Қай қоғамда да ұрпақ санасына білім нәрін құйып, ұлт болашағын тәрбиелеуші – ұстаздар қауымы. Еліміз тәуелсіздікке қол жеткізген тұста нарық талабы қос бүйірден қысып, қоғамдағы қордаланған мәселелердің ықпалынан мұғалім мәртебесі алға шыға алмады. Қаншама рет айтылса да, созбалаңға түсіп, еңсесі көтерілмей қойды. Осындай қысылтаяң кезеңде ұстаздардың беделін биіктетіп, абыройын асқақтату үшін жаңа бағытта республикалық қоғамдық-әлеуметтік, ғылыми-көпшілік «Ұстаз мәртебесі» газеті жарық көріп, барлық педагогтердің жанынан табылып, жөн сілтеушісіне айналды. Көп ұзамай «Педагог мәртебесі туралы» заң қолданысқа енді.
Рас, бұған дейін облысымызда да, республикалық деңгейде де педагогика саласын қамтитын талай газеттер оқырманға жол тартқан. Алайда біздің газеттің ұстанымы олардан мүлдем бөлек, білім саласына қатысты мәселелер көтеру, ағарту ісі, тәлім-тәрбие, баланың құқығын қорғау бірінші кезекте тұрды. Оқушылардың таным көкжиегін кеңейту мақсатында редакция бірнеше рет сайыстар өткізіп, мектептермен тікелей байланыс орнатты. Өз аудиториясына үш тілде: қазақ, орыс, ағылшын тілдерінде ақпарат таратты. Өз жеке сайтын ашып, өрісін кеңейтті.
Барлық мамандық атаулының өз ұстазы бар. «Ұстаз мәртебесі» газетінің ауқымы мен ұстанымы осынысымен кең. Тіпті педагогикалық, ағартушылық бағытымен бірге қоғамдық-әлеуметтік, мәдениет, құқық, кәсіпкерлік, денсаулық, спорт, медицина мәселелеріне де үн қатып, басылым нық қадам басып келеді.
Иә, газетіміздің бірнеше жобалары бар. Алғашқы жобасы – «Аламан» спорт бәйгесі. Жас ұрпақты спортқа баулу, саламатты өмір салтын насихаттауды басылым назарынан тыс қалдырған емес. Бұдан соң ғылыми бағытта «Үздік жас ғалым» байқауы ұйымдастырылды. Бұл жоба да жастар үшін үлкен жаңалық болды. Жас ғалымдарға үздік мақалалар жинағын шығарып бердік. Ал, «Зерде» интеллектуалды сайысы газеттің 5 жылдығына орай ұйымдастырылды. Сайыс облыс бойынша БАҚ арасында бірінші рет онлайн өтуімен есте қалды. Ал, газеттің онжылдығына орай редакция ұстаздар арасында конкурс ұйымдастырып, әр ай сайын үздіктерді анықтап, марапаттау шарасын жасады. Биылғы 15 жылдыққа орай газет редакциясы «Үздік мақала» конкурсын жариялады. Байқауды «Өрлеу» біліктілікті арттыру Ұлттық орталығы» АҚ филиалы Қызылорда облысы бойынша Кәсіби даму институтымен бірлесіп ұйымдастырып отыр.
Медиа кеңістікте өз орнын алып, аудиториясын тапқан республикалық қоғамдық-әлеуметтік, ғылыми-көпшілік «Ұстаз мәртебесі» газеті бүгінде жаңа белестерге аяқ басты. 15 жылдыққа орай «Ұстаз шамшырағы» атты кітап жарық көріп отыр. Осының бәрі – шығармашылық ұжымның өз оқырмандарына құрметі.
Қадірлі оқырман! Сіздерді «Ұстаз мәртебесі» газетінің 15 жылдығымен құттықтай отырып, жағымды жаңалықпен таңдарыңыз атсын, газетпен байланысыңыз нығая берсін, әр шаңыраққа шаттық нұры құйылсын деген тілегімді арнаймын.
Нұрлан Көбегенұлы,
«Ұстаз мәртебесі» газетінің бас редакторы, Ақпарат саласының үздігі, филология ғылымдарының кандидаты
