Бүгінде білім саласы күйіп тұр. Әсіресе, Қызылорда облысы бойынша заң бұзушылықтар көп кездеседі. Қазалыдағы тестілеу айналасындағы заңсыздықтар, Жаңақорғандағы аудандық білім бөлімі лауазымды тұлғаларының миллиондап ақша жымқыруы, тізе берсе, жетіп артылады. Осындай келеңсіздіктер мектептің, ұстаздың абыройына кір жағып болды. Облыс прокуратурасының орта білім беру мекемелеріне жүргізген тексеріс қорытындысы да көңіл көншітпей тұр.
Алғашқы тексеру нәтижелері жаға ұстатады. «Санитарлық-эпидемиологиялық талаптар мен өрт қауіпсіздігін бұзудың 200-ден астам дерегі анықталды. Тіпті кейбір мектептерде бейнебақылаудың «соқыр аймақтары» жойылмаған, жұмыс істемейтін бейнекамералар бар, салдарынан сапалы бақылауға кедергі келтіріп тұр» деген ақпарат таратты облыстық прокуратураның баспасөз қызметі.
Ең сорақысы, информатика сабақтарында оқушылар бақылаусыз қалып, ересектер мен құмар ойындарға арналған сайттарға еркін кіруге мүмкіндік берілген. Басқаша айтқанда, білім шаңырағы «казиноға» айнала жаздаған. Оны айтасыз, өткен жолы аудандық прокуратура білім беру саласындағы заңдылықтың сақталуына талдау жүргізген кезде масқара жағдайды анықтаған болатын. Атап айтқанда, бір ауылдағы орта мектепте сабақ уақыты 9:45 шамасында веб-браузер көмегімен порно сайтты іздеу жүзеге асырылған, ал ауданның басқа мектептерінде заңнамамен тыйым салынған ақпаратқа (порно сайттар, құмар ойындарға арналған сайттар және т.б.) еркін қол жетімділік бар екені белгілі болған. Осыған қарамастан, жалпы білім беру мектептерінің басшылығы «Білім туралы» заңның 43-бабы 3-тармағының 11-3 тармақшасының талабын сақтамай, балалардың денсаулығы мен дамуына зиян келтіретін ақпаратқа қол жеткізуін шектеуге арналған байланыс операторларының қызметтерін қосуды қамтамасыз етпеген. Аудан прокуратурасының ұсынуы бойынша ауданның барлық мектебінің басшылығы Әкімшілік құқық бұзушылық туралы кодекстің 409-бабының 7-2-бөлігі бойынша әкімшілік жауапкершілікке тартылып, 345000 теңге көлемінде айыппұл арқалаған.
Айтатыны жоқ, кей білім ордаларында «жеңгетайлар» жұмысқа тұрып алған. Ол туралы облыстық прокуратураның басқарма бастығының орынбасары Әділжан Сыздықов: «кей мектептердің бірінде бұрын жеңгетайлық үшін қылмыстылық жауаптылыққа тартылған қызметкер жұмысқа қабылданғанын» жария етті.
Тағы бір келеңсіз жайт, облыстағы 26 мектепте мұғалімдерді конкурс өткізбей жұмысқа орналастыру фактілері анықталып, соттылығы бар және медициналық мекемелердің «Д» есебінде тұрғандар жұмысқа орналастырылған. Сонымен қатар, педагогтар жалған дипломмен жұмысқа қабылданғаны белгілі болып, олар бойынша қылмыстық іс тіркеліпті. Басқаша айтқанда, прокуратура тексермегенде білім саласы бетімен кете жаздаған.
Қызылорда облысының прокуратурасы тарапынан мектептерді тексеру жұмыстары жалғасып, тағы да былықтардың бетін аша бермек.
Н.Меңдібай
