М.Мәметова атындағы Қызылорда жоғары педагогикалық колледжі – облысымызда кәсіптік-техникалық білім беруде көш бастап келе жатқан, білімді де білікті ұстаздар қызмет атқаратын, кәсіби маман даярлауда тәжірибесі мол, іргелі оқу орындарының бірі. Оқу орнында 1997 жылы ашылған «Шетел тілі» бөлімінде қазірде «Негізгі орта білім берудегі тіл мен әдебиетті оқытудың педагогикасы мен әдістемесі» мамандығы мен «Шетел тілі мұғалімі» біліктілігі бойынша студенттер білім алуда. Жоғарғы санатты, ғылым магистрлері, тәжірибелі білікті мамандар оқытудың жаңа инновациялық технологиялары бойынша білім берудің ұлттық құндылығын әлемдік білім құндылығымен ұштастыра білетін, қазіргі қоғамға қажетті шығармашылық іс-әрекетте өзін-өзі анықтау, жүзеге асыруды мақсат еткен білікті және еңбек нарығында сұранысқа ие үш тілді меңгерген мамандары даярлануда. Бұл мамандықтың ерекшелігі жаңа заман талабына сай, кең ауқымда қолданылатын ағылшын тілін меңгертуді көздейді. Негізгі мақсаты – педагогика және шет тілдерін оқыту әдістері бойынша теориялық білімі бар, шет тілін меңгертуде практикалық білімі, шет тілін оқытуда әдістер мен технологияларды игере алатын, бойында көшбасшылық қасиеттер бар, оқытудың инновациялық технологияларын оқу үрдісіне енгізе алатын, білім саласында бәсекеге қабілетті мамандар даярлау.
Ізденіс, зерттеу және шығармашылық арқылы жаңа формация педагогтарын даярлау бағытында заман талабына сай цифрлық ресурстарды, кең жолақты ақпараттарды пайдалана отырып өткізген сабақтары, новаторлық идеялары, нәтижеге бағытталған оқыту формалары – мамандық оқытушыларының кәсіби ерекшелігі.
Студенттерге қосымша білім беру – білім алушылардың білім алу қажеттіліктерін жан-жақты қанағаттандыру мақсатында жүзеге асырылатын тәрбиелеу мен оқыту үрдісі, үздіксіз білім беру жүйесінің ажырамас бөлігі. Қосымша білім беру жүйесі салауатты өмір салтын қалыптастыру, тілді жетік меңгерту, жеке тұлғаны өздігінен дамыту, шығармашыл, дарынды балаларды анықтау, оларға қолдау көрсету және қабілеттіліктерін дамыту, өскелең ұрпақ тәрбиесіне және олардың дарындылығын дамытуға, балалардың құқықтарын қорғауға назар аударуды күшейтуге бағытталған. Үйірмелер жұмысы ең алдымен, білім алушылардың бос уақыттарын тиімді ұйымдастыра отырып, олардың тілек-талаптарын қанағаттандыруға мүмкіндік жасау арқылы жүзеге асырылады. Мамандықтың білім алушыларын дамыту процесінде жан-жақты кәсіби бағытта жетілдіру, академиялық сөздік қорларын молайту мақсатында “Multilingual Filologist” жобасы құрылды. Осының негізінде «The English сlub», «English through stories», «Inspiring quotes for English learners», «The best novels in English» тақырыптарында үйірмелер жоспарланып, «Ғылымға бір қадам», «Үйірмелер перзентациясы», «Ертегілер әлемінде», «Біздің аудитория», «Біз болашақ ағылшын тілі мұғаліміміз», «Менің болашақ мамандығым», «Шетел жазушыларының туындыларын оқу» тақырыптарында студенттерді кәсіби жетілдіре отырып, сабақтан тыс уақытты тиімді пайдалану мақсатында жобалар, интеллектуалды шоулар мен сайыстар, блиц турнирлер ұйымдастырылып, белсенді қатысушылар марапатталды. Үйірме жұмыстарында оқушылардың шығармашылық белсенділіктері мен дербестіктерін дамытуға жағдай жасалып, оқушылардың бейімділігі мен қабілеттерінің қалыптасуының кепілі бола алады. Үйірме мүшелерін халықаралық, республикалық, облыстық ғылыми-практикалық конференцияларға, жоғарғы оқу орнының, колледж, колледжаралық конференцияларға қатыстыру үнемі жүргізілуде. Сонымен қатар үйірме мүшелері еліміздің әр түрлі облыстарында жоғарғы оқу орындарының, колледждердің ұйымдастырған халықаралық, республикалық, облыстық ғылыми-практикалық конференцияларға қатысып, жүлделі орындарға ие болып, кәсіби тұрғыда шыңдала түсуде.
Еліміздің білім саласында білім беру сапасын арттыруға және оқу мен оқытуды жан-жақты жетілдіру бағытында бөлімде көптеген бастамалар орын алды. Осы бағытта 15 қыркүйек күні халықаралық «FLEX» олимпиадасына іріктеу мақсатында бөлімішілік 1 және 2 курстар арасында сайыс өткізіліп, үздіктер анықталды. Жоғары курс студенттеріне қосымша кәсіби білім беру мақсатында Назарбаев Зияткерлік мектебінің ағылшын тілі пәні оқытушысы болған, ардагер ұстаз Г.Исабекова «Lesson study», «CLIL», «Action research» әдістерінің тиімді жақтары жайлы мастер класс өткізді. Сабаққа белсенді қатысқан студенттер оқытудың жаңаша технологияларымен танысты.
Кітап оқуға деген қызығушылықты арттыру, әдеби шығармалардың құндылығы мен мазмұнын дәріптеу мақсатында озық оқырманды анықтау және тамаша шығарманы оқуға кеңес беруге арналған облыстық «READx» алаңы ұйымдастырылды. «READx» жобасы – 21 ғасырда үлкен сұранысқа ие кітап сүйер қауымның сүйікті жобасы. Жоба барысында тақырыбында берілген мәтінді стилистикалық формада талқылауға қатысып, кітаптың қысқаша мазмұны, қоғамға берер идеясы, заманауи тәсілдермен салыстырмалы түрде мысалдар келтіру, автор идеясының ұнаған-ұнамаған тұстарын, жарнамалық түрде аталған кітапты оқуға шақыру секілді критерийлерді орындай отырып, колледжіміздің студенті жүлделі орынды иеленді.
Студенттердің тұрақты және тиімді ғылыми-зерттеу қызметін жасау, оқыту принциптері, ғылыми зерттеулер, практикаға сәйкес ғылыми-зерттеу принциптерін оқыту, студенттердің ғылымыи өзіндік жұмыстарының сапасын арттыру біздің бір міндетіміз. Оқытушылар мен студенттер арасында ғылыми зерттеу жұмыстарын жандандыру мақсатында бөлімде «Scientific research is the highest top of the creative process» тақырыбында жоба бағдарламасы құрылып, ғылыми жетекшілер мен студенттері зерттеу жұмыстарын жүргізуде.
Жаратылыстану бағытындағы оқытылатын биология, химия, география, математика пәндерін ағылшын тілінде меңгеруге арналған зерттеу жұмыстары, әдіс-тәсілдер түрлерін көрсету мақсатында «Science and youth-2021»/Ғылым және жастар-2021/ тақырыбында жетекші оқытушылар мен жас ғалымдардың жоба сайысы өткізілді. Жобаға дайындалу барысында оқытушылар мен студенттер ізденіп, жаңаша бағдарламалармен өздерінің жаңа идеяларын ортаға салды. Болашақ мамандарды даярлай отырып, бөлімдегі жас мамандардарға да кәсіби жетілдіруіне қатысты көптеген шаралар ұйымдастырылып отыр.
Әріптестік серіктестік бағытында «Шетел тілі» бөлімі Қызылорда облыстық ТЕК ағылшын тілі мұғалімдері ассоциациясымен үнемі бірігіп жұмыс атқарады. Қараша айында «TEK» – Қазақстан ағылшын тілі мұғалімдерінің ұлттық ассоцияциясының халықаралық ғылыми-практикалық «Teaching methods and strategies», «Effective teaching methods are keys to success» тақырыптарында ұйымдастырылған конференциясында тәлімгерлер мен жас мамандар қатысып, баяндамалар оқи отырып, өзара тәжірибе алмасты.
Ұлы философ Әл-Фараби айтқандай, «Білімді болу деген сөздің мағынасы – белгісіз нәрсені ашуға қабілетті болу» деген екен, демек бойындағы жігерін, білімі мен біліктілігін, өнері мен шығармашылығын шәкірттеріне үйретуден жалықпаған мамандық оқытушылары болашақтан үлкен үміт күтіп, өз шәкірттерінің биік белестерді талай бағындырарына сенімдері мол.
Сәния ИБРАГИМОВА,
М.Мәметова атындағы Қызылорда педагогикалық
жоғары колледжінің бөлім меңгерушісі
