қолға алынды. Пилоттық режимде Қызылорда қаласының шағын жинақты мектептерінде математика және цифрлық сауаттылық пәндеріне жасанды интеллект элементтері енгізіле бастады.
Қызылорда қаласы бойынша білім бөліміне қарасты орта білім беру ұйымдарында балаларды оқулықтармен қамтамасыз ету толық жүзеге асырылды. Бүгінде мектеп оқушылары 100 пайыз оқулықпен қамтылған. Бұл – әр білім алушының сапалы білім алуына қажетті жағдай жасаудың бірі.
Жаңа оқу жылы қарсаңында дәстүрлі тамыз кеңестері ұйымдастырылып, кадр тапшылығын жою және білім сапасын арттыру мәселелері талқыланды. Қызылорда қаласында педагогтердің өңірлік тамыз конференциясы аясында білім беру жүйесін дамытудың негізгі бағыттары, білім беру мен тәрбие сапасын арттыру, балалардың қауіпсіздігін қамтамасыз ету, ауыл мектептерін дамыту және жасанды интеллектіні білім беру процесіне енгізу мәселелері талқыланды.
Білім беру жүйесінің басты міндеті – әрбір балаға қолжетімді әрі сапалы білім алуды қамтамасыз ету, оның жан-жақты дамуына қажетті мүмкіндіктерге жағдай жасау және заңдылық, адал еңбек пен азаматтық жауапкершілік құндылықтарын қалыптастыру. Осы бағытта Қызылорда қаласының білім беру мекемелерінің дайындығы сақадай сай. Өздеріне бекітілген міндеттерді жүзеге асыруда жауапкершілігі жоғары.
З.Дастанқызы
