халықаралық білім беру жүйесінде бәсекеге қабілетті оқу орны
Қорқыт ата атындағы Қызылорда университетінің Студенттер сарайында Басқарма төрағасы-ректор Бейбіткүл Каримова атқарылған жұмыстар мен алдағы міндеттер туралы есепті кездесу өткізді. Университет басшысы қазіргі таңда университеттің халықаралық білім беру ортасындағы беделі мен бәсекеге қабілеттілігі артқанын айтты.
“Университет QS Word University Ranking-2025 рейтингі бойынша әлемдегі 1400+ үздік университеттердің қатарына кіреді. Азия континентіндегі университеттер арасында QS Asia Ranking рейтингтік агенттігінің мәліметі бойынша университет 2024 жылы ТОП 541-560 қатарына кіріп, Орталық Азиядағы университеттер арасында 34-орында тұр. Бұдан бөлек, UI Green Metric World University Rankings-2023 рейтингінде университет 1015-ші орында. Оқу орны 2024 жылы Times Higher Education рейтингінде Global University Impact Rankings-2025 индикаторы бойынша нәтиже көрсетті”,-деді Бейбіткүл Каримова.
Кездесу барысында оқу орнының академиялық білім беру, ғылыми-зерттеу, халықаралық қатынас, әлеуметтік қызмет және цифрландыру бағыттары баяндалды.
“Жыл сайын университетте контингент саны артып келеді. Бүгінде оқу ордасында 10512 студент білім алуда, оның ішінде 4905 мемлекеттік білім гранты бойынша оқиды. Биыл алғаш рет еліміздің өзге облыстарынан 151 түлек 1-курсқа қабылданды. Жалпы 2019-2020 оқу жылындағы студенттер санымен салыстырғанда жаңа оқу жылында білім алушылар 2 есеге, мемлекеттік грант негізінде оқитын студенттер саны 4,4 есеге өсті. Сонымен қатар, Қытай, Моңғолия, Өзбекстан және Ресейден келген 46 шетелдік студент білімін жетілдіруде”,-деді университет басшысы.
Есепті кезеңде Өзбекстан елінің «Ташкент ирригация және ауыл шаруашылығын механикаландыру инженерлері институты» Ұлттық зерттеу университетімен 6 бірлескен білім беру бағдарламасы әзірленді. Ал, қос диплом бағдарламасы бойынша Мәскеу авиация институтының «Восход» филиалы және Ж.Баласағын атындағы Қырғыз ұлттық университетімен бірлескен 2 білім беру ағдарламасы жүзеге асырылуда.
Бейбіткүл Сәрсемханқызы есепті кездесуде 2024-2025 оқу жылына арналған межелі міндеттерге тоқталды. Университет ректоры алдағы уақытта еліміздің адами капиталы мен ғылыми-технологиялық әлеуетін күшейтуге ықпал ететін жаңа бастамаларды жүзеге асыратынын айтты.
Қорқыт ата атындағы Қызылорда университетінде өткен есепті кездесуде шетелдік қандастарға 19 білім гранты табысталды.
“Қорқыт Ата университетінде тегін білім алуға мүмкіндік алғаныма шын жүректен қуаныштымын және ризашылығымды білдіремін. Шетелде жүрген қандастар үшін бұл тарихи отанына келіп білім алу үлкен арман. Осы білім ордасында өз ана тілімде білім алу – мен үшін үлкен мәртебе әрі ерекше қуаныш”, -деді Ардақ Сандуғаш.
Қорқыт ата атындағы Қызылорда университетінде жыл сайын жас ғалымдардың ғылыми ізденістерін қолдау мақсатында гранттар тағайындалады. Биыл гранттың жалпы сомасы 20 млн. теңгеге артып, 15 жоба жеңімпаз атанды.
Бұл жас ғалымдардың ғылыми-зерттеу жұмыстары мен инновациялық жобаларын қолдауға бағытталған. Сонымен қатар, университеттің ғылыми әлеуетін арттырып, өңірлік және республикалық деңгейде жаңашыл зерттеулерді жүзеге асыруға мүмкіндік.
«Биыл ректор грантының жалпы құны 20 миллион теңгеге дейін ұлғайғаны бізге үлкен серпін берді. Бұл қолдау ғылыми мақалаларымызды беделді басылымдарда жариялауға әрі жеке тұлға ретінде қалыптасуымызға зор мүмкіндік туғызады. Өз жобамда ауыл шаруашылығы саласының цифрлық трансформациясын мемлекеттік реттеудің заманауи моделін ұсынамын. Жоба нәтижесінде ауыл шаруашылығын климаттық қаржыландыруды субсидиялаудың жаңа механизмін әзірлеп, ұсынатын боламын»,-деді жас ғалым Ағжан Сайлаубекқызы.
Университетте 40 жасқа дейінгі жас ғалымдарға 2021 жылдан бастап ғылыми-зерттеу жұмыстарын жүргізу үшін арнайы грант бөлініп келеді. Бүгінге дейін 33 жобаға жалпы көлемі 50 млн. теңге қаржылай қолдау көрсетілді.
Оқу орнында 2024 жылы ғылымнан түскен жалпы табыс 4 есеге өскен. Бұдан бөлек, профессор-оқытушылар құрамының индекстелген журналдарда мақала жариялау белсенділігі жыл сайын артып келеді. Нақты айтқанда, 2024 жылы Scopus деректер базасында 99 ғылыми мақала, Web of Science деректер базасында 50 ғылыми мақала жарияланған. Университет ғылыми зерттеулердің нәтижелерін жариялау үшін 8 ғылыми журнал шығарады.
Жиынға зиялы қауым өкілдері, университеттің профессор-оқытушылар құрамы, серіктестер, білім алушылар мен БАҚ өкілдері қатысты. Қатысушылар кездесу соңында сауалдарын қойып, ұсыныс-пікірлерін білдірді. Кездесу Халықаралық студенттер күніне арналған студенттік халық аспаптар оркестрінің концертімен жалғасты.
Б.Санақұл
