Еліміз бойынша алғаш рет ауыл мектептерінің оқушыларына арналған жалпы білім беретін пәндер бойынша республикалық олимпиада басталды. Зияткерлік сайыстың салтанатты ашылу рәсіміне облыстық білім басқармасының басшысы қатысты. Асқарбек Есжанов қалаға қарасты Қызылжарма елді мекеніндегі С.Әлжіков атындағы №144 орта мектебіне барып, оқушыларға сәттілік тіледі.
Білім бәйгесіне облыстан барлығы 225 мектептен 9-11 сынып аралығындағы 5500 оқушы қатысуда. Олимпиада жаратылыстану-математикалық және қоғамдық-гуманитарлық бағыттарды қамтитын 13 пән бойынша өткізіледі. Бұл бастама ҚР Оқу-ағарту министрінің тапсырмасымен қала мен ауыл мектептері арасындағы алшақтықты қысқартуға және шалғай елді мекендердегі дарынды балаларды қолдауға бағытталған. Мақсат — ауылдық жерлердегі мектеп оқушыларының дарыны мен қабілетін анықтау және қолдау білдіру, сондай-ақ, олардың зияткерлік дамуы мен кәсіби бағдар алуына жағдай жасау. Олимпиада 29 қарашаға дейін жалғасады. Жеңімпаздар Оқу-ағарту министрлігінің дипломдарымен марапатталады. I дәрежелі диплом иегерлері 2024 жылдың ақпан айында өткізілетін оқу-жаттығу жиындарына шақырылып, жалпы білім беретін пәндер бойынша республикалық олимпиаданың қорытынды кезеңіне қатысады. Осы күні зияткерлік сайысқа республика бойынша 90 мыңнан астам оқушы қатысуға ниет білдірген.
Б.Бағдатұлы
