Арал ауданы, Бөген ауылындағы №20 З.Шүкіров атындағы орта мектебі қабырғасында қазақтың сыршыл ақыны Зейнолла Шүкіровтің туғанына 99 жыл толуына орай ерекше мазмұнды, тағылымы терең апталық ұйымдастырылды. Мектеп ауласындағы ақын ескерткішіне гүл шоқтары қойылып, шәкірт жүрегінен шыққан жыр жолдары көкке қалықтады. Оқушылар ақын өлеңдерін жатқа оқып, оның өр рухты, сырлы жырларымен қайта табысты. Әр шумақтан туған елге деген сүйіспеншілік пен өмірге құштарлықтың лебі сезілді. Сыныптарда өткен таным сағаттары да мазмұнға толы болды. Ұстаздар ақынның өнегелі өмір жолын, қайсар мінезін, шығармашылық мұрасын кеңінен насихаттап, оқушыларды рухани байлыққа жетеледі. З.Шүкіровтің өмірі мен шығармашылығына арналған мұражайға саяхат жасаған шәкірттер құнды жәдігерлермен танысып, ақын әлеміне терең бойлады.
Жыл сайын ақынның туған күні қарсаңында мектептің үздік оқушыларына «Зейнолла партасына» отыру құрметі көрсетіледі. Бұл – білім мен еңбектің, талап пен табандылықтың айқын белгісі. Партасына отырған жас дарындар З.Шүкіров өлеңдерін тебірене оқып, қаламгерге деген шынайы құрметтері мен сүйіспеншіліктерін білдіреді. Сонымен қатар, ақынның сүйіп ойнаған ойыны – дойбыдан мектепішілік жарыс ұйымдастырылып, жас зияткерлер өзара бақ сынасты. Бұл сайыс оқушыларды ой ұшқырлығына, сабыр мен зеректікке баулып, рухани апталықтың мәнін одан әрі айшықтай түсті. Апталық аясында ұйымдастырылған мазмұнды шаралар – жыр сағаттары, көрмелер мен зияткерлік сайыстар оқушылардың ақын мұрасына деген қызығушылығын арттырып, рухани серпіліс сыйлады. Ал апталық соңы «Шабыттана шалқыған теңіз-ғұмыр» атты әдеби-сазды кешпен қорытындыланды. Кеш барысында ақын жырлары тебірене оқылып, ән мен би әуелеп, сахналық қойылымдар арқылы ақынның қайсар өмір жолы көркем бейнеленді. Мектептің 9-сынып оқушысы Мақсат Асанов Зейнолла Шүкіровтің бала кезін сахнада шебер сомдады. Тағылымды шаралар легі шәкірттерге рух беріп, ұлттық құндылықтарды қастерлеуге үндеді.
Алдымызда қазақтың қайсар рухты перзенті, сыршыл ақын Зейнолла Шүкіров атамыздың 100 жылдық мерейтойы келе жатыр. Бұл – тек бір мектептің ғана емес, бүкіл ел руханияты үшін айрықша мәні бар тарихи белес. №20 З.Шүкіров атындағы орта мектебі директоры М.Андызбаев өз сөзінде ақын есімін иеленген білім ордасының ұжымы бұл мерейтойды үлкен жауапкершілікпен, тың бастамалармен және тағылымды іс-шаралармен атап өтуі тиіс екенін ерекше атап өтті.
Шынында да, тағдырдың талай сынына мойымай, қайсарлық пен жігердің үлгісін көрсеткен қаламгердің өз еліміздің перзенті болғанын мақтан ету – әрқайсымыз үшін зор мәртебе. Алайда, мақтанышпен ғана шектелу жеткіліксіз. Біз ақын аманатына адал болып, оның биік рухын білімімізбен, ізденісімізбен, жетістіктерімізбен жалғастыруымыз керек. Ұстаздар мен шәкірттер қауымы алдағы мерейтойды мазмұнды жобалармен, жыр мүшәйраларымен, рухани кездесулермен айшықтауды жоспарлап отыр. Бұл – ақын мұрасын терең тануға, жас ұрпақтың бойына отансүйгіштік пен табандылық қасиеттерін сіңіруге бағытталған үлкен қадам. Зейнолла Шүкіровтің ғұмыры – ерік-жігердің, еңбек пен үміттің символы. Ендеше, оның 100 жылдық мерейтойы біз үшін өткенді еске алып қана қоймай, болашаққа нық қадам жасауға серпін беретін рухани мереке болмақ.
Ш.Батаманова,
№20 З.Шүкіров атындағы орта мектебінің тәрбие ісі жөніндегі орынбасары.
Бөген ауылы.
