Ақтөбеде 110 педагог біліктілікті арттыру сертификатын сатып алған

«Ұлттық бірыңғай тест» дегенде бұрын шошып қарайтын қазекем қазір оның кілтін тауып алды. Ата-ана «ақша бәрін шешетінге» көз жеткізді. Баланы қойып, «бұл дерт» ұстазға ауыз салды. Тестілеуден өту үшін миллиондар қалтадан суырылатын болды. Бұл әңгімені өсекке балап жүргенде заң орындарын шындықты шырылдатып дәлелдеді.

Енді ақшаның күшімен модератор, сарапшы, зерттеуші, шебер болып жүрген кей пысықайлардың бастарына бұлт үйіріледі. Бөліп-жаратыны жоқ, «бұл дерт» еліміздің қай аймағын да аттап кетпейді. Қызылордада да биыл шатылғандар жетерлік. Ең көбі Ақтөбеде тіркеліпті. Ақтөбеліктер бірнеше жылдан бері еңбектенбей, тер төкпей, сертификат иесі атанып, «екі қойы бес тиын» болып жүре берсе керек.

Ақтөбе облысы бойынша біліктілікті арттыру тестінің жауаптарын беріп, сертификат алуға көмектескен төрт ұйымдастырушы сотталып, үкім шыққан соң педагогтер тексерілген. Алғашқы кезде тізімде 800-ден астам адам болғанымен, нақты 110 педагог анықталған, яғни 110 педагог біліктілікті арттыру сертификатын сатып алған. Қазіргі кезде олардың осы күнге дейін 97 млн. теңге үстемеақы алып, мемлекетке шығын келтіргені белгілі болып отыр. Қазір өз еріктерімен артық ақшаны қайтарып жатқан көрінеді.

– Ақтөбе облыстық ішкі аудит және Антикор жалған сертификатты анықтады. Біліктілікті арттырған соң барлығы 110 педагогке 97 млн. теңгеден астам үстемеақы аударылғаны белгілі болып отыр. Қаржы 1-2 жылда жиналып қалған. Әр адамға 800 мыңнан, кейде 1,2 млн. теңгеден келіп тұр. Қазіргі уақытта 75 млн. теңгеден астам қаржы кері қайтарылды. Қазір тек 22 млн. теңгеге жуық ақша қалып тұр. Кейбірі шын мәнінде өзі тапсырып, өткенін айтып отыр. Бірақ оны сот арқылы дәлелдеуі керек. 5-6 педагог соттасамыз деді. Қалған педагогтер қаржылық қиындыққа байланысты шамалы уақыт сұрады. Мойындады, ақшасын қайтарады,- дейді Ақтөбе облыстық білім басқармасы басшысының орынбасары Артур Әуезов.

Оның айтуынша, енді модератор біліктілігін алған адамдар үстемеақы алмайды, қайта біліктілікті арттыру үшін де 5 жыл уақыт керек. «Педагогтерді шақырған, осы жолмен өтуге болатынын айтып арбаған. Сөйтіп бірінен кейін бірі ілесіп кете берген. Пендешілікке салынған. Өкініш бар», – дейді А.Әуезов.

Н.Қитартегі

Пікір үстеу

Э-пошта мекенжайыңыз жарияланбайды. Міндетті өрістер * таңбаланған