ҚР Премьер-министрі Олжас Бектеновтің төрағалығымен өткен Үкімет отырысында газ саласын дамыту мәселелері талқыланды. Энергетика министрі Алмасадам Сәтқалиев қазіргі жағдай мен биылға арналған болжамды жоспар туралы баяндады. Жиында сұйытылған газдың басқа облыстарға кетпеуін қадағалау, газ құю станцияларының тиісті заңнама талаптарын сақтауына мониторинг жүргізу қажеттігі ескертілді.
Сонымен бірге елді мекендерді газдандыру жайы қаралды. Облыстық энергетика және тұрғын үй-коммуналдық шаруашылық басқармасы газдандыру жобаларын бақылауға алып, жұмыстың мерзімінде және сапалы жүргізілуін қамтамасыз етуі тиіс.
Өткен жылдың қорытындысына қарасақ, тұрғындарды табиғи газбен қамту үлесі 75 пайыз болған, 12 елді мекен табиғи газға қосылған. Осылайша газдандырылған ауылдар саны 35-ке жетті. Биыл республикалық бюджеттен 20 жобаға 5,9 млрд. теңге берілді. Бұдан бөлек, «Самрұқ-Қазына» акционерлік қоғамы 16 газдандыру жобасын қаржыландыруға 24 млрд. теңге бөлді. Жыл соңына дейін 11 ауылдық елді мекен табиғи газға қосылып, көгілдір отынмен қамту деңгейін 78 пайызға, газдандырылған елді мекен санын 46-ға жеткізу жоспарға алынды.
Мемлекет басшысының тапсырмасына сәйкес, Үкіметтің қолдауымен, облыс әкімінің үйлестіруімен Қызылорда қаласында және оған қарасты әрбір елді мекенде халықтың өмір сүру сапасын жақсартуға бағытталған жұмыстар жемісін беруде. Соның бір дәлелі – қалаға іргелес жатқан Сабалақ саяжайына табиғи газ жеткізу жобасы.
Аймақ басшысының тапсырмасымен қала әкімі Серік Қожаниязов саяжай тұрғындарымен кездесіп, ел игілігіне арналған жобаны жүзеге асыру кезендерімен таныстырып, сұрақтарға жауап берді. Саяжай тұрғындары көптен бері қозғалып жүрген мәселені жүзеге асыруда халықпен бірге болған қала әкіміне ризашылықтарын білдірді.
Қазір бас мердігер АЕS end limited компаниясы арнайы техникалар мен мамандары жұмысты бастап кетті. Игілікті іс бекітілген мерзімде аяқталады. Қала әкімі мердігер мекеме басшылығына жұмысты сапалы орындауды қатаң тапсырды.
Бүгінде Сабалақта 4500-ден астам халық тұрады. 2 балабақша, мектеп, дәріхана, көлік жөндеу шеберханасы, автокөлік жуу, 10 азық-түлік дүкені, 2 жанармай құю бекеті, 2 демалыс орны, 2 монша жұмыс жасауда. Сонымен қатар, «Бегім-ай» өнер орталығы, №4 қалалық емхананың филиалы, 150 орындық қосымша білім беру орталығы іске қосылған.
Саяжайдың инфрақұрылымын дамыту мәселелері кезең-кезеңімен өз шешімін табуда. Биыл қала бюджеті есебінен ұзындығы 9,8 шақырымды құрайтын 15 көшеге жарық шамдар орнатылды. Күнделікті жолаушыларға жайлы жаңа қоғамдық көліктер қатынауда. Ендігі мәселе, табиғи газ жеткізу жобасы жүзеге асса, тұрғындар қолайлы өмір сүріп, жергілікті билікке алғыстарын жаудырмақ.
Е.Ерболұлы
