Қазақ баспасөзі тарихына көз салсақ, 2011 жылы 18 наурызда Қызылорда қаласында жаңа бағытта республикалық қоғамдық-әлеуметтік, ғылыми-көпшілік «Ұстаз мәртебесі» газеті жарық көріп, оқырманына жол тартқан болатын. Осы уақыттан бері басылымның 591 нөмірі жарық көріп, сан салалы тақырыпта, әр түрлі жанрда материалдар жазылып, журналистикада із қалдырды. Биыл атаулы жыл. Газеттің жарық көргеніне 15 жылдығына орай Ә.Тәжібаев атындағы облыстық әмбебап ғылыми кітапханасының ұйымдастыруымен «Ұстаз мәртебесі: уақыт пен ұлағат шежіресі» тақырыбында мерекелік кеш өтті. Мерекелік шараға облыстың зиялы қауым өкілдері, шығармашыл топ жетекшілері, бұқаралық ақпарат құралдарының өкілдері, оқу орындарының басшылары мен педагогтер, ғалымдар және студенттер қатысты.
Кеш жақында ғана эфирге шыққан Қызылорда телеарнасының «Параллель» бағдарламасына басылымның бас редакторы Нұрлан Көбегенұлының өз шығармашылығына байланысты айтқан әңгімесінен басталды. Журналистік жолдың қыр-сыры мен жауапкершілігінің салмақтылығына тоқталған ол газеттің жарық көргеннен бергі тарихын шолып өтті.
Кеш барысында облыстық қоғамдық даму басқармасының БАҚ және интернет ресурстарымен жұмыс бөлімінің басшысы Руслан Жұмабекұлы сөз сөйлеп, Қызылорда облысы әкімінің құттықтауын табыс етті.
«Он бес ішінде басылым ұжымы мазмұнды еңбек пен табанды ізденістің арқасында үлкен белестерді бағындырды. Алдағы уақытта да «Ұстаз мәртебесі» газеті білім мен ғылымның, ағартушылық пен парасаттың жаршысы болып, ұлттық құндылықтарды дәріптеп, қоғам дамуына қызмет ете береді деп сенемін. Мерейтой қарсаңында Сіздерге шығармашылық табыс, толағай жетістіктер тілеймін! Ел иігілігі жолындағы еңбектеріңіз жемісті болып, басылымның ғұмыры ұзақ, абыройы асқақ болсын!» деп тілектестігін білдіріпті облыс әкімі Н.Нәлібаев.
Ал, қалалық қоғамдық даму бөлімінің маманы Әсем Берікқызы жылы лебізін білдіріп, Қызылорда қаласы әкімінің құттықтауын табыстады.
«Ақпарат айдынында «Ұстаз мәртебесі» газетінің алар орны ерекше. Өйткені тағылымы мол ұстахана талғамы зор оқырманға таңдаулы тақырыптар, құнды мақалалар ұсынып, басылым беделін биіктетті. Білім мен ғылымның байлығын, жаңашыл жаңалықтарын жазып, болашаққа мұрағат қаттады. Қалың оқырманы бар қаламыздың бірегей басылымы – «Ұстаз мәртебесі» газетінің 15 жылдық төл мерекесі құтты болсын. Шығармашылық ұжым толымды табыстарға жете берсін!» деп, шынайы тілегін арнапты қала әкімі Н.Ахатов.
Сонымен қатар, облыстық мәдениет, архивтер және құжаттама басқармасы басшысының орынбасары Қуаныш Қуантқанұлы мен облыстық білім басқармасының бөлім басшысы Бекжан Шахизатұлы газеттің мерейлі күніне байланысты тілектерін айтып, басқарма басшыларының құттықтауын жеткізді.
«Білім мен тәрбие саласының тыныс-тіршілігін айшықтап, ұстаз еңбегінің қадір-қасиетін насихаттап келе жатқан басылымның өңіріміздің рухани өмірінде алар орны ерекше. Осы жылдар ішінде «Ұстаз мәртебесі» газеті педагогтердің кәсіби тәжірибесін бөлісетін, білім саласындағы өзекті мәселелерді көтеретін, жаңашыл бастамаларды насихаттайтын ақпарат алаңына айналды. Басылым беттерінде мұғалім мәртебесін арттыру, білім сапасын жақсарту, жас ұрпаққа сапалы тәрбие беру бағытындағы маңызды ой-пікірлер мен тәжірибелер тұрақты жарияланып келеді. Бұл – ұлт болашағын тәрбиелеу жолындағы ұстаз қауымының еңбегін елге танытып, қоғам мен білім саласының арасындағы байланысты нығайтуға қосылған зор үлес. Газет ұжымының қажырлы еңбегі, кәсіби шеберлігі мен шығармашылық ізденісі арқасында басылым оқырман сеніміне ие болып, педагог қауымының сенімді серігіне айналды. «Ұстаз мәртебесі» газетінің ұжымына шығармашылық табыс, тың идеялар мен толағай жетістіктер тілеймін. Басылымның ғұмыры ұзақ болып, білім мен ағарту саласына қызметі жалғаса берсін!» деп, білім басқармасының басшысы А.Есжанов ізгі тілегін жеткізіпті.
Мерекелік кеште Астана қаласынан Ы.Алтынсарин атындағы Ұлттық білім академиясы атынан да құттықтау келді. Құттықтауда газеттің 15 жылда атқарған жұмысын баяндай келе, «Соның айқын дәлелі – 2024 жылдан бері Қазақстан Республикасы Оқу-ағарту министрлігінің бұйрығымен үздік педагогикалық тәжірибені жариялайтын басылымдар тізіміне енгізілуі. Алдағы уақытта да «Ұстаз мәртебесі» газеті білім мен ғылым саласының өркендеуіне, педагогтердің кәсіби қауымдастығын нығайтуға, жас ұрпақтың сапалы білім мен саналы тәрбие алуына қызмет ете беретініне сенім мол. Осы мерейлі күні газет ұжымына шығармашылық табыс, толағай жетістіктер және жаңа белестер тілеймін. Қаламдарыңыз мұқалмасын, еңбектеріңіз еленіп, басылымның ғұмыры ұзақ, абыройы асқақ болсын, оқырманы көп болсын!» деп академия президенті З.Төребекова ақжарма тілегін арнапты.
— Басылым 15 жылдың ішінде бірнеше жобаларды жүзеге асырды. Алғашқы жобасы – «Аламан» спорт бәйгесі. Жас ұрпақты спортқа баулу, саламатты өмір салтын насихаттауды басылым назарынан тыс қалдырған емес. Бұдан соң ғылыми бағытта «Үздік жас ғалым» байқауы ұйымдастырылды. Редакция жас ғалымдарға үздік мақалалар жинағын шығарып берді. Ал, «Зерде» интеллектуалды сайысы газеттің 5 жылдығына орай ұйымдастырылды. Сайыс облыс бойынша БАҚ арасында бірінші рет онлайн өтуімен есте қалды. Ал, газеттің онжылдығына орай редакция ұстаздар арасында конкурс ұйымдастырып, әр ай сайын үздіктерді анықтап, марапаттау шарасын жасады.
«Ұстаз мәртебесі» газетінің «Кәусар-шабыт» жобасы шығармашыл жастардың шабытын шыңдауға арналған. Қала мектептері арасында шығармашылықпен айналысып жүрген оқушылардың арасына барып, ұстаздармен бірге таланттарды табуға жұмыстар жүргізді. Тарихи тұлғалар мен қоғам қайраткерлерін ұлықтауға бірнеше кештердің ұйытқысы болды. Биылғы 15 жылдыққа орай газет редакциясы «Үздік мақала» конкурсын жариялады. Байқауды «Өрлеу» біліктілікті арттыру Ұлттық орталығы» АҚ филиалы Қызылорда облысы бойынша Кәсіби даму институтымен бірлесіп өткізгелі отыр,- деді газеттің бас редакторы.
Кешке арнайы келген институт директоры Қызжібек Сатыбалдықызы газеттің бас редакторы мен газет ұжымына шығармашылық табыс тіледі.
Нұрлан Көбегенұлы Қорқыт ата атындағы Қызылорда университетін үздік бітіріп, табан аудармай журналистика саласында қызмет етіп келеді. «Ұстаз мәртебесі» газетін басқарумен бірге өзі де ұстаздық қызмет атқарып, «Болашақ» университетінде жас журналистерге дәріс береді. Кешке қос университеттен қонақтар келіп, жүрекжарды тілегін айтты. Болашақ университі атынан құттықтаған университеттің аға оқытушысы, белгілі жыршы Берік Саймағанбетов университеттің аға оқытушысы, филология ғылымдарының кандидаты Нұрлан Көбегенұлының иығына ұлттық нақышта өрнектелген шапан шауып, құрмет көрсетті. Ал, Қорқыт ата университінің қазақ тілі мен әдебиеті және журналистика кафедрасының аға оқытушылары Асыл Оразова мен Аякөз Әбдразақова қоғамдағы баспасөздің ролін және «Ұстаз мәртебесі» газетінің он бес жылдық белесіне шолу жасап, өз құттықтауларын жеткізді.
Мерекелік кешке редакциямен етене байланысып, тұрақты оқырманға айналған М.Мәметова атындағы Қызылорда педагогикалық жоғары колледжінің оқытушылары мен студенттері де келіп, тағылымды шараның куәсі болды. Колледж оқытушысы Бақытжан Ахунов сөз сөйлеп, газеттің ерекшеліктерін атап, алдағы күндерге табыс тіледі.
«Газет беттерінде колледж оқытушыларының және студенттерінің мақалалары мен авторлық өлең туындылары үнемі жарық көруде. Редакция тарапынан ұйымдастырылған жас журналистер байқауларында, жас ақындар мүшәйраларында, көркемсөз оқу сайыстарында, колледжіміздің студенттері мен оқытушылары бірнеше мәрте жүлделі орындарға ие болды. Білімнің қара шаңырағы мен газет ұжымы арасындағы шығармашылық байланыс алдағы уақытта да нығая береді деп сенемін» деп, колледж директоры Жақсыгүл Тоғанова тілектестігін жолдапты.
Бұл күні ақпарат құралдары басшылары да келіп, газеттің бас редакторын құттықтады. «Сыр медиа» ЖШС директоры Марат Аралбаев, «Qyzylorda» телеарнасының директоры Нұрбек Әмиша, сонымен бірге Қазақстан Жазушылар одағының Қызылорда облысы бойынша өкілі Қаршыға Есімсейітова газеттің медиа кеңістігіндегі орнына тоқталды. Ал, редакциямен серіктес мекеме, газетті оқырманына жеткізуші «Қазпошта» АҚ басшысының орынбасары Рауан Қожамұратов газеттің шығармашылық ұжымына сый-сияпат жасады. Сонымен бірге «Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалы қызметкерлері «Ұстаз мәртебесі» газетінің мерейлі жасына арнайы келіп, филиал директоры Аида Әбибуллаеваның құттықтауын жеткізді. Сондай-ақ, №285 мамандандырылған мектеп-лицей-интернат директоры Балзия Абдуллаеваның тілегі де кеште айтылды.
Газетке тілекші жандардың көптігі қуантады. Солардың қатарында басылымның тұрақты оқырманы әрі авторы, ҚР Журналистер Одағының мүшесі Бауыржан Елеусіновті айтуға болады.
«Ұстаз мәртебесі» газетінің беттерінде республика аймағындағы педагогтерге қатысты маңызды мәселелер ұдайы талқыланып, білім беру деңгейінің әрбір сатысына қатысты өзекті мақалалар жарық көруде. Қарапайым мектеп мұғалімінің немесе балабақша тәрбиешісінің үні де газет бетінен орын алып, қалың бұқараның ой-тілегі де ескерілуде. Сонымен қатар, газет қалың оқырманды ауыл мектептерінің жай-күйі, тыныс-тіршілігімен де тұрақты түрде хабардар етіп отырады. Білім саласында ұзақ жылдар бойына табысты еңбек еткен ұлағатты ұстаздардың өнегелі өмір жолдары да кейінгі ұрпаққа үлгі ретінде кеңінен насихатталуда. Газеттің шығармашылық ұжымы кәсіби біліктіліктің, Отаншылдық пен жауапкершіліктің озық үлгісін көрсетіп келеді. Газет алдағы уақытта да елдің бірлігін нығайтуға атсалысып, Әділетті Қазақстанды құру ісіне елеулі үлес қоса береді деп сенемін», — дейді Б.Тәжмағанбетұлы.
Ал, Kyzylorda-news.kz ақпараттық агенттіктің бас редакторыАйжан Жұмабекқызы:«Ағартушылық ақпараттық бағытты ұстанған қазақ мерзімді басылымдарының пайда көруден бұрын елге, оқырманға пайдалы болсам дейтін бір асыл мұратын және сол мақсатты жолында табандылықтан таймайтын еңбексүйгіш болмысын осы «Ұстаз мәртебесінің» ұдайы, тұрақты түрде шығып отыруынан көреміз. Осы жолдың баянды да берекелі жалғастығын және оқырманның зор сүйіспеншілігін тілейміз.
«Мектептің жаны – мұғалім. Мұғалім қандай болса, мектеп сондай болмақшы. Яғни, мұғалім білімді болса, ол мектептен балалар көбірек білім алып шықпақшы. Солай болған соң, ең әуелі мектепке керегі – білімді, педагогика, методикадан хабардар, жақсы оқыта білетін мұғалім» деген ұлт ұстазы Ахмет Байтұрсынұлының ұлағатын әрбір мұғалімнің жүрегіне жеткізуге ұмтылған «Ұстаз мәртебесі», әрқашан мерейің үстем болсын!» — дейді.
Газетті сөз еткенде көбісі басылымнан түлеп ұшқан түлектерді айтпай өтпейді. Себебі ақпарат құралдарында, баспасөз қызметтерінде көзге көрініп, биіктен көрініп жүрген журналистердің «Ұстаз мәртебесі» газетінің тілшілері болғаны мақтанышпен айтылады.
«Ұстаз мәртебесі» газеті тек редакция ғана емес, жас тілшілерді қалыптастырудың шеберханасы десек артық айтқандық емес. Студент кезінен еркін араласатын өндірістік-тәжірибелік орта, жастардың алғашқы жұмыс орны, ыстық ұясы ретінде бәрімізге белгілі. Бұл – өз кезегінде ұжымның өз ісін ұтымды ұйымдастыра білгенінің арқасы» дейді «Сыр медиа» ЖШС директоры М.Аралбаев.
Расында, 15 жыл көлемінде шағын редакциядан тәрбиеленіп шығып, биікке самғаған жалынды журналистер жетерлік. «Qazaqstan» ұлттық арнасының Қызылорда облысы бойынша меншікті тілшісі Әділбек Жақанов, «Ақмешіт жастары» газетінің бас редакторы Дәулет Қырдан, «Qyzylorda» телеарнасының редакторлары Асқар Тәжиев, Әйгерім Нажмадин, Елдос Асан, Қызылорда облысының аумақтық сайлау комиссиясының мүшесі Абай Тағыберген, «AMANAT» партиясы Маңғыстау облыстық филиалы баспасөз қызметінің консультанты Жұлдызай Қалиева, Арал аудандық «Толқын» газетінің бас редакторы Айдар Сайлауов, «AMANAT» партиясы жанындағы «Жастар Рухы» Жастар қанаты Қызылорда облыстық филиалы төрағасының орынбасары Абзал Жолтерек, «Сыр Медиа» ЖШС-нің SMM-редакторы Айдос Мырзалы, «24 KZ» телеарнасының тілшісі Шернияз Жалғасбекұлы өз ісінің білгір мамандарына айналған.
Расында, басылым ұстаз қауымының үніне, қоғамның жаршысына айналып қана қоймай, талай жас маманның тәжірибе жинақтаған мектебі болды. Осы басылымда еңбек етіп, кәсіби шыңдалу жолынан өткен шәкірттер де мерейтойдың құрметті қонақтары ретінде келіп, тілектерін арнады. Кеште ардагер ұстаз, газет оқырманы, ақтөбелік Өтебай Серәлінің басылым түлектері туралы өлеңмен жазған лебізі көпшілікке әсер қалдырды.
Ұстаздар аласармас биіктілік,
Бойына асыл мінез жиып тұнық.
Мұғалімге мәңгілік құрмет көрсет,
Басыңды әрқашанда иіп тұрып.
Шәкірттер түлеп ұшқан шыңың дер ем,
Дәулет, Асқар, Әділбек білімді ерен.
Абай, Айдар, Абзалдың орны бөлек,
Майра, Әйгерім, Жұлдызай күнің дер ем.
Мақсатын талай жастың орындадың,
Көрсетіп тілшілікте жолын жалын.
Назерке мен Шернияз, Қазақбайлар,
Өмірден тапқан қазір орындарын.
Келеді кемел жолды қорғап бәрі,
Замира әрбір сөзін салмақтады.
Капитаны Нұрланы Көбегеннің,
Елдос, Айдос жүр жолын жалғап тағы.
Ұлттың сөзін айтудан жалықпаңдар,
Ақпараттық айдында қалықтаңдар.
Қаламдарың ұшталып күннен-күнге,
Жазарларың көп болсын, шарықтаңдар! – деп, бейне құттықтау жолдады.
Жас ақын Бексұлтан Санақұл да кешке келіп, өз арнауын оқып берді:
Мәртебесін көтерген мұғалімнің,
Жақсылықтың бөгейді бұлағын кім?
Көбегенұлы десе күмілжімес,
Өрті басым көмейден шығар үннің.
Қаламның ұшындағы қоғам жайлы,
Еңбегің ететіндей бағаңды әйгі.
Алдына базына айтып келген жұрттың
Ақпарын азынатып хабарлайды.
Біз ақын сұлу сөзді сүйдік кемі.
Тартасың деген кезде сый ғып нені?
Мен оған төртінші өлең арнап тұрмын,
Төртінші өкіл болған соң биліктегі.
Шара барысында М.Мәметова атындағы Қызылорда педагогикалық жоғары колледжінің білім алушылары Нұрлан Көбегенұлының қаламынан туған «Көк байрақ көк бөрінің көзі емес пе?!», «Ғажап көрдім», «Шуылдай ма, көк теңіз?!» атты өлеңдерін оқыды. Республикаға танымал айтыскер ақын, «Күміс домбыра» иегері Бексұлтан Орынбасаров арнау орындаса, жыраулық өнерімен халық әндерін алыс-жақын шетелдерге насихаттап жүрген жыршы Марат Сүгірбай жырдан шашу шашты.
Оқырмандар «Басылым тарихы: 15 жылдық белес» атты кітап көрмесімен танысты. Көрмеге әр жылдары жарық көрген газеттің нөмірлері мен естелік фотолар қойылды. Сонымен бірге Нұрлан Көбегенұлының редакторлығымен газеттің 15 жылдығына орай жарық көрген «Ұстаз шамшырағы» кітабының сүйінші данасы көпшілікке таныстырылды.
Кеш қорытындысында «Ұстаз мәртебесі» газетінің бас редакторы Нұрлан Көбегенұлы сөз сөйлеп, басылымның 15 жылдық белесіне тоқталып, келген қонақтарға алғысын білдірді.
Кешке келген қонақтар «Ұстаз мәртебесі» газетінің ұжымына алдағы уақытта да жаңалықтың жаршысы болып, шығармашылық табыстың көкжиегінен көрініп, халықтың рухани байлығын арттыру бағытындағы еңбектеріне абырой тілеп, оқырмандарының көбейе беруіне тілектерін арнап тарасты.
Е.Ерболұлы
