«КІТАПХАНАҒА КІТАП СЫЙЛА» акциясы Шиелі мектептерінде қызу қолға алынды

Қазақтың ойшыл данасы, ақын Абай Құнанбаевтың «Артық ғылым кітапта, ерінбей оқып көруге» деген өсиетті сөзін ұстанған әрбір адам үшін ғылым мен білімнің қайнар көзі кітапта екенін ұғамыз. Осы орайда, Шиелі ауданы бойынша білім бөлімінің ұйымдастыруымен «Оқуға құштар мектеп» жобасы аясында «Кітапханаға кітап сыйла!» атты қайырымдылық акциясы өткізілуде. Акцияның мақсаты – мектеп кітапханасындағы кітап қорын молайту және оқырман санын арттыру, сүйіп оқыған кітабыңызды басқа да оқырмандармен бөлісу. Біле білгенге бұл акцияның астарында ұялы телефонның тұтқынына айналып бара жатқан жасөспірімнің көңілін кітапқа аудару, ұрпақтың санасын рухани қазынамен толықтыру, кітап оқу арқылы мәдениеттілікті, парасаттылықты ұғындыру жатыр.

«Кітап – рухани қазына, тәрбие құралы, әдебиет – көркем ой, парасатты пайым негізі, тіл мәдениетінің қайнар бастауы. Құнды еңбектермен танысып, әлемдік деңгейдегі жауһарлардан нәр алып, классик жазушылардың шығармаларымен сусындап өскен жас ұрпақ отаншыл, адал азамат болары сөзсіз! Ұлы Абайдың «Толық адам» тағылымына сай адам тәрбиелеу – маңызды міндет»,- дейді аудандық білім бөлімінің басшысы Жібек Баймұратова. Жаңашылдыққа жаны құштар жан аудандық білім бөлімінің бастамасымен жүзеге асырылып жатқан акцияға шиеліліктерді белсенді қатысуға шақырды.

Бүгінгі күні барлық білім беру ұйымындарындағы әдеби кітап қорына 1500 данадан аса кітап сыйға тартылған. Акция әлі де жалғасып жатыр.

Қ.Әндеш

Пікір үстеу

Э-пошта мекенжайыңыз жарияланбайды. Міндетті өрістер * таңбаланған