С.Лапин атындағы №261 орта мектебінде «Өнегелі өмір – өскелең ұрпаққа үлгі» тақырыбында сұхбат кеші өтті. Кешті қазақ тілі пәні мұғалімі Бақберген Әбілқасым жүргізді. Ол кездесудің басында «Бүгін қонақтарымызды бейресми жағдайда, өзге қырынан, бұрын-соңды айтылмаған, көпшілік біле бермейтін тұсынан танитын боламыз. Келген қонақтарымыздың өмірдегі шынайы образын оқушыларымыз өздерінің көкейінде жүрген түрлі сауалдарымен ашады. Оқушыларымыздың сұранысы бойынша бүгінгі кездесу кешіміздің сыйлы қонағы өзіңізсіздер. Олай болатын болса, сөз кезегі оқушыларымызда» деп сұхбатты бастап кетті.
Оқушылармен сұхбатқа республикалық «Ұстаз мәртебесі» газетінің бас редакторы, Болашақ университетінің аға оқытушысы, филология ғылымдарының кандидаты Нұрлан Көбегенұлы, Қызылорда облыстық жұмылдыру дайындығы және шұғыл жұмыстар орталығы басшысының орынбасары Бауыржан Садықов, Қызылорда қалалық жастар ресурстық орталығының директоры Медет Жорабек және С.Лапин атындағы №261 орта мектеп директоры Ғабидулла Шарапатов қатысты.
Оқушылар тарапынан «Жақсы тұлғаға айналу үшін адам бойында қандай қасиеттер басымырақ болуы керек?», «Сіз үшін өзіңіздің ең жақсы қандай қасиеттеріңізді мақтан тұтасыз?», «Біз сияқты соңыңыздан ерген ізбасар ұрпақтарыңызға сіз сияқты жоғары белестерге жету үшін қандай ақыл-кеңес берер едіңіз?», «Сіз бала кезіңізде нені армандадыңыз және қазіргі уақытта сол арманыңыз орындалды ма?» деген сұрақтар қойылып, қонақтардың жауабы тыңдалды. Одан кейін «Өз ісінің нағыз маманы атану көп адамға бұйыра бермейтін бақыт. Өзіңіздің мамандығыңыз, жұмысыңыз туралы, ұнайтын, ұнамайтыны тұстарымен бөліссеңіз», «Қазіргі өмірді жаңадан бастау мүмкіндігі туса, оны өзгертер ме едіңіз?», «Өмірде неден жеңілдіңіз? Сіз үшін нені жеңу қиын болды?», «Сіз үшін өзіңіздің ең жақсы қандай қасиеттеріңізді мақтан тұтасыз?», «Адамгершілік қасиеттерді адам бойына сіңіру үшін басты назарда нені ұстау қажет?» деген секілді сұрақтар арқылы оқушылар адамның ішкі сырын тыңдауға құштар болды.
Сұхбат барысында қонақтар өмірлік ұстанымдары, еңбек тәжірибесі, жетістікке жету құпиялары, жастарға берер ақыл-кеңестері жайында ашық пікір бөлісті. Оқушылар көкейлерінде жүрген сан түрлі сауалдарын қойып, еркін форматта ой алмасты. Әсіресе, қонақтардың шынайы әңгімелері, өмірлік ұстанымдары мен адамгершілік құндылықтар туралы ойлары жас буынға үлкен әсер қалдырды.
Сұхбат арасында мектептің өнерлі жастары әннен шашу шашып, тебірене өлең оқып берді. Әсем әуен жүректі тербетіп, көңілді сергітті. Оқушылар шырқаған «Бір жұлдыз», «Мен қазақтың баласы» әндері кештің шырайын ашып, ерекше жылу сыйлады.
«Бір сағат уақыттың өзінде рухани демалып, бүгінгі кездесуден үлкен әсер алдық деп ойлаймын. «Арыстандай айбатты, жолбарыстай қайратты мен жастарға сенемін» деп, Мағжан Жұмабаев айтқандай, егеменді еліміздің көк байрағын биік ұстайтын, еліміздің өсіп-өркендеуі, гүлденуіне зор үлесімізді қосып, терең білім алып, өмірден өз орнымызды табуға атсалысамыз. Үлкен сеніммен атқарған, атқарар істеріңізге сәттілік болсын»,- деп мектеп ұжымы атынан Бақберген Әбілқасым жүрекжарды тілегін арнады.
Бұл кездесуді жай ғана басқосу емес, буындар сабақтастығын жалғаған, тәжірибе мен үміт тоғысқан тағылымды кеш десе де болады. Өнегелі жандардың өмір жолы – бүгінгі жастарға бағыт, ертеңгі болашаққа сенім.
З.Ахмет
