жас ұрпақтың адами капиталын дамытуға мүмкіндік береді
Жаңа оқу жылы есік қағып тұр. Жылдағы үрдіс бойынша Қызылорда қаласының білім шаңырақтары дайындық жұмыстарын бастап кетті. Қызылорда қаласы бойынша білім бөлімінің ұйымдастыруымен білім беру қызметкерлерінің дәстүрлі тамыз кеңесі аясында «Жаңа халықтық Конституцияның нормалары мен құндылықтары: адам капиталын дамыту – білім беру жүйесінің стратегиялық негізі» тақырыбында пәндік секция отырысы өткізді. Секция отырысы бар пән бойынша қаладағы мектептерде ұйымдастырылды.
Алдымен қалалық жас көшбасшы педагогтер алаңының ашылуы өтті. Іс-шараның басты мақсаты — жас көшбасшы педагогтердің кәсіби және көшбасшылық әлеуетін арттыру, жаңа дәуір талаптарына сай заманауи педагогикалық құндылықтарды қалыптастыру. Конституциялық құндылықтарды құрметтейтін, білімді әрі жауапты жас ұрпақты тәрбиелеудегі педагогтің рөлін айқындау және өңірдің білім беру дамуына үлес қосуға бағыттау.
Жас педагог жаңа дәуірдің жаңашыл ұстазы, білімді ұрпақтың жарқын болашағына жол бастаушысы болғандықтан бас қосу барысында педагогтер өзара тәжірибе алмасып, кәсіби дамуға бағытталған тың идеяларымен бөлісті. Көрме, психологиялық тренинг, мотивациялық кездесу және TEDx форматындағы талқылаулар жас мамандарға жаңа серпін беріп, шығармашылық ізденіске жол ашты.
Тамыз кеңесі аясында Қызылорда қаласындағы №4 ІТ мектеп-лицейінде «Таза Қазақстан» қағидаты — таза сана, тұлғалық жауапкершілік және құндылықтар: психологиялық қолдау» тақырыбында секциялық отырыс өтті. Жиынның негізгі мақсаты – психологиялық-педагогикалық қолдау мен түзете-дамыту көмегінің сапасын арттыру, ерекше білім беруді қажет ететін балаларға тең мүмкіндік қалыптастыру, мамандардың кәсіби тәжірибесін жетілдіру және өзара тәжірибе алмасу.
Психологтер секциясында баланың психологиялық қауіпсіздігі, жеке қауіпсіздік дағдыларын қалыптастыру, кейс жүргізу, суицидалды және аутодеструктивті мінез-құлықтың алдын алу, кеңес беру журналын жүргізу, сондай-ақ жасанды интеллект мүмкіндіктерін кәсіби қызметте тиімді пайдалану мәселелері қарастырылды.
Арнайы мамандар секциясында логопедиялық ойындар мен практикалық жаттығулар, зияты жеңіл деңгейде зақымдалған балалармен нәтижелі жұмыс, ойын технологиялары арқылы сөйлеу және танымдық дағдыларды дамыту, ұлттық құндылықтарды түзете-дамыту жұмыстарына кіріктіру, сондай-ақ алғашқы диагностиканы жүргізуде жасанды интеллект мүмкіндіктерін пайдалану тәжірибелері ұсынылды. Секциялық отырыс барысында мамандар тәжірибе алмасып қана қоймай, әр баланың жеке мүмкіндігін ескеру, ерте анықтау, дер кезінде қолдау көрсету және нақты даму нәтижесіне бағытталған жұмысты күшейту қажеттігін атап өтті.
Екі секцияның ортақ идеясы психологиялық қауіпсіздік пен тең мүмкіндікті қамтамасыз ету арқылы әр баланың әлеуетін ашу. Секция отырысын қорытындылаған Қызылорда қаласы бойынша білім бөлімінің басшысы Бағдат Бердәулетов педагогтер құрамына талдау жасап, ұстаздардың кәсіби шеберлігі мен тәжірибе алмасудың маңыздылығына тоқталды. Жиын барысында баяндама жасап, озық тәжірибесімен бөліскен бірқатар педагог марапатталды.
Келесі отырыс Ә.Құдабаев атындағы №197 орта мектебінде мектепке дейінгі ұйым, бастауыш сынып, көркем еңбек және музыка пәндері бойынша ұйымдастырылды. Секция жұмысы барысында педагогтердің кәсіби ізденісі мен шығармашылық еңбегін танытатын көрме ұйымдастырылды. Көрмеге мұғалімдердің оқу үдерісінде қолданатын әдістемелік әзірлемелері, шығармашылық жұмыстары мен түрлі жобалары қойылды.
Жиын барысында ұстаздар өзара тәжірибе алмасып, сабақ берудің тиімді әдіс-тәсілдерін ортаға салды. Әсіресе, білім алушылардың шығармашылық қабілетін дамыту, заманауи оқыту тәсілдерін тиімді пайдалану және оқу үдерісінің сапасын арттыру мәселелеріне басымдық берілді. Сонымен қатар жаңа оқу жылына дайындық жұмыстары пысықталып, алдағы кезеңнің міндеттері айқындалды. Жиын барысында баяндамалар жасалып, озық тәжірибесімен бөліскен бірқатар педагог марапатталды.
Тамыз кеңесі аясындағы мұндай басқосулар ұстаздардың тәжірибе алмасып, кәсіби біліктілігін арттыруына және жаңа оқу жылына нақты жоспармен қадам басуына мүмкіндік беретін маңызды алаң. Басты мақсат – педагогтің әлеуетін арттыру арқылы білім сапасын одан әрі жетілдіру.
Қазақ тілі, орыс тілі, ағылшын тілі және тарих пәндері бойынша келесі секция отырысы Абай атындағы үш тілде оқытатын дарынды балаларға арналған мамандандырылған сыныптары бар мектепте өтті. «Жаңа халықтық Конституцияның нормалары және құндылықтары: адами капиталды дамыту – білім беру жүйесіндегі стратегиялық негіз» тақырыбындағы жиында білім берудегі конституциялық, ұлттық және жалпыадамзаттық құндылықтарды сабақ мазмұнына енгізу мәселелері талқыланды.
Секция жұмысына Қызылорда қаласы бойынша білім бөлімінің басшысы, әдіскерлер, пән бірлестіктерінің жетекшілері мен мұғалімдер қатысты. Педагогтер тілдік білім мен тарихи мазмұнды сабақтастыра отырып, оқушылардың функционалдық сауаттылығын, сыни ойлауын және азаматтық жауапкершілігін қалыптастырудың тиімді жолдарымен бөлісті. Сондай-ақ, қазақ, орыс және ағылшын тілдерінде еркін пікір білдіру, пікірталас жүргізу, тарихи деректерді талдау, ұлттық құндылықтарды құрметтеу бағытындағы әдістер қарастырылды. Сабақта цифрлық технологиялар мен жасанды интеллект құралдарын академиялық адалдық пен жауапкершілік қағидаларын сақтай отырып пайдалану тәжірибесіне де назар аударылды.
Қаладағы Т.Есетов атындағы №264 мектеп-лицейінде химия, биология және география пәндері бойынша ұйымдастырылған секция жұмыстары өткізілді. Жиын барысында педагогтердің шығармашылық және кәсіби ізденістерін танытатын көрме ұйымдастырылып, мұғалімдер өз тәжірибелерімен бөлісті.
Секция отырыстарында пәндерді оқытудың тиімді әдістері, заманауи білім беру тәсілдері талқыланып, жаңа оқу жылына дайындық жұмыстары пысықталды. Педагогтер өзара тәжірибе алмасып, оқу үдерісінің сапасын арттыруға бағытталған ұсыныстарын ортаға салды.
Жиынды қорытындылаған Қызылорда қаласы бойынша білім бөлімінің басшысы Бағдат Бердәулетов педагогтер құрамына талдау жасап, білім беру саласындағы басым бағыттарға тоқталды. Сонымен қатар секция барысында баяндама жасап, озық тәжірибесімен бөліскен мұғалімдерді марапаттады.
Тамыз кеңесі педагогтердің жаңа оқу жылына кәсіби тұрғыдан дайындалып, тәжірибе алмасуына мүмкіндік беретін маңызды алаң. Мұндай кездесулер білім сапасын арттырумен қатар, мұғалімдердің кәсіби дамуына серпін берері сөзсіз. Және мұндай кәсіби пікір алмасулар мұғалімдердің тәжірибесін жетілдіріп, білім сапасын арттыруға және жас ұрпақтың адами капиталын дамытуға мүмкіндік береді.
З.Дастанқызы
