Бүгін Қызылорда өңірінің тұрғындары үшін әдеттегі жексенбі емес. Аймақ халқы ел үшін маңызы бар республикалық референдумда өз таңдауларын жасап, азаматтық белсенділік танытуда.
Облыстағы 380 референдум учаскесінде тізімге сай тіркелген азаматтар бюллетень алып, дауыс беруде. Олардың қатарында 18 жасқа толып, тұңғыш рет науқанға жастар да бар.
Олар бірінші рет бюллетень алып, өз таңдауларын жасап көрді.
Қаладағы №264 мектеп-лицейінде екі референдум учаскесі бар. Соның бірі – №264 референдум учаскесі.
Учаске төрағасы Бек Тумурзаевтың айтуынша, учаске таңертеңгі сағат 7.00-де жұмысын бастаған. Мұнда жалпы 2045 дауыс беруші тіркелген. Түске дейін шамамен 475 адам өз таңдауын жасап үлгерген. 1 адам үйден дауыс берген. Жақында ғана 18-ге толған Нұрасыл Балтабай референдумға қатысып, алғаш рет азаматтық таңдауын жасады. Оған сыйлық табысталды.
— Дауыс беруді үлкен жауапкершілік деп қараймын. Еліміздің өркендеуі, мемлекет үшін маңызды істерді жастар бізден бірінші жүруіміз керек. Бір топ жастар болып өз таңдауымызды жасауға келдік,- дейді жас тұрғын.
Еске салайық, референдум күні облыс бойынша 492380 азамат дауыс беруге құқылы. Өңірде азаматтардың учаскесін анықтауға арналған 179 онлайн сервис жұмыс істейді. Сондай-ақ, азаматтарды уақытша тіркеу қызметімен айналысатын 5 онлайн учаске бар.
Облыста 380 референдум учаскесі жұмыс істейді. Мұнда 2652 комиссия мүшелері қызмет атқарады.
