Өткен аптада ҚР Денсаулық сақтау министрі Ақмарал Шәрiпбайқызы Әлназарова жұмыс сапарымен Қызылорда облысына келдi. Іссапар барысында алдымен Ақмарал Шәрiпбайқызы облыс әкімінiң орынбасары Данияр Жаналинов және облыстық денсаулық сақтау басқармасының басшысы Олжас Искаковпен бiрге Жаңақорған ауданында ашылатын «Қамқорлық» оңалту орталығының алдағы уақытта атқарылатын жұмыс барысымен, содан соң Жаңақорған аудандық көпбейінді орталық ауруханасының патронаждық қызмет көрсету жүйесімен танысты. Аудандық аурухана бас дәрігерінің ана мен бала денсаулығын қорғау ісі жөніндегі орынбасары Ғалия Туребаева патронаждық қызметтің жетістіктерімен кедергілері, алдағы қойылған мақсаттары бойынша баяндады. Өз кезегінде Денсаулық сақтау министрі Ақмарал Әлназарова ары қарай патронаждық қызметті, сәби өлімінің алдын алу бойынша жұмыстарды одан әрі жақсартуды тапсырып, аудандағы денсаулық сақтау саласының жұмысына оң бағасын бердi.
Сапар барысында Ақмарал Шәрiпбайқызы аудандық емханаға келуші тұрғындармен кездесіп, халық денсаулығын қорғау мақсатында министрлік тарапынан атқарылып жатқан жұмыстар жайлы айтты. 245 төсек орынға арналған Жаңақорған аудандық көпбейінді орталық ауруханасы цифрлы рентген, флюорография, маммография, ультрадыбыстық зерттеу, бронхоскоп, эндоскопиялық жүйе, уретроскоп, цистоуретроскоп, аудиологиялық қондырғы, электро кардиографаппараттары және видеоэндоскопия, стоматологиялық рентгендік жүйесімен қамтылған. Алдағы уақытта Жаңақорған ауданында «Қамқорлық» оңалту орталығы церебральды сал ауруы және тірек-қимыл аппараты аурулары кезінде омыртқамен буындардың жүру және қозғалу дағдыларын қалпына келтіруге, неврологиялық, нейрохирургиялық және кардиохирургиялық науқас балаларға оңалту ем-шаралары жүргізетiнін баяндады.
«Қамқорлық» оңалту орталығы әр баланың ауру ерекшеліктерін ескере отырып, қозғалыс дағдыларын дамытудың заманауи технологияларын қолданатын болады, яғни оңалтудың арнайы техникалық құралдары, тренажерлер, аппараттар мен аппараттық-бағдарламалық кешендер қолданылады. Сонымен қатар 50 төсек орын болып ашылатын «Қамқорлық» оңалту орталығында дефектолог, логопед, психолог, физиотерапевт, эрготерапевт, механотерапия, бальнеотерапия, емдік-профилактикалық, шунгитті, тұзды, сенсорлы және интерактивті бөлме қызмет көрсетпек.
Ақмарал Шәріпбайқызы сапарын Шиелі ауданында жалғастырды. Шиелі аудандық көпбейінді орталық ауруханасының жұмысымен танысты. Бүгінде аудандық көпбейінді орталық ауруханасының халыққа медициналық қызмет көрсету жұмысы жолға қойылған. 294 төсек орынға арналған аудандық орталық аурухана медициналық құрал-жабдықтармен толық қамтамасыз етiлген. Қабылдау бөлімінде сала мамандарымен кездескен министр дәрігерлердің пікіріне құлақ асты. Әрі аудан тұрғындарына аса қажетті құралдар сатып алу жоспарымен танысып, министрлік тарапынан тұрғындар денсаулығын жақсартуға барлық жағдай жасалатынын айтты.
Сапар одан әрі «Ауылдық денсаулық сақтауды жаңғырту» ұлттық жобасы бойынша салынған «Бала би» ауылдық дәрігерлік амбулаториясында жалғасты. Онда жақында пайдалануға берілген жаңа ғимаратты аралап, аймақ дәрігерлерінiң амбулатория жөніндегі анықтамалары тыңдалып, тиісті мамандарға министр тарапынан педиатрия саласын әрi қарай дамыту, әр аймақта патронаж мейірбикелерінің болуын қадағалау тапсырылды. Мұнан соң, министр Талаптан ауылдық округінде жаңадан бой көтерген дәрігерлік амбулаторияға барып, тұрғындармен тілдесті. Сондай-ақ, салада қордаланған мәселелерді атап өтіп, шешу үшін тиісті жұмыстар жүріп жатқандығына тоқталды.
Аудандағы сапар барысында Бала би ауылының тұрғындары денсаулық сақтау министріне ауыл iшiнен барлық медициналық сапалы қызмет көрсету жағдайы жасалған жаңа ғимараттың пайдалануға берілгеніне, сонымен қатар медицина қызметкерліне өз ризашылықтарын жеткiздi. Ауруханада қабылдау, жансақтау, хирургия, травматология, терапия, неврология, кардиология, перзентхана, жүктілік, босандыру, жаңа туылғандар патологиясы, гинекология, реабилитация, жұқпалы аурулар, инсульттік, паллиативтік көмек және психиатриялық бөлiмшелерi жұмыс жасайды.
Сыр өңіріне арнайы жұмыс сапарымен келген ҚР Денсаулық сақтау министрі Ақмарал Әлназаровамен Қызылорда облысы әкімі Нұрлыбек Нәлібаев кездесті. Аймақ басшысы денсаулық сақтау саласының негізгі көрсеткіштері, өзекті мәселелері туралы айтты.
— Мемлекет басшысының, Үкіметтің тапсырмасына сәйкес біз денсаулық сақтау саласының дамуына, медицина ұйымдарының материалдық-техникалық базасының нығаюына, олардың қажетті медициналық құрал-жабдықтармен қамтамасыз етілуіне, тапшы кадрларды даярлауға ерекше көңіл бөліп келеміз. Заманауи жаңа ғимараттарды ел игілігіне табыстап, медицина қызметкерлерінің жылы да жайлы жұмыс орнында халыққа сапалы қызмет етуі үшін барлық жағдай жасалуда. Нәтиже жаман емес. Жалпы өлім-жітім көрсеткіші өткен жылмен салыстырғанда бір деңгейде сақталса, ана өлімі 5,7 есе, сәби өлімі 13,4%-ға төмендеді. 2023 жылдың қорытындысымен 3 негізгі медико-демографиялық көрсеткіштің нысаналы индикаторына қол жетті. Президентіміздің, Үкіметтің Сыр өңірін ерекше қолдауының арқасында аймағымызда нәтижелі жұмыстар жүргізілуде. Өткен жылы республикалық және жергілікті бюджеттен 52,1 млрд. теңге қаралып, 23 медициналық нысан салынды. Оның 17-нің құрылысы аяқталды. Биыл 5,5 млрд. теңге қаржы бөлініп, 5 нысан құрылысы жүргізілуде, оның 2-еуі пайдалануға берілді. Бұдан бөлек, «Ауылдық денсаулық сақтауды жаңғырту» ұлттық жобасы аясында 11 нысан құрылысына сатып алу конкурсы жарияланды. Мердігерлер анықталғаннан кейін тездетіп құрылысты бастаймыз. Нысандар жыл соңына дейін ел игілігіне табысталады, — деді Нұрлыбек Машбекұлы.
Сонымен қатар, облыс әкімі Қызылорда қаласы мен аудандарда салынуы тиіс бірқатар медициналық нысан құрылысына қажетті қаржы бөлу мәселесіне ықпал етуді сұрады. Мәселен, Қызылорда қаласындағы №4 және №5 қалалық емханалардың құрылысы шешімін таппай келеді. Облыстық медициналық жедел жәрдем стансасының бөлімшелеріне модульдік жедел жәрдем станциясын салу қажет.
Ақмарал Шәріпбайқызы Қызылорда облысының медицина саласындағы жетістіктерді атап өтіп, аймақ басшысы көтерген мәселелер зерттеліп, шешу жолдары қарастырылатынын жеткізді.
ҚР Денсаулық сақтау министрі Ақмарал Әлназарова Сыр өңіріне арнайы жұмыс сапарында Өңірлік коммуникациялар қызметінің ақпарат алаңына келіп, БАҚ өкілдеріне баспасөз конференциясын өткізіп, өзекті сауалдарына жауап берді.
— Мемлекет басшысының тапсырмасы аясында ауылдық елді мекендердегі бастапқы медициналық-санитариялық көмектің сапасын арттыру жобасы қолға алынған болатын. Бұдан бөлек, медицина саласында көрсетілетін қызметтер мен Мәмс жүйесін жүйелендіру аясы жүзеге асырылуда. Осыған байланысты біздің министрлік облыстардағы медицина саласының әлеуетін арттыруды және Ұлттық бағдарламалардың тиімділігін жүзеге асыруды оңтайландыруда. Біздің саладағы ең өзекті мәселелердің бірі – медицина саласының мамандарының жетіспеушілігі. Қазіргі таңда Қызылорда облысының өзінде 150-ден астам дәрігер маман жетіспейді. Осыған сәйкес, медициналық оқу орындарының ректорларымен бірлесіп, облыс әкімдігі және облыстық денсаулық сақтау басқармаларының қолдауы арқасында білім алып жатқан студенттердің өңірлерге келіп жұмыс істеуіне мол мүмкіндік сыйлауда. Тағы бір өзекті мәселе – елімізде жүрек-қан тамырлары ауруымен ауыратын азаматтардың көбеюі. Сондықтан да аталған аурудың алдын алу және азаматтарымыздың денсаулығын жақсарту бағытындағы тиісті жұмыстар қолға алынды. Бүгінгі жұмыс сапарының негізгі мақсаты – өңірдегі денсаулық сақтау саласының жұмысымен танысу және осындағы халықпен кездесу. Жалпы соңғы үш жылда денсаулық сақтау саласына қатысты халықтан келіп түсетін арыз-шағымдар еселеп артқан. Осы себепті осы арыз-шағымдарға тиісті сараптама жасалып, себептері анықталды. Нәтижесінде, халықтан келетін арыз-шағымның басым көпшілігі – емханалардың қызметіне қатысты болып отыр. Бұдан бөлек, жолдама алудағы қиындықтар, медициналық көмекпен қамтылудағы тексерістердің ұзақтағы тағы бар. Осы аталған мәселелерді кезең-кезеңімен шешуге жұмыс жасаудамыз. Қазіргі таңда денсаулық сақтау саласындағы бірқатар заңдарға өзгеріс енгізу басталып кетті, — деді ҚР Денсаулық сақтау министрі Ақмарал Шәріпбайқызы.
Сыр өңіріне арнайы жұмыс сапарымен келген ҚР Денсаулық сақтау министрі Ақмарал Әлназарова көпбейінді облыстық аурухана мәжіліс залында аймақ дәрігерлерiмен кездесті.
Министрді медицина саласының үздігі, құрметтi ардагер Тұрғанбай Маханұлы күтіп алып, көпбейінді облыстық аурухананың алдағы мақсаттарымен де таныстырып өтті.
Мәжіліс залында дәрігерлермен болған кездесуге облыс әкімінің бірінші орынбасары Данияр Жаналинов, облыстық денсаулық сақтау басқармасының басшысы Олжас Искаков және барша медицина қызметкерлері қатысты.
Жиында медицинаның әр саласы бойынша баяндамалар жасалды. Өз кезегінде Денсаулық сақтау министрі медициналық қызмет жетістіктеріне ризашылығын білдіріп, мамандардың ұсыныс-тілектерін тыңдады.
Жиын соңында Ақмарал Шәрiпбайқызы сала мамандарына сапалы медициналық қызмет көрсетуді одан әрі арттыруды және профилактикалық егу жұмысын жүйелi жүргiзудi тапсырды.
ҚР Денсаулық сақтау министрі Ақмарал Шәрiпбайқызы одан кейін «Достық үйiнде» өңір халқымен кездестi. Тұрғындармен кездесу шарасын облыс әкімінің орынбасары Данияр Еренғалиұлы жүргізіп отырды. Министр жиналғандарға тың жаңалықтармен бөлісті:
— Халыққа медициналық көмектің сапасы мен қолжетімділігін жақсарту мақсатында министрлік халықтың ұсыныс-пікірлерiне талдау жүргізiп, ұдайы жұмыс жасап келедi. Мәселен, біз қолданыстағы анықтамалардың 27 түрін 2 есеге (10-12 анықтамаға дейін) қысқарту бойынша жұмыстар жүргізіп жатырмыз. Пациенттерге ыңғайлы болу үшін жоспарлы емдеуге жатқызуға арналған талдаулардың тізбесі жалпы жиынтықта 42 зерттеуге қысқартылады және олардың қолданылу мерзімі 6 айға дейін ұлғайтылады. Тегін амбулаториялық дәрі-дәрмектердің тізімдері және оларды алу тетіктері қайта қаралуда.
Денсаулық сақтау министрлігі еліміздің 7 өңірінде (Астана, Алматы, Шымкент, Қызылорда, Ақтөбе, Түркістан және Қарағанды облыстары), оның ішінде Қызылорда облысында жүкті әйелдерге пренаталдық диагностиканың инновациялық әдістерін жүргізуге және патологиясы бар баланың туу қаупін уақтылы анықтауға мүмкіндік беретін «Бір күндік клиника» пилоттық жобасын іске асыруда. 2024 жылы Қызылорда облысы үшін халыққа медициналық көмек көрсетуге 119,7 млрд. теңге бөлінді, бұл 2023 жылдан 9%-ға артық.
Қызылорда облысының халқын дәрі-дәрмекпен қамтамасыз ету шеңберінде 2024 жылға 17,6 млрд. теңге, оның ішінде стационарлық деңгейде 9,6 млрд. теңге, амбулаториялық деңгейде 8 млрд. теңге бөлінді. 2024 жылы медициналық техниканы сатып алуға Қызылорда облысы үшін 8,6 млрд. теңге мөлшерінде қаражат бөлінді.
Халыққа медициналық көмектің қолжетімділігін қамтамасыз ету үшін денсаулық сақтау жүйесінің инфрақұрылымын дамыту бойынша жұмыс жүргізілуде. Сонымен қатар, «Ауылдық денсаулық сақтауды жаңғырту» ұлттық жобасын іске асыру шеңберінде сіздердің өңірлеріңізде ауылдағы 27 медициналық-санитариялық алғашқы көмек нысанын салу жоспарлануда – бұл медициналық және фельдшерлік-акушерлік пункттер, сондай-ақ ауыл тұрғындары үшін дәрігерлік амбулаториялар. Бұдан басқа, ұлттық жобада күрделі жөндеу жүргізу және медициналық жабдықтармен жарақтандыру арқылы Шиелі, Қазалы, Жаңақорған және Арал аудандық ауруханаларын жаңғырту көзделеді.
Құрметті кездесуге қатысушылар, медициналық көмектің сапасы мен қолжетімділігін жақсарту жөніндегі іс-шаралар белгілі бір уақыт пен ресурстарды талап етеді. Бірақ мен Денсаулық сақтау министрлігі халықтың күтуіне сәйкес келетін пациентке бағдарланған денсаулық сақтау жүйесін қалыптастыруға бағытталған өз міндеттемелерін іске асыру бойынша тұрақты және дәйекті жұмыс жүргізетініне сендіремін,- дедi.
Одан соң аймақтың бас дәрігері Олжас Ермекұлы өңiрдегi медицина саласында атқарылып жатқан жұмыстарды баяндады. Өз кезегінде министр аймақтағы денсаулық сақтау саласындағы атқарылған жұмыстарды оң бағалап, сала жұмысын одан әрі дамытуға тапсырмасын бердi. Сондай-ақ, жиын барысында тұрғындар медициналық кеңес пен медициналық көмектің қолжетімділігі, тегін дәрі-дәрмекпен қамтамасыз ету, медициналық кадрларды даярлау туралы және тағы да басқа сұрақтарына жауап алды.
Денсаулық сақтау министрінiң жұмыс сапары одан әрі тұрғындардың жеке сұрақтарымен қабылдауға жалғасты. Министрдің қабылдауында болған тұрғындар сұрақтарына тұшымды жауап алып, өз ризашылықтарын білдірді.
Е.Ерболұлы
