Ақ халаттылар антына неге адал болмай тұр?

Қызылорда облысының прокуратура органдары денсаулық сақтау заңнамаларының сақталуына қадағалау жүргізген кезде бірталай заңсыздықтардың бетін ашты. Бұл бағытта 19 (7 аудандық аурухана, 8 қалалық емхана, балалар ауруханасы, психикалық денсаулық орталығы, сәбилер үйі, электронды денсаулық орталығы) тексеру жүргізіп, заңбұзу­шылықтарды жоюға бағытталған 52 қадағалау актісін енгізген.

Нәтижесімен 13 мың адамның құқықтары қорғалған, бұзушылыққа жол берген 242 тұлға тәртіптік және әкімшілік жауаптылықтарға тартылған. Бюджетке 27 млн. теңге өндірілген. Мысалы, Қызылорда қаласының 1300 астам тұрғынын басқа медициналық ұйымға ескертпестен заңсыз бекіту фактілері анықталған. Қабылданған шаралар мен азаматтардың бұзылған құқықтары қалпына келтіріліп, 31 млн. теңге сомасына бюджет қаражатының негізсіз жұмсалуына жол берілмеген. 3 адам тәртіптік жауапқа тартылған. Сонымен бірге, әскери борышын өтеуге кеткен және тұрғылықты мекен жайында тұрмайтын адамдардың алғашқы медициналық көмек үшін төленген 19,6 млн. теңге бюджет қаржысы мемлекетке қайтарылған. Әскери борышын өтеуге жөнелтіліп, тұр­ғылықты мекен жайында болмаған 915 тұлғаға 17 млн. теңге төленгені анықталған.

«Байқоңыр қаласындағы Қазақстан азаматтарының тегін медициналық көмек алу мәселесін көтердік. Байқоңыр қаласы тұрғындарын зейнетақымен қамсыздандыру Ресей Федерациясы заңнамасы бойынша жүргізіледі. Ресей Федерациясымен жасалған келісімге сәйкес Байқоңыр қаласының зейнеткерлері Қазақстан Республикасы Еңбек және халықты әлеуметтік қорғау министрлігінің ақпараттық жүйесінде жоқ. Осыған байланысты Байқоңыр қаласының тұрғындары міндетті әлеуметтік медициналық сақтандыру аясында тегін медициналық көмек алмай келген. Мәселенің шешімін табу үшін «Міндетті медициналық сақтандыру туралы» заңына тиісті толықтыру енгізуді қажет етті. Осы орайда Денсаулық сақтау және Еңбек, халықты әлеуметтік қорғау министрліктеріне заңға өзгеріс енгізу жөнінде қызметтік хат жолданды» дейді Қызылорда облысы прокуратурасының баспасөз хатшысы.

Облыс аумағында денсаулық сақтау саласында тиісті сертификаты жоқ тұлғалар фармацевтикалық қызметпен айналысқан. Мысалы, №3 қалалық емханада маман сертификаты жоқ 2 тұлғаның «ренгтген-зертханашысы» ретінде жұмысқа қабылданғаны белгілі болған. Қызылорда қаласының емханаларында 21 медицина қызметкері сертификатсыз жұмыс жасағаны анықталып, қадағалау актілері енгізілген. Осыдан кейін аталған мамандар тиісті біліктіліктен өтіп, сертификатталған.

Тағы бір дерек, медицина ұйымдарында жүргізілген тексеру қорытындысында облыс бойынша 21 мың науқастың тегін дәрілік заттармен қамтамасыз етілмегені анықталды. Мысалы, Қазалы аудандық ауруханасымен 2942 науқас тегін дәрілік заттармен тек ішінара қамтамасыз етілсе, 400 науқас мүлдем қамтамасыз етілмеген. Одан бөлек қала, аудан аумағындағы медицина ұйымдарында 6 жасқа дейінгі 2 мыңнан астам балаға дәрілік рецептілер негізсіз жазылған. Ал, Сәбилер үйінде балаларға қарсы көрсетілімі бар дәрілік заттар негізсіз сатып алынып, тағайындалған. Прокуратураның ұсынуымен заңбұзушылықтар жойылған.

Ішінара тексерумен облыс бойынша медицина қызметкерлері арнайы киім және басқа да жеке қорғаныш құралдарымен талапқа сәйкес қамтамасыз етілмегені анықталған. Бұндай фактілер тексерумен қамтылған 9 медицина ұйымында орын алған. Қадағалау актісінің қаралуымен қызметкерлерді арнайы киімдермен қамтамасыз етілуде.

Б.Саясат

Пікір үстеу

Э-пошта мекенжайыңыз жарияланбайды. Міндетті өрістер * таңбаланған