М.Мәметова атындағы Қызылорда педагогикалық жоғары колледжінде Білім күніне арналған «Таза Қазақстан: Конституция құндылықтары – экологиялық мәдениет пен жауапкершіліктің негізі» тақырыбындағы салтанатты жиын өтті. Аталған шарада Қызылорда облысы білім басқармасының техникалық және кәсіптік білім беру бөлімінің басшысы Бекжан Есенбаев, ардагер ұстаз, «Ыбырай Алтынсарин» атындағы төсбелгі иегері, Қазақстанның еңбек сіңірген қайраткері Әлима Әбдіхалықова және бірқатар ардагер ұстаздар, әлеуметтік серіктестер мәртебелі меймандар қатарын толықтырды. Сондай-ақ, колледж директоры Жақсыгүл Тоғанова бастаған колледж ұстаздары, студенттер мен ата-аналар қатысты.
Мерекенің басты жиынында ашылу сөзін сөйлеген Бекжан Шакизатұлы барша қауымды білім күнімен құттықтай отырып, ұстаздар ұстаханасының бәсекеге қабілетті, кәсіби құзыретті маман даярлаудағы қалтқысыз қызметін айтып, аймақтық білім беру саласындағы орнын атап көрсетті. Өз кезегінде білім беру саласының ардагері Әлима Жақыпқызы да колледж тарихынан сыр шертіп, оқу орнынан түлеп ұшқан министр, мемлекет және қоғам қайраткерлерін атай келе, білім ұясының маман даярлаудағы өзіндік шеберлігі, айырықша қолтаңбасы жайында сөз қозғады.
Жаңа оқу жылына сәттілік пен жеңіс тілеген колледж басшысы Жақсыгүл Қоханқызы оқу орнының жетістіктері мен биылғы басты жаңалықтарына тоқтала келе биыл оқу орнында жаңа білім беру бағдарламалары іске қосылып, студенттерге тың мүмкіндіктер ашылғанын атап өтті.
— Қазіргі таңда ғасырлық тарихы бар оқу орнымызда 12 мамандық, 19 біліктілік бойынша 1413 студент білім алуда. 2026-2027 оқу жылына 14 топқа 382 студент қабылданып отыр. 2025-2026 оқу жылында 701 түлегіміз қанат қағып, оның 395-і ЖОО түсті. Биылғы жылы оқу орнымызда «Бастауыш білім беру педагогикасы мен әдістемесі қолданбалы бакалавры», «Қазақ тілі мен әдебиетті оқытудың педагогикасы мен әдістемесі қолданбалы бакалавры», «Информатика» қолданбалы бакалавры, «Педагог-ассистент» біліктіліктері ашылып, өз шәкірттеріне есігін ашуда»,- деп жылдың басты жаңалықтарымен бөлісті.
Әсем ән, ырғақты бимен көмкерілген салтанатты жиында әлеуметтік серіктестер және колледж ата-аналары оқу орны басшысы мен ұстаздарына алғысын білдіріп, алдағы оқу жылына толағай табыстар тіледі. Бірқатар колледж ұстаздары мен қызметкерлері Қызылорда облыс әкімінің орынбасарының Алғыс хатымен марапатталды. Шара соңы «Жетістікті ұстаздар шеруімен» және үздік студенттерді таныстырумен жалғасты.
