Білім – бүгінгінің басты қажеттілігі. Дүниетанымы кең адам ғана бәсекеге төтеп береді деген сөз. Өскелең ұрпақты әуелі білімге құштар болуға үндеудің сыры осында. «Табысты болудың ең іргелі, басты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт. Себебі құндылықтар жүйесінде білімді бәрінен биік қоятын ұлт қана табысқа жетеді»,- деп Президент Қасым-Жомарт Тоқаев айтқан болатын. Мұнда айтылған әрбір ойдың астарында терең мағына, парасатты пікір жатыр.
Білім алуды культке айналдыру, басымдыққа айналдыру деген нәрсе біздің қоғам үшін өте қажет. Дәл қазір біз әлемдегі ең үздік үлгілерді ескере отырып, мейлінше орта, жоғары деңгейде білім сапасын арттыру керекпіз. Білім – табысты болудың басты факторы. Ол ел жастарына болашағына ғана емес, бүтіндей мемлекеттің дамуына әсер етеді. Сондықтан, оған әрдайым ерекше басымдық берілетіні – түсінікті де. Қазір экономика, өнеркәсіп, өндіріс салалары көз ілеспес жылдамдықпен алға жылжуда. Яғни, технологиялық революция. Енді бір он жылдан кейін қазіргі кәсіптердің кейбірі жойылып, жаңа түрлері пайда болуы мүмкін. Ал, оларды игеріп кете алатын жастар қазақ елінде де болуы керек. Бәсекеге қабілеттілік дегеніміздің бір парасы осы болар.
Айтып өткеніміздей, білім бәсекесіне қабілетті жастар Қызылорда шаһарында да жетерлік. Ресейдегі Саха Республикасының астанасы Якутск қаласында 30 маусым мен 10 шілде аралығында онлайн режимде «Туймаада» халықаралық олимпиадасы өтті. Әлемнің 7 елінен қатысқан білімділер байқауына Қызылорда облысының 14 оқушысы қатысып, математика, физика, химия және информатика пәндері бойынша бақтарын сынады.
Халықаралық олимпиаданың қорытындысы бойынша физика пәнінен №9 дарынды балаларға арналған облыстық «Білім-инновация» лицей-интернатының 10 сынып оқушысы Арман Бақытов жүлделі ІІІ орын иегері атанып, қола медальға ие болды.
Бұл ғасыр – бәсеке ғасыры. Ертеңгі ел болашағы – жасөспірімдердің нағыз адам болып қалыптасуына игілік жасайтын басты тұлға – ұстаз. Ол – адамдардың өмірге көзқарасын, бір-біріне деген сый-құрмет сезімін қалыптастыратын, білім мен тәрбие беріп, адамгершіліктің нұрын төгетін жан. Сондықтан шәкірттерін осындай деңгейге жеткізген ұстаздарға алғыс шексіз. Оқушылардың білім додаларында бәсі биік бола бергей.
А.ӘДІЛЖАНҰЛЫ
